來日方長
可能你會說，煮飯咁普通，有什麼特別呢?其實煮飯特別不在於它本身，而是特別在於這行為上的意義，電影橋段的男生為愛可以犧牲自己救他的女人，但你卻很少看到他愛一個女人會去為她織頸巾、細心打掃又或安排(煮)晚飯，那不是男人不懂浪漫，而是行為表現上如果包含耐性與細心，往往並不是男人的專長。女人有幾個行為，是會在我心裡加分的，現在Bella為我切菜煮飯就是其中一種。為什麼我會喜歡?因為這不是單純物質價值高低，去買一個什麼回來就叫等同重視對方就可以滿足到的行為，而是我可以享受她為我花心思的過程。
Bella和我到宿舍，今晚特別有主意的她，下了幾道命令，要我遵守的。
Bella: 乖乖地等食~~
不能入廚房搞搞震~~
要真心講佢知好唔好食~~
我: 好好，女皇遵命。
Bella和我一返到宿舍，她便換上了恤衫短褲，外加一條圍裙就在專心煮飯，我相信師兄們都會和我一樣，看見一個集活潑和身材一流的尤物 ( 我前言曾提她像極林明禎的身型和氣質 ) 在為自己忙，那是非常的感動和開心的。Bella爽朗的短髮令她不用束起頭髮，穿了圍裙的她不知怎的在忙著煮食就是有另一種性感，此時我見她的蝴蝶結鬆了，就上前為她打好結。
Bella: 喂喂，咪講左唔准入黎囉。 ( 宿舍是開放式廚房，很方便出出入入。 )
我: 妳個結鬆左，我幫妳拉緊喳。 ( 我站在Bella背後為她束緊腰間的蝴蝶結，稍微拉緊後，驟眼看上去令她身型更突出。 )
Bella: 咁而家綁緊左，點解你仲未出去呢? ( 我忍不住在Bella身後攬她的纖腰來。 )
我: 哦?係咩?我驚妳企唔穩嘛。
Bella: 唔搞搞震啊，仲有20分鐘先得，不如你沖涼先啦。 ( Bella轉身鬼瞼扮嬲再命令式要求，我乖乖聽話就是。 )
當我沖好身後，返回大廳時，Bella已擺放好飯菜，平時紮紮跳的她現在就是給我另一種感覺。她在除下圍裙的同時，我就裝好白飯，兩個人簡單開心的在食飯，我在簡單的食，她卻在留心的看。
我: Haha…… 做咩望住我遮。
Bella: 好食嗎? ( Bella眼仔碌碌的在等我答案。 )
我: 好食，原來妳識煮飯整野食架喎。
Bella: 哼，我仲好多野叻你都唔知添啊。 ( Bella露出了得戚的表情，對於我的讚賞非常受落。 )
我: 但妳點知我鐘意清淡既? ( 人大了，除非果餐係大魚大肉或重口味煎炸炒，要不然，我係鐘意清淡或只需少許調味料作煮食的人。 )
Bella: 我有留意你架，你好少會揀飲擇食，但對食其實好有要求。其實每次同你出去應酬時，我都留意到你好鐘意食酸或甜既野。
我: 係架，就係唔鐘意食辣呢。
Bella: 怕辣既男人好聽女朋友話架喎，你知嘛? ( Bella仰前望著我在說。 )
我: 我最唔鐘意就係聽話妳知嘛?
Bella: 我知，所以好多時你最吸引人就係你遷就女人果時囉。 ( Bella在撒嬌。 )
我: Haha……. 咁果個女人一定好有本事嘞。 ( 我在笑答，也吻上了Bella一啖。 )
Bella: Michelle呢?佢有無本事?
我: 佢有本事只係工作上，但性格上太喜怒無常，亦鐘意人奉承，太計算既女人再靚都唔會討好架。而且佢居然同我爭妳，太可惡喇。 ( 我在說出我感受。 )
Bella: Haha…… 乜你怕我會走咩? ( 她在試探。 )
我: 吓?乜妳會走咩? ( 我在作弄。 )
Bella: 睇下你對我好無囉?
