引用:
原帖由 一夜狂歡 於 2024-8-27 18:19 發表
老陳繼續話:教精你啦細佬,應付個靚妹千祁唔好俾佢牽住鼻子走,要用個忍字,每次挑你機嗰陣都要忍住,盡量唔好出聲,由得佢亂咁吹,一條鎖匙拍唔響嘅,講得兩講你唔啋佢,佢冇癮就自然收聲架啦,倒轉頭你仲要好聲好氣同佢講嘢,搞亂佢思維 ...
嗱嗱聲鼠落街,帶住緊張心情打俾張太助手陳小姐,搞掂借錢單嘢先再去買咖啡,電話接通我話:唔該我想搵陳小姐。對方語氣麻麻話:我地呢啲度好多位陳小姐嗰喎,你搵邊位先啱呀?我話:我係想搵張太嗰位助手陳小姐嘅。對方冇任何回應將電話轉咗出去,等咗成分鐘先有把女聲:Esther Chan, 邊位?我話:陳小姐呵,你好.,我係琴日問張太借錢嗰位林生呀。陳小姐語氣正經話:林生係嘛!你好!張太交帶落話你借錢冇問題,不過再三叮囑話筆錢唔係用嚟還賭債嘅,否則後果自負。好認真咁喎,我話:你叫張太放心,一定唔係。陳小姐再話:唔係就最好啦,至於息口方面你一定要聽清楚,睇吓係咪接受到。聽落會好嗱脷咁,點計先?陳小姐話:頭一個月八千,下個月減半四千,第三個月再減半兩千,第四個月一千,以四個月為限,還唔到下個月就重新再計過。聽完真係暈咁滯,辣成咁四個月皮五嘢,未計本都大劑啦!