當晚小弟再遇沉船妹。
晚飯後,老人家先行上房休息。同行有位同輩嘅男性朋友(以下簡稱「梁炳」
)建議去酒吧「望」吓。我本身唔飲酒嘅,但唔想掃興,去咗。
好在去咗。
船上有酒吧數間。每間嘅環境都唔同,menu嘅選擇亦唔一樣,可以各適其式。酒方面,有啲郵輪係完全唔俾BYO上船嘅。小弟搭嗰架似乎比較寬鬆,每人可以帶兩枝(當時啦,而家就唔知)。呢樣嘢留意番。唔係嘅話,辛苦帶幾支私人珍藏上去被充公咗就唔抵。
我揀咗一間jazz bar,因為環境好似冇咁雜。而且想聽下live music。
我點咗杯當地牌子嘅無酒精飲品。梁炳點咗...我唔記得咗,但應該會係烈酒。
兩條友摸住酒杯底喺度吹水。講吓細個時嘅嘢,講吓時事,又講吓啲無無謂謂嘅立雜嘢。麻甩佬總有無盡嘅話題。
現場聽音樂確係一種享受,即使只係酒吧音樂。
酒吧內環境都幾暗。光與影交錯,相互掩映,情調非常適合調情,如果身邊係一位異性嘅travel buddy。上次返香港曾經睇過某眼鏡舖一個電視廣告:「睇嘢最清晰嘅一刻,往往係睇到與睇唔到之間果下。唉,好彩嗰次冇走漏眼,唔係就走寶喇喂!🤓」(大約嘅意思-唔知有冇記錯,抑或又係我自己幻想出嚟
)個廣告對於大部份人嚟講係廢噏,但對於先天性發雞盲嘅小弟則...絕對適用。
我眼角望到坐喺鋼琴後面嗰條友好似係...沉船妹!😳😳😳我好可能記錯,但印象之中,嗰一刻佢係彈緊Misty。一首jazz嘅名曲。所以從此,呢首曲對我嘅意義比較特別。
佢依然一頭金髮,但換咗素衫。
初時仲以為彈琴嗰個會係個阿伯嚟㖭。