旅行 – 抗拒得來嗎的選擇題(上)
時間過得好快，那是因為工作很忙，我鐘意新鮮，更愛挑戰，和女魔頭公司談好的新產品，首一年將會分4季推出，雖說產品設計一早已有定案，但因為是新，細節上每每會要到正式生產才知需要如何修改。一如所料，新產品成功，工作量只會令我更忙，Bella呢?她卻越忙越精神?為什麼?嘿嘿…….無他，因為公司決定好，當第一季的產品順利完成出貨後，大伙就會去旅行，這是令全公司上下再忙再攰也精力無限的精神支柱呢~~~~
而因太忙，我也沒見Cherry好一段時間，只知她唔舒服，這情況讓我有點擔心她起來，但她總是說沒事。
另外，如前言，Margaux是一位和我仍處於通訊階段的啤酒妹妹，她對我很好奇，我們純文字上的交流，她每每也在不停發問，現在的她，倒像問題少女多。我不介意講給她知，因為在兩性處理上，她比我更老練更有心思，而且當時的我認為，她不會看得上我，因為聽她說，她的男朋友，多如恆河沙數，有美國的，有英國的，有烏克蘭的，亦有追緊她來自日本和韓國的，她的男朋友，大部份都是在工作上時認識，他們都是公司派來香港工作，每個月都會在香港和自己國家兩邊走的人，所以Margaux就是男友多多，時間上也應付得來，那麼體力上呢……..Haha…… 我就不得而知了，我只猜想她的身材應不錯，和她的長相應該不差吧。和她相比，我只是小菜一碟，而我的事，她卻喜歡以軍師角色為我審時度勢，她會好感興趣知道我和Bella的發展，也會想知多一點我和Cherry的動向。是不是小妮子都喜歡給予意見人家的感情事既呢?我不知，但對於當時不會對任何人說起Cherry和Bella的我來說，Margaux倒是一個不錯的傾訴對象。
要說Margaux起的作用其實十分重要，她提醒了我，Cherry是不是身子較弱，為什麼時常也要睇醫生，我對Cherry的疑問不要心急問，讓Cherry自己覺得係時候講才講會較好，而Bella那次和我醉酒纏綿後，隻字不提並不是大方也不是沒事發生，反而女性的心思，我得好好多加留意……… 好好好，我記下了，只是當時的我，卻不太懂做得更好。還記得我準備出發去旅行前星期，Margaux也是意見多多。
Margaux:
準備好旅行既必需品未?
今次旅行會唔會同Bella有咩事發生呢?
影多D相，旅行完後記得報告，會買手信俾Cherry嗎等等?………
我:
旅行用既野都準備好。
今次旅行，男女同事會安排不同房，唔會有事發生。
今次旅行又唔係自由行，無咩野好講架嘛?
買手信俾Cherry?可能會，要睇情況啊，佢又無要求………….
Margaux: 咁我有無手信架?
我: 妳?妳唔係講我地唔會見架咩?點俾手信妳啊?定妳想我寄俾妳?都OK既。
Margaux: 你對我唔好奇咩?
我: Haha…….. 邊方面先?妳好靚架?
Margaux: 唔…… 我估我唔差囉，好多人都講我似JJ架。 ( 唔係男人條JJ，佢意思係賈曉晨，日後和Margaux見過面後，可以講氣質上似，但其實我覺得似朝比奈彩多點，尤其她有比Cherry和Bella還要高的長腿。 )
我: Haha…… 咁緊要，咁咪好多人追?
Margaux: Ok喇…….. 喂喂，咪轉話題喎……….
我: Haha…… 我要買，都買左俾Cherry佢地先啦，妳果份啦喎，記得先喇……
Margaux: 衰人，我先唔恨…………….
