無可替代的----生日夜(2)
我地好快就到目的地，今次有D特別，和Cherry相識的這段日子裡，今次還是我們第一次慶祝，當然要好好令她開心一番。今次帶Cherry的地方有兩處但其實都是同一目的地，由代客泊好車後，我就和Cherry上去100樓了。無錯，我帶她的是天際100，在當時來說，還是非常的新，剛落成了不久。那個可以俯瞰維港夜景的設計，如果可以擁著想親蜜的人一起看日落，是非常浪漫的一回事呢。因為我們早到，看著這樣的天際變化，浮雲在夕陽下的層次份外分明。我去過的地方不算多也不算少，但香港的夜景其實絕對可以打入我的心水十大靚景。我看看錶，和我預約的時間差不多時，我就領著Cherry去下一目的地了。她不遠，就是位於同棟樓層的102樓Tosca Di Angelo，這家意大利餐廳的設計很不錯，不造作，時尚得來脫俗，由於我早做了準備，所以很幸運地可以坐著窗邊位，此時太陽已換了班，由夜景來延續我們今夜的浪漫。
我: 雖然講今晚由我話事，但食野方面，妳想作主嗎?
Cherry: 想啊。 ( Cherry愛吃的本色不改，她是少數我見過食極唔肥既人，所以同Cherry食飯，就是開心，因為她不會食少少就說飽，而是她會和我一起食足整晚，這就是爽。 )
我: 好，咁妳知道我想食咩嗎?
Cherry: 我唔知架~~~~ 我叫咩，你咪食咩囉，今晚唔係我話事咩?
我: Haha…… 好好好，我就睇下今晚我有咩野食~~~~ 但麻煩甜品留番俾我話事唔該。
說實在，我已記不起那晚我們是叫了4、5、6還是多少個Course的晚餐了，只知那晚很盡興，Cherry點了白酒來飲，因為我開車，我只點了Mocktail來濕濕咀。Cherry可能真的很開心了，在這開揚的地方，她居然切完就遞起那件羊扒餵我吃，我先是有點遲疑，但還是迎上吃掉。
我: 妳……. 唔怕? ( 今晚…… 是夢幻的，但舉止上，小心是必然的吧?不是嗎? )
Cherry: 今晚我唔想諗太多，而且，我估我唔會有好多朋友會黎Tosca Di Angelo食飯，所以應該安全。
我: Haha…… 原來係咁，大膽。 ( 說完，我就輕握了Cherry枱上的手，這是我們平常不會明目張膽做的，而Cherry也受落，她在微笑以回應我的百厭。 )
Cherry: 嘿…嘿….. 更大膽既都有。 ( 此時Cherry在枱下，趁沒有人為意下，以小腿在輕撩我雙腳。 )
我: 今晚D野食…….. 唔通有問題?
Cherry: 係咩?你既扒有問題?我既都好好食喎。
我: 我意思係，令妳咁開心同主動呀，以後真係要帶多D妳黎先得。
Cherry: Haha…… 咁無事啦。 ( 講完，Cherry就縮返她的腳了。 )
我: 喂喂，我講笑喳。 ( 之後我倆輕輕的在笑，就繼續用餐了。 )
這家餐廳除了美輪美奐的環境，好味的食材外，她每位客人的座位也是有一定距離，以保持私隱。當我們食到一半時，隔一個座位的一對情侶，此時waiter推來了餐車，那是一款佈滿乾冰的甜品，乾冰造成的霧化作用令那對情侶如置身幻境，接著另一位waitress亦捧來了生日蛋糕，看來今天是那位女士生日，她很開心，她男友接著也拿出了禮物。這份心思對Cherry來說是有點羨慕的。
Cherry: 嘩…… 好開心啊，果個甜品好靚啊，仲有生日蛋糕添，你見到嘛?