我: 我對妳好好架喎，但我一定會公私分明。
Bella: 你放心，我未曾令你失望過，係咪先。
我: 唔…….. 如果今餐飯，一陣有埋甜品，我就唔會失望嘞。
Bella: Haha…… 咁你快D食，一陣你就知啦。 ( Bella在鬼靈精。 )
我: 又好。 ( 我在笑笑的配合。 )
Bella煮的不是什麼驚天地、泣鬼神既飯菜，只是家常的幾味小菜，但我卻已非常受落，那是有原因的。而現在，食完飯後習慣執拾的我卻被Bella叫停。
Bella: 不如食埋甜品先執啦。
我: 真係有甜品架?但我唔見妳有特別買咩材料喎。 ( 認識我的人，都知我喜好，我對於好食的甜品，是完全沒有抵抗力的。 )
Bella往爐頭，提起熱呼呼的一碗東西來，那是一碗簡單不過的燉蛋，但令我有不一樣的感覺。
Bella: 唔好意思啊，時間關係，我整唔到其他甜品了。
我: 妳係整，而唔係買，我已經好意外了，而家仲要係燉蛋，妳知唔知佢係我10大最鐘意既甜品之一。
Bella: 哦?但好易整架喳喎。
我: 易整，難精。通常越易整既野，越難整得好味。 ( 中西式既甜品我都鐘意食，我鐘意食唔係因為佢地夠甜或要好複雜，而係因為甜品如果你細心睇，佢係可以好藝術，而如果仲可以食落肚，簡直就係代表著可以將她完全擁有一樣。 )
Bella: 咁你試下啦。 ( Bella有一份心思，就是耐性和細心度十足，很多細節位她都會留意都會去做。我不喜歡做大爺，卻不討厭被服侍。Bella慢慢地在餵我食她弄的燉蛋。 )
我: 妳係有心思架喎，好多人都會好”鞋”，但妳既真係滑、嫩同香。 ( Bella在笑，現在的她，活像在餵小朋友一樣，是不是每個女生都有母性，喜歡照顧人的呢? )
Bella: 真係?定你氹我架?食真D添啦。 ( 此時我含住一片燉蛋在咀邊，看著Bella。 )
我: 妳試下。 ( 我遞向Bella咀給她，同時手一下就攬著她的腰往我身靠近。 )
Bella: 都真係燉得OK。 ( Bella接過我口中的燉蛋，腰稍微向後退在嚐自己的作品。她就是知我下一步的詭計，嘿嘿….. 這樣的對手，才有趣。 )
我: 乜我講緊燉蛋咩? ( 講完我已在親Bella的咀，一手拉緊她入懷內，另一手讓她坐在我大脾上，因為她手拿著碗和匙羹沒法好好反抗，只好給我在吻她的腮位，那是既敏感又叫人癢癢的。 )
Bella: 喂啊，乖啦食埋先啦。
我: 我食緊，滑、嫩、香啦~~ 又係妳叫我食既。
Bella: 我係叫你食燉蛋，唔係我啊，而且我成身汗呢。
我: 吓，點解都咁香既?
Bella: 傻。 ( Bella不懂招架我的口花花，因為那是我鮮有的一面，至少，Bella很少接觸這一面的我。 )
溫馨浪漫不一定要好大花費來經營，點點心思其實已經足夠。我食完甜品後堅持碗碟由我洗，那是因為我告知Bella聽說女生手不要接觸太多洗潔精，她看了我一看之後，也就乖乖的去沖涼。在這個地方，我倆就像同居一樣做著情侶的事。如果係你，你會趁而家就上房沖入Bella的浴室來個鴛鴦浴嗎?你說我造作都好，如果今晚會發生的事終究會發生，其實有必要急於那一時嗎?我倒反而享受現在，看看發展落去又會是什麼一回事。
當Bella沖完涼後，她再返回大廳來時，我已模擬好了一間私人迷你影院，整個大廳除了幾盞石英射燈外就能照明的東西都已被關了，我在茶几上已準備好了紅酒和小食。如果前半場是Bella負責的溫馨，那麼後半部的浪漫現在就由我來準備好了。Bella是活潑好動的女孩，她對浪漫有憧憬卻不喜歡太刻意去營造，所以我沒有揀愛情片和她一起看，反而我選擇了災難片，那不是我粗心大意，反而是想更多話題。為什麼?因為災難片很多時都離不開突發事件，那是沒有人可以給個正確選擇你的遊戲，危難時選擇留下又或出走，信任與及否定的人生交叉點等等，Bella很喜歡問我，如果咁咁咁，你會選擇咩?她很想知，我和她的選擇，是否一致，我和她的心態，是否一樣……. 還記得那套電影最後男主角潛入水裡解除危機，令所有人得救，而最後他亦和女主角可以一齊，我就笑說。
我: 其實無乜可能架喎。
Bella: 咩野無可能，無咁偉大?但佢唔咁做，所有人都要死喎。
我: 唔係偉唔偉大，而家男主角潛左入水超過5分鐘，其實正常人……應該缺氧死左。
Bella: 咁佢都有講啦，個男仔係水度諗返起女主角既種種時，佢就有氣力，搞掂左個問題之後再游返上水面嘛。 ( 我既理性想反駁，但下場一定唔好過，所以…… )
我: 又係喎，咁男主角係唔係真係可以閉氣5分鐘呢? ( 此時我慢慢的趨向Bella去。 )
Bella: 你…..你想點啊?
我: 我想證實下囉。
Bella: 喂喂……. 套戲仲未完架，不如睇埋先啦。
我: 出字幕啦喎。 ( 就這樣，我和Bella在大廳的Sofa上吻起來，少說也有幾分鐘。 )
我: 係喎，原來真係諗住女主角，可以長氣左架喎。
Bella: Haha….. 你頭先有閉氣咩?
我: 係喎，未添，測試多次先。 ( 我再攬住Bella來錫，此時電影已播完，整個大廳也黑蚊蚊起來，只剩下冷氣機聲。 )
Bella是不是和我一樣等了這刻很久呢?我不知，但準備功夫卻肯定是做足的，哪方面?..... Bella的咀，是甜的，她頸側，是香的，和髮絲一樣香，香味卻不同，搞鬼點說，是洗頭水、和沐浴露不同而已，她腰間是零贅肉，摸上去，手感一流。我倆在吻，手也只是乖乖的點到即止。此時………..
我: 我地上岸囉。
Bella: 吓?
我: 頭先阿男主角一上水女主角就攬住佢，雖然套戲無播遮，但照劇情佢地應該上岸做應該做既事架啦，唔係點會黑晒遮，人地都熄燈啦。
Bella: 唓，人地出字幕喳，邊係熄燈呢。 ( 此時我倆在笑，我示意其實我想上一上洗手間。 )
