引用:
原帖由 Katrinacat 於 2016-4-24 12:23 PM 發表 
咁放咗2日假，師兄又有乜甜故丶咸故丶性事、趣事...同我哋分享呢？今日星期日好free, 比個機會你暢所欲言啦！
HAHA..........師妹,咁我暢啦喎~~~~
*第5回，壁咚。*
阿N鐘意幫人，真係同過佢一班既都一定知。但呢件又係唔係好事呢?我係有所保留既。記得，好記得有一次，果次係我同阿N同course。係阿SIR黎到上堂前，有條高佬問阿N一陣做完功課借俾佢抄，但阿N因為之後落堂要幫另一個朋友，所以佢想推左高佬，講今次可能會借唔到俾條友抄，但高佬就好似奉左旨咁，態度仲好唔客氣。其實我睇在眼裡係非常不爽的，但因為呢件係阿N同高佬之間既事，我係唔方便講野既。
高佬: 妳幫左我先啦，我又唔係阻妳好多時間。 ( 記住，態度係極不客氣的。 )
N: 一係咁啦，我幫左我朋友先，你係library等等我，我幫完佢唔食lunch就即刻做好份功課先再借俾你抄啦。 ( 阿N係會天真到好聲好氣以為有用既。)
高佬: 咁不如妳做完借俾我抄先，跟手先再幫妳個friend啦。 ( 我看在眼裡。 )
N: 但係我應承左我朋友在先嘛，而且佢趕時間呢。
高佬: 嗱，最多一陣妳留係度快手D做{指份功課}，佢都係library度等妳一陣既遮，做完借俾我先之後再過去幫佢，我都趕時間架。 ( 我仍看在眼裡。 )
N: 唔好啦…… ( 阿N唔懂拒絕，她感為難，但經驗講我知……有D人，係唔領情，仲只會覺得全世界都欠佢既。 )
高佬: 黎啦，一於咁話，妳唔過去library，妳個friend都係等妳既遮，妳一日唔幫佢，佢都唔會走開架嘛，係咪先?黎啦，一於咁話。 ( 此時我看在眼裡，其實很不爽。我看見阿N面對呢D情況卻不懂招架時，就更不爽了。 )
我: 喂，聽唔到呀?阿N叫你等啊，你等到就等，等唔到就算。 ( 我站起來，毫不客氣。 )
高佬: 我同阿N傾，關你咩事喎? ( 係喎，關我咩事呢? )
N: Dragon，我……
我: 你理得我關唔關事，我而家問你等唔等，等得就等，唔等得就算，聽到未? ( 我說時著意阿N唔好出聲，我亦少有地唔客氣在說話。其實關我咩事呢?咁……唔關事又如何? )
高佬: 咁……咁阿N妳做好，就俾我啦。 ( 高佬雖然高，但其實唔係咩惡人，對於我呢D突襲式發惡，佢係唔識應對遮。而好快，阿sir亦到左，而落堂後，當我行去locker，阿N尾隨我，係喎，我剛才凶完阿高佬之後，都無同佢傾過一句就直到落堂了。而當我打開locker時。阿N忽然係我側邊出現…… )
我: 嘩，乜妳行路無聲既，嚇死人咩。 ( 我在講笑。N少有無反擊。 )
N: 點解……點解頭先你咁惡既。 ( 阿N在問問題時，居然唔係望住我。 )
我: 咩話，妳講咩話?聽唔到喎。 ( 我在整鬼佢，因為佢平時好少會咁鵪鶉。 )
N: 我話呀，你做咩咁多事啊。 ( 阿N知我整佢，佢抬頭望住我再快口說出來。 )
我: 哦……妳講呢樣下嘛。 ( 我沒有再說落去，反而將阿N迫去locker旁的支柱，將手放在她頭的側邊較高位置，進行壁咚。 )
N: 你……你想點?
我: 我?我唔知我想點喎，頭先都係，我唔鐘意既，唔關我事我都會理架喎，更何況佢一D禮貌都無。咁不如我問，點解妳要幫佢? ( 我在輕挑，但也在戲弄。 )
N: 咁佢叫到嘛…… ( 阿N在說，但我知佢呢句唔係佢心果句。 )
我: 我知幫人係好，但幫人亦都要量力而為，同埋睇下對方值唔值得幫，知唔知?
N: 因為……佢係我朋友囉。 ( 阿N，最大弱點就係呢度。 )
我: 講真，嚴格黎講佢唔算係妳朋友，朋友，係唔會做出為難對方既事情，知道嘛? ( 呢一刻我沒鬥氣，所以語調亦無意間變得溫柔。雖然阿N低著頭，但我仍看得出她有點羞澀。 )
N: 但……你頭先真係好惡嘛。 ( 她說時沒有責怪意思，所以…… )
我: 啊……哈哈，妳係唔係想講，我頭先為妳出頭時好型啊? ( 我又一次厚著臉皮，將頭哄埋了一點點。她也感覺到，所以此時她抬起頭來。 )
N: 先唔係，我係講你太衝動喳，下次睇清楚先呀。
我: 咁妳唔鐘意，我下次唔幫囉。
N: 我都唔係呢個意思，但……睇清楚環境先會好D囉，咁樣真係好危險。 (阿N大驚小怪，這是我當時的感覺。但我沒上心，我掛住捉弄她。 )
我: 哈哈，即妳都鐘意啦下嘛，OKOK。( 我在耍無賴ing。 )
N: 我仲有野做，先唔得閒睬你。 ( 阿N一鼓作氣的推開了我，就走去library幫人了。原來回想返，果次係我地成為情侶前，企得最埋既其中一次。 )
那時候的我，對阿N已是滿有好感的，卻仍未有採取追求的行動。總感覺而家年代的感情世界觀，好比即食麵，兩人快熟快食，其實我不是太喜歡。我喜歡醞釀，雖則花時間，但來得自然。而我記得，一開始我成班朋友約20多人裡，有男有女當中還未有一對成為拖友，因為那時一起玩，是真的很開心的。沒有愛情的世界，還是一樣精彩的。
………TO BE 下回………
