話，始終要講嘅，阿星同Grace 講咗咩呢？
那些年，星星同學會 第111話
「真係唔知喎。」阿星將握住Grace 柔軟小手嘅手鬆開，搲搲個頭嚟答。
「咩呀？你唔舒服咩？」Grace即刻將個頭由原本枕住喺阿星心口度抬高，碌大雙眼仔望住阿星。
「唔……………點講好呢…………嗱，你瞓返低先…………」一路講一路將Grace個抬高咗嘅頭用左手慢慢㩒返低。Grace都好柔順咁任得阿星將佢個頭按返低，枕返嚟阿星心口度，但係雙眼仍然望實阿星眼都唔眨。
「即係咁呀，」阿星嘅左手一路慢慢輕輕咁撫摸Grace短短而柔滑嘅頭髮，一路答：「頭先呢，太衝忙啦，都真係分唔出究竟係好舒服定係普通舒服………………」
Grace一路好專心咁樣望住阿星，一路聽阿星講嘢，然後阿星繼續：「呢啲嘢真係好難講，今次完全冇辦法分辨，咁樣講對你又真係唔係咁公平，除非…………………」
「除非點呀？」Grace都好關心佢係唔係一個好女仔，亦都好緊張佢做得夠唔夠好，一路聽阿星講，一路問。
「除非……………」
「點姐？你講啦！」
「除非試多一次，等阿星再試清楚啲先，再同你講阿星覺得點啦。」阿星眨眨眼。
「…………」
Grace望住阿星，靜咗一陣，然後打咗阿星心口一下，話：「依～～～死人鹹濕佬！」呢一下打到阿星非常之痕癢，簡直係痕到要即刻捉住Grace隻手，再攬實啲佢等佢走唔甩落唔到床。
待續😬
