唔經唔覺又到星期一，更新下先得～
那些年，星星同學會 第95話
查實大家知唔知Grace係咩星座嘅呢？佢係白羊座，行動力強，我行我素，活潑開朗，係一個好爽直嘅女仔。以Grace嘅行動力，阿星真係冇辦法唔寫個服字俾佢。搬上阿星房嘅一大袋用黑色旅行袋包住又大包又重嘅，原來都係啲日常用品，例如洗頭水，洗面泡，護膚品諸如此類。然後仲有一大袋，喺阿星正準備打開而俾Grace發現咗之後一手搶咗去，最後甩咗手跌晒落地，由袋度散落一地。地上面嘅，係Grace嘅幾件胸圍同底褲，大部份都係白色同粉紅色，趁返Grace係一個18歲嘅女仔嘅感覺，而當中，阿星零舍發現一套黑色厘士套裝，睇嚟應該係全新未著過，呢一套黑色套裝，同其他白色粉紅色嘅胸圍底褲有啲格格不入，簡直可以話係同Grace完全唔夾，不過唔知佢著上身會點呢？
阿星望下地上面啲胸圍底褲，又抬頭同Grace互望，再望下啲胸圍底褲，又再望下Grace，Grace即刻踎低去遮住啲胸圍底褲，然後大聲又急又尷尬咁話：「唔準望呀！死鹹濕佬！」
咁你唔攞嚟阿星咪唔會望到囉。你攞嚟呢度做咩呢？Grace吞吞吐吐咁，阿星問咗好耐又氹又話佢先問到，原來佢想喺暑假呢段時間喺阿星度住，仲要頭先已經喺樓下同阿星老豆大媽細媽地講哂攞哂permit咁，而大家又唔知點解咁鬼中意佢，即刻應承俾佢喺度住咁順攤。阿星望住Grace，見佢咁積極介入阿星嘅生活入面，真係唔知講咩好。
夜晚老豆捉咗阿星去花園度飲啤酒，平時好日都唔會請阿星飲啤酒，今晚唔知發生咩事，可能都係講阿星惹咗個女仔嚟，叫阿星交代下咁啩？
「阿星呀，Grace睇落都好女仔嚟嘅，而且佢一嚟到即刻行世伯伯母政策，又靚女又識大體，你咪同佢拍下拖囉，況且佢一嚟就即刻交租………………」老豆一路繼續講，不過阿星聽到佢話Grace交租換嚟佢準許Grace喺度住，阿星已經再聽唔入耳。唔怪之得大家對佢都咁好咁客氣又咁接納佢，原來收咗錢！
「唔好話老豆唔教你啦，人哋肯為你使錢又咁抵得諗，呢啲女仔真係世間難求，同佢拍下散拖冇所謂，記得收手唔好搞大人哋個肚，好似你老豆我咁，要負責㗎喎……………」阿星知吖，你所講嘅負責，咪就係搞大咗人個肚之後叫埋人返嚟住，幾個女人喺屋企度搞到家嘈屋閉囉。阿星先唔會咁做，人哋係好女仔阿星依家知啦，阿星唔會好似你咁射咗入去就話負責任，搞到啲人一個二個你憎我我憎你咁，戴返個袋起碼可以避免咗好多不必要嘅意外先啦。
阿星冇再理佢，嗱嗱聲飲哂罐平時飲極都冇辦法飲得咁快嘅啤酒，唔出聲就行返上房。
待續😬
