聚會
同Cherry傾計，其實除了Email，仲有間唔中既SMS，但因為大家係唔同電訊台，所以好少用，咁PM係我地既其中一個途徑，再黎，其實就係網上既討論區了。唔知幾時開始，網上我地同一班人，越傾越密，越傾越埋，有人提議，不如……. 搵日出黎食飯囉。基本上我係無問題的，能夠同網上既人見面，其實好有趣，又令人期待，因為大家平時網上咩都傾，咩都講得出，咁現實生活又係咩一回事呢?。而我同Cherry亦會講究竟大家會係咩樣、到時又係點既呢?
還記得見面那晚，由於天氣已凍了足足超過一星期，全城掀起一股搶暖包暖蛋熱水袋潮，雖然未去到要買會完全買不到，但因為很多人也會買起備用，形成會去好多店買都可能撲個空或只有少數量。說回那晚，除了樓主，個Post內活躍的，最投契的我們6個人都會出席。當中有位名為大老闆的叔叔揸主意，由他作主去了一間日本店作為大家既第一次見面。工作關係，我比原先約好的7點鐘遲了半小時，當我去到時，大家都已經坐低晒，還記得該日本店是非常出名同好好view，位於商業大廈的高層，可以看到維港景，如果唔係熟客，要攞呢個房位仲有全海景view係好難既，可想而知大老闆應該都係識食同有面子之人。當我一踏入房，眾人焦點當然係望向我，隨即:
大老闆: 嘿嘿………. 遲到，罰飲一杯先。 ( 大老闆身型標準，他原來身份亦真的是大老闆，有點威嚴得來算nice，他是第一個看見我的人。 )
我: HAHA…… 咁快?好好……….
Vinnytsia: 啊呵~~~~ 原來你就係Dragon。 ( Vinnytsia係post內是感性和敢言的代言人，除了多更新性感相外，往往亦愛語出驚人。而她是位20尾的女士，長髮，身段非常不錯，因為她原來是瑜伽和營養導師。由於所有人已一早到齊，所以她猜到我是誰。但起初我就還未知她是誰……… )
我: 係啊，妳好。
Hugo: 嗱，你遲到所以你坐門口，一陣遞菜、落order、埋單你搞架下。 ( 呢間日式店有魚生同邊爐食，由於係房，我地都要除晒鞋放對腳入枱底，所以最好有個人坐門口位負責一切。而Hugo嘛，最初認識他是印象麻麻，他是金融佬，轉數快，搵錢至上。現在熟了，佢會對我像細佬般有說有笑。他一身西裝look看出有健開身，亦深懂交際的人。 )
我: OK，無問題啊。
Jasmine: Hello，Dragon。 ( Jasmine，一位約35、6歲的女士，已有2位小朋友，單親媽媽多年，部門主管，聽她說，她原就是一位簡單的女人，有家庭有小朋友又投入工作，可惜可能太忙了，老公外遇而離婚多年，她是典型不明男人內心所以不懂原因卻又會有點怪自己不解溫柔的人，現最想照顧好兩位小朋友。 )
我: Hihi，唔好意思咁多位，我遲左。 ( 當我到時，Cherry亦已一早到左，佢夾係Hugo同Jasmine之間。 )
Cherry: Hi Dragon。 ( 和Cherry早早商量過，最好唔俾大家知道，我地私下倆人一早已見過面，所以我地可以係識，但唔認得對方。 )
我: Hi Cherry，妳架，之前係post度妳講凍，我剛見藥房有貨，所以買左。 ( 我從背囊取出一大包暖包給Cherry。 )
Cherry: 啊，多謝。 ( Cherry係surprise的。而此時Vinnytsia眼大大的搶著說。 )
Vinnytsia: Dragon~~~~ 我都好凍架其實。 ( Vinnytsia在扮撒嬌。 )
我: Haha…… 係係係，下次買俾妳。
Vinnytsia: 係架啦，咁而家要你坐我身邊先啦。 ( Vinnytsia一把就扯我埋身坐下。Vinnytsia就是如此率直，在post內她也是如此不客氣。 )
大老闆，Hugo，Cherry，Jasmine，Vinnytsia同我一行6人一齊坐一齊食，人說網上多言的人在現實上未必，但可能大家係網上認識已超一年了，陌生的感覺一點也沒有(或許飲了酒吧)，最多就是將印象裡認識的人，現在將那人名字key上了樣子，裡外感覺難得的一致呢。在席間，得知選此日式餐廳，原來是Cherry所想，而大老闆訂位促成。有趣既係，我看得出，大老闆和Hugo對Cherry其實頗有好感，我由於坐得遠，就比較被動，而且不停給Vinnytsia整古同飲酒，愉快的一晚好快就到尾聲。
Hugo: 食完大家一陣想去飲野嘛?我知道呢度附近有間bar環境唔錯的，有無興趣? ( 由於我想返新屋整野，所以我就拒絕了，但大老闆、Cherry同Jasmine都有興趣，所以我地就分道揚鑣，而今次的第一次聚會大家就到此為止了。飯後Vinnytsia問我可否送她去車站搭車，因為得她一個女仔，今次護花任務就由我當上了。 )
在去地鐵站時，和Vinnytsia是有講有笑的，我深信她在post內講既都係真事，她一頭捲曲的長髮，不錯的外貌，還有均勻的身段，有點高傲既表情，不放一般男人在眼內的態度，原是缺點的都因此而變成優點，因為以上種種反而可以令男人更想征服她嘛，她口中男人大多都不是好東西，來來去去最終目的就是想上床，所以跟她上瑜珈堂的男人，都得吃苦頭收場等等。
我: Haha…… 咁妳有男友嗎?妳需要愛情嘛?