我: 吓，妳想食生日蛋糕? ( 我露出了錯愕的表情。 )
Cherry: Haha….. 唔係，我生日都過左啦，有你陪我黎呢度慶祝，我已好開心，好心滿意足了。
我: 哎呀，死火，早知我都準備好D啦。
Cherry: Haha….. 唔使呀，你今晚帶我去天際，再黎呢度食野，我已好開心了，食蛋糕既野，我同你兩個都食唔晒啦，叫左會嘥。 ( 此時看見在旁的情侶剛唱完生日歌，吹蠟燭來，大家就是不認識，也禮貌地拍起手來以示祝福。 )
我: 咁食唔晒……. 都唔怕既。
Cherry: Haha….. 你想整肥我咩。 ( 我知Cherry在為我好落台，想我好過一點而說的呢。此時…….. )
就在此時，waiter再推來了餐車，起初Cherry有點茫然，直到那餐車推到來我倆旁，餐車上除了剛才看見的乾冰甜品外，還有4、5款不同的甜點，還有還有嘛，waitress亦徐徐地拿來寫了Cherry名字的小型蛋糕，一時之間，我倆枱上盡是蛋糕和甜品，加上乾冰在霧化下，氣氛環境就是一流。
我: 唔好意思啊，睇黎妳點都要陪我食晒佢先走得啦。 ( 我此時看見Cherry眼有少少淚光。 )
Cherry: 點解既?
我: 無啊，其實我一早已order左，只係估唔到餐廳送俾果對情侶先喳。
Cherry: 我意思係……. 點解妳對我咁好既?
我: 唔……. 咁妳鐘唔鐘意?
Cherry: 鐘意，就算會肥，我都會盡量食晒佢地。
我: Haha….. 咁又唔使。我見每樣甜品都好吸引，所以除左蛋糕外，我每樣都想同妳一齊試晒佢。
Cherry: 多謝你。
我: Haha….. 快D食啦。妳鐘意我既安排，我就開心了。
當Cherry許願吹蠟燭後，我倆就一起品嚐不同的甜點，此刻我倆就是有點忘情的在互相食不同的甜點，食自己面前的，亦食對方碟上的，那很快樂，亦令人難忘。妳在有好感，喜歡的人面前，總會想令自己加點印象分而盡力討好對方，其實我也會，但我更喜愛表現出真我，如果現在貪咀的我食得花面貓妳也不討厭我，那我會覺得，妳是打從心底不介意和我一起。
我: 試完乾冰果款，再食呢個心太軟啦。一冰一火，好正架，再唔食就溶晒啦。
Cherry: 我已經被你溶晒啦。 ( 說完Cherry坐在我旁在為我抹咀角。 )
我: Haha…… 咁快抹，一陣再污糟點算。
Cherry: 再抹囉。 ( Cherry少有的主動表達情感，那刻我倆也懶理旁人的吻了一下。 )
我: 唔好郁先。 ( 我從我的背包掏出了小盒子，那是一條手鏈，它不是什麼昂貴的名牌手鏈，純粹是我的一點心意。此時我為Cherry戴上。 )
Cherry: 好靚啊。
我: 其實佢唔係咩貴野黎架，但裡面就有少少意思既，當中的水晶石係代表妳星座，可以改善妳人際關係呢。 ( Cherry的工作，人際融和非常緊要呢。 )
Cherry: Haha…… 多謝你，乜你覺得我需要改善咩?
我: 係啊，我想妳對我好D嘛。 ( 我笑著說。 )
Chery: 乜我對你唔好咩? ( Cherry此時仰前靠近著我說。 )
我: 唔……. 可以再好D就好嘞~~~~ Haha….. ( 說完，Cherry就再吻了我一下。 )
當埋單走時，我倆也食得飽飽的，在ICC某位置等代客開車來時，Cherry主動的伸手挽著我手臂靠過來。
Cherry: 先生，請問下一個行程係咩? ( Cherry可能實在太開心了，她飲了不止一杯酒，現在的她，臉頰有些粉，唇比原先更紅，那有點點迷惑著我。 )
我: 其實雖然而家仲早，但聽日要返工喎，妳要唔要我開車車妳返去先?
Cherry: 我呢…… 條裙同鞋都係新架。 ( Cherry靠近我耳邊細說。 )
我: Haha…… 我知我知，我頭先係車度咪講左囉，妳係唔係有少少醉啊。
Cherry: 唔係呀……… 我係想講，我全身裡裡外外既衣著都係新架，你想唔想睇下啊……… 係你好鐘意既款式黎架……….. ( 這句話實在太過份，就連我自己都唔知自己鐘意女生什麼款式的內衣褲，Cherry居然知??那麼下一站必然是…… )
我: 咁我今回真係要睇真的先得喇。 ( 我在笑著說，此時司機也來了，我倆在開懷的笑了笑後，就開車飛快的回我家了。 )
