返到屋企三點幾，冲埋涼成四點先瞓，攰得滯未校鬧鐘即刻瞓着，仆街紥醒已經八點，牙未刷面未洗，放棄早餐第一時間撲返公司，叫做𧫴謹唔使遲到，門口阿姐有啲異樣，望住我笑下唔出聲，入到房靚妹一見到我笑到咔咔聲，佢話：林仔你係想唞涼，定係想話俾人知你大支嘢咁呀？哈哈。弊傢火原來冇拉褲／都唔知，仆街趕得滯大意咗，怪唔之得正話地鐵久唔久有人陰陰咀笑，唉衰咗都唔知，死靚妹玩我話：林仔哥原來你咁大支嘢㗎，攞出嚟睇下。玩9我！玩番妳先，我話：哎呀你玩慣大支嘢，我點敢同你條仔比呀，獻醜不如藏拙。靚妹接招話：你又知我條仔大支嘢，不如你攞出嚟等我比較下。死靚妹牙尖咀利，我投降喇，我話：唔好玩喇晏喇，做嘢緊要。靚妹乘勝追擊，語帶相關話：林仔，唔怪之得你冇女埋身啦，玩兩玩就冇料到，係女都唔滿意啦，笑L死。唉又再一次俾靚妹KO，超級冇癮，靚妹帶住勝利姿態話：我有兩日未飲咖啡，林仔你幫我落去買杯Mocha, 你請㗎。我懷疑自己係咪變咗靚妹下屬。

語音未落，老陳喺房走出嚟話：林仔林仔幫我個忙，陣間有份文件幫我攞去俾客簽名，份嘢比較趕，我怕速遞嚟唔切。我話冇所謂，仲好乘機可以出街唞下，唔使俾靚妹指嚟指去，靚妹聽見叻唔切，佢話：點解次次都係俾林仔出街，我都可以吖，順便俾我識下個客都好。老陳笑笑口話：哦咁呀！林仔有人自動請纓喎，個客係瑞記李生，你點睇呀？我配合話：瑞記？咁咪即係元朗八鄉村屋貨倉嗰間！好鬼遠水路個喎。靚妹聽見咁遠開始有少少唔自在，我再加多句話：仲有佢哋養咗兩隻大狼狗，都幾得人驚，個老細李生又鬼死咁咸濕，見到靚女都模身摸勢。靚妹聽完面都青埋，搵借口退牌話：哎呀真係唔好意思，我唔記得咗有份文件好趕，要今日之內搞掂，可能冇時間，林仔不如俾番你去啦。跟住又話：咖啡我自己去買得㗎喇，唔該晒你呀？聽完靚妹做完場戲，我同老陳相對而笑。

老陳好人，佢交帶：今日路途遙遠，林仔你嚟唔切嘅話，喺元朗食埋晏先返，總之三點前一定要返到。似乎啲人成日覺得元朗山卡啦咁遠，其實依家有晒鐵路，一個鐘頭內一定到，不過要轉小巴另計，有咗上方寶劍咁就慢慢來，首先落茶記整番個靚早餐先，然後再起程，坐地鐵再轉綠Van, 去到八鄉已經係十二點，人未到瑞記入面兩隻狼狗已經吠到抽筋，有人撳住都嚇餐死，靚妹嚟到實聽腳軟，貨倉阿叔問：乜咁遲先到，老細去咗食晏，要點半鐘先返。大鑊！三點前要返到公司，即係點！嗱嗱聲問佢邊度食晏，結果出番元朗市區大記茶樓刮人，終於搵到瑞記李生，表明來意順利簽埋份文件，功德圓滿到我食晏嘞，嘩元朗市區好旺人山人海，搵到間車仔麵檔食車仔麵，返回公司都唔早成兩點半，頻撲完琴晚又唔夠瞓攰到死，向老陳請病假話唔舒服想早啲走，老陳話冇問題不過靚妹條氣唔順，我識做主動落星記請佢飲Mocha , 阿妹條氣順番啲冇乘機搞事。

以為好早返到屋企已經五點，攰得滯攤喺梳化即刻瞓着，唔知過咗幾耐，俾個電話嘈醒咗，又係秋仔佢話：衰仔打咗幾次俾你做咩唔接呀？喂有啲嘢想搵你幫幫手。我話：琴晚俾你拖住冇覺好瞓呀大佬，今日又做咗成日嘢攰到扒街，仲想搵我幫手做啲咩！飯都未食阿哥。秋仔一反常態話：咁啱嘞我都未食，呢餐等我請，為免你舟車勞頓，我過嚟就喺你哋樓下榮記茶餐廳入面慢慢傾。咁好死親自過嚟請我食飯？都唔慌好嘢，咁難得孤寒鐸肯請，食咗先算啦，橫掂肚餓早啲落去食住等，有人請唔貴唔嗌，叫咗個西蘭花炒新鮮班球，加錢改青檸特飲，再加老火湯，再加土匪雞翼，total 舊五水，秋仔不失孤寒本色, 見枱面成堆嘢忍唔住話：唔使咁搏係嘛！食唔食得晒呀？條友跟住睇餐牌，睇完一輪你估佢叫咩？淨係叫咗一客牛油多士加凍茶，我問：唔係嘛！油多做晚餐？餓死未天光啦，秋仔狡辯話：冇，我啱啱食咗啲嘢，唔肚餓。點知我問佢要唔要雞翼，佢就餓狗搶屎咁搶住食。