Vinnytsia: 而家無男友，但有好多男性朋友。我需要愛情，但我未遇到可以投放感情既人。
我: 跟妳上堂既男人，都會對妳感興趣嗎?
Vinnytsia: 當然唔會，男人對女人感興趣時，眼神會唔一樣。
我: 點唔一樣? ( 我好奇。 )
Vinnytsia: 簡單講，睇靚既野同睇鐘意既野眼神其實好唔同，女人會感覺到。
我: Haha…… 乜有咁分既咩?咁我既又係咩眼神呢? ( 我在說笑。 )
Vinnytsia: 你?我只知你望我同望Cherry既眼神唔一樣。
我: 哦?點唔一樣呢?
Vinnytsia: 答我先?你同Cherry係唔係一早已識，已見過?嗱，真話。
我: Haha……OKOK，係，我地一早已見過，但妳真係睇眼神睇得出架? ( 正所謂巧詐不如拙誠，我選擇坦白。 )
Vinnytsia: 眼神睇得出，態度亦都係，而且…… 你唔記得，今晚你一到就個個講唔出都識得叫佢做Cherry咩? ( 係??我居然咁大意……. )
我: 哦…… 我太嫩了，對吧? ( 我在笑，Vinnytsia也在。 )
Vinnytsia: 我睇得出Hugo都對Cherry好有興趣喎，你頭先唔跟埋去飲野，你唔擔心咩?
我: 吓，咁我要送妳搭車嘛。
Vinnytsia: 嘩，咁我應該開心，定唔好意思先?一陣Cherry俾Hugo追左入我數點算。 ( 我倆一起在笑。我同Vinnytsia，算傾得唔錯，她也放心和我做朋友，靚女有時有呢度好，佢知你對佢唔係想入非非，佢反而開心難得會有個知心異性朋友。 )
送了Vinnytsia上車後，我也準備回新屋去，事實上我真的只騰出食飯時間見大家，之後我係打算忙自己的，所以飲野什麼的，在我來說還是下次吧。在我回程上，此時收到了電話，是Cherry打來的。
Cherry: 喂喂，係邊呢?
我: 返緊屋企囉。 ( Cherry聽後慢了半晌。 )
Cherry: 返緊…….邊個屋企?
我: Haha……. 咩野邊個屋企，當然係我自己屋企啦。
Cherry: Vinnytsia呢?你地已分開左了? ( 呵呵……原來有人擔心。 )
我: 哦，係啊，我送左佢去搭車就走了，妳呢?妳得閒打俾我2?
Cherry: 我地已飲完野了，散左啦大家。
我: 哦?咁快?飲左都無幾耐喳喎。
Cherry: 唔通你想我飲耐D?
我: Haha……. 當然唔會，就算想妳飲醉D，都應該同我飲啦。
Cherry: 好呀，就而家。
我: 而家?我返緊新屋喎。
Cherry: 咁就你新屋啦，好無?
我: 哦?.......
Cherry: 唔方便嗎?
我: 唔係，Haha….. 好啦，地址係XXX，妳黎到樓下講我知啦。 ( Cherry少有的主動，令我感新鮮又不好拒絕。 )
好快，Cherry就已經來了，她來，還有一袋7仔的戰利品，我不知是什麼，只是邊領路時，替她拿起。
Cherry: 我咁突然要黎，你會唔會唔鐘意?
我: Haha…… 唔會，只係一來我有少少醉，二來間屋又可能會有D亂，妳跟上黎，我怕污糟同埋妳危險遮。 ( 我在說笑亦在試探。 )
Cherry: 你講到好似真係好危險咁喎，Haha……
我: 係架，妳睇下，今晚個月亮幾圓，妳好危險架，我會借少少醉架可能。
Cherry: 咁啱啦，麻煩借大大醉啦。 ( Cherry指指袋中的原來都係啤酒。 )
我: Haha…… 乜妳頭先未盡興?妳真係唔知死字點寫。
Cherry: 哦，你好飲得架?
我: 唔係，我反而唔係好飲得，所以妳先死之嘛，Haha……
好奇怪，同客食飯應酬，再勁既烈酒我都唔會醉，但啤酒反而係我既死穴，我5、6杯就已經會吃不消。Cherry跟我到新屋，其實新屋也不盡能說是新，為什麼?因為屋其實已買落左一排，由於我仍和家人同住，故此新屋放租了，而租客最近搬走了，聽說他是外國人，公司派他來香港工作，最近已搬走，而我，就需要上去看看間屋有無咩問題需要整理。
我是租客走後第一次上去，而Cherry則第一次來我家，家裡的傢俬很簡潔乾淨。好明顯租客未有叫停鐘點上來打掃，記得他走前有說，某些傢俱他不拿走，方便我再租給下一手用，如果不需要，運走的費用由他負。我看了看，床、Sofa、廚房的基本用具都齊，活像就是我即時搬去入住都無問題，而Cherry，由於她是第一次上來，她來回四周望後，就待在窗台坐下了。當我檢查好一齊去水設備都沒問題時，此時Cherry由睡房叫喚我。