其實我對Margaux唔算好了解，我只知佢係中環一帶返工，最初同佢傾亦係由PM開始，因為佢講我知佢返工係要著制服Look好斯文既，我就講笑問好多白痴問題，例如:你好，請問藍妹係咪妳阿妹?妳可能係最好既?即係嘉士伯啦，我有無估錯?吓……. 唔好笑咩，Sorry，我知老土左少少….. 會唔會有制服誘惑玩?我唔似出黎玩?乜有樣睇架咩?唔係有樣睇?係因為太白痴太搞笑?都係既…… 每個見Margaux既男人，通常都會盡展自己最優秀既一面去吸引佢，只有我，反而由開始到而家，都只係輕輕鬆鬆咁傾下就算。在她心裡，對男人係有一番獨特見解的，以後再為大家解釋吧。
今次去旅行，是由香港和國內部門同事一起出發的4日3夜之旅，公司的員工都可以半價帶自己既家庭成員一齊去玩，這個安排其實幾窩心，事實上亦有好些同事會帶另一半又或自己的小家庭出席，平時同同事之間傾公事多，看著他們和家人親人相處，感覺實在又有另一番感受，令我感覺，如果自己也組織一個小家庭，又會是怎樣的一回事，自己會是一個怎麼樣的老公和爸爸呢?Raymond是公司另一條team的阿頭，他帶來妻兒一起玩，他的下屬Mani也帶了男友來，我嘛，就只有我一人了，我女友倒是一位不擅應酬的人呢，至於Bella，她也是單身一人，她口中說的男友，其實從來沒有出現，公司的男同事知道後實在既開心又興奮呢。
今次的行程其實好簡單，我們所有同事第一日就係簡單的觀光，之後就會入住當地的Resort Hotel，各人可以報名參加酒店提供唔同既活動，到夜晚又有營火晚會。而由於太多人了，第一日基本上就係出發去目的地和簡單的觀光，我同Bella可以說是完全無交流，我想我和大家一樣，曾幻想的艷遇和激情第一晚並沒有發生。而黎緊既幾日，我地Team都已安排好參與酒店的節目和另加自己去觀光，所以順理成章就和Bella接觸多了。由於是去旅行，Bella的青春活力本錢可謂完全大爆發，她本身就是精力無限的代名詞，我很喜歡，因為和她一起，就是精神。行程第2日，Bella今天是吊帶背心另加吊帶工人熱短褲，白滑的長腿配上波鞋，觀光好，購物好，她都是一馬當先，有她在，大家也被感染，笑也多了。我們行完名勝地方之後好快就返渡假村，因為大家一早講好左會去浸溫泉，這裡地方有度好，她本身有男女共浴較玩樂性質的溫泉，也有男女分開比較認真mode既溫泉，一開始當然就是大家一起約埋見面吧，而柒男和Lawman更是說出了口講很想見Bella在溫泉的模樣，這部份其實也是我最期待之一的部份呢。果然，女生中Bella，Mani，還有別的女同事一行人出現，最搶眼果然還是Bella，她穿上了Bikini，可惜的是外邊多了件白T-恤，其實這也是非常寫實，要Bella火辣登場又好似太過了點吧………. 但說坦白其實這種看不清楚的著法更是誘人，因為唔落水尤自可，一落水就不得了，那鬆身的T-恤會即時貼著Bella的身體，不單出賣了Bella誘人的身材，連那粉黃色的Bikini也約隱約現，Bella和大部份女仔也一樣，皮膚很白，也很滑(我當然知)，她沒避諱的和大家玩著時在水裡的姿態很是吸引，而當然和Bella玩的主要對象不是別人也不是我，而是Raymond的小朋友，她和Mani也是很喜歡小朋友的，而我和Raymond及Mani男友則坐在一旁閑談。
Raymond: Dragon，你鐘唔鐘意小朋友架?
我: 我?我鐘意架，做咩咁問?
Raymond: 有仔趁嫩生，唔係只對女人講架，男人都要，如果你鐘意，就要快手。
我: 你意思陪住個小朋友成長果D?
Raymond: 係啊，我見你都幾Fit，但湊小朋友所花既精力同耐性，絕對係你體能幾掂都會吃不消，所以想有小朋友就不妨快手。 ( Raymond係一個好有規劃既人，佢只係比我大幾年，但小朋友已2歲和5歲了，他現在所做的，一切也在他早早擬定好的計劃之中。 )
Ben: 係啊，我都打算過兩年會有小朋友哩。 ( Ben，Mani的男友。 )
我: 哦?即你將會同Mani結婚?恭喜晒喎，唔聽Mani講既。
Ben: 我地已經有初步既默契架啦，而且我同佢都想快D有小朋友呢。 ( 望著Bella和Mani跟Raymond的兩位小朋友在玩水，感覺份外美麗，原來，女人散發母性一面時，是非常吸引。 )
Raymond: Dragon，不如俾你實習下。 ( 說著，Raymond就示意他太太帶5歲的仔仔和我玩，可惜我卻有點手忙腳亂。此時，Bella過來幫我。 )
Bella: Haha….. 你唔係鐘意小朋友架咩?做咩咁架? ( 此時我倆其實在水位及膝以上的溫泉池，5歲的小朋友不肯跟我，他一見Bella反而就跑去攬著她在嘆人肉暖枕，噢…….那可是我想做的事呢………. )
我: Haha….. 小姐，佢原本有阿媽同兩位姐姐陪佢玩，忽然抱佢去個男人度，我都唔肯啦。 ( 大家此時也在笑。 )
Bella: 小朋友先唔識分呢。 ( 話雖如此，但當我抱Raymond2歲的囡囡時，卻非常順利，看來異性相吸，是真的呢~~ )
此時Bella和我在逗著兩位小朋友在池裡玩，氣氛是溫馨的，我看見Bella對待小朋友也有一手，而且慈愛一面滿滿，實在是很吸引，此時。
Mani: 喂喂，Bella，我地想去女仔果邊啦(男女分開的溫泉)，妳一唔一齊? ( Mani一問，我和Bella就四目交投，剛難得的溫馨就要溜走了。此時我細細聲說。 )
我: 咁好啦，我都去男人果邊浸啦，今晚食飯時見啦。 ( 我說完，Bella也點頭，就交小朋友給回Raymond夫婦了。 )
