星期二，放完假，更新下先～
那些年，星星同學會 第94話
Grace一上床就整啲好嘢嚟叫阿星起身，又真係幾舒服嘅。阿星最後都冇反抗，擰轉身都攬返住佢，禮尚往來吖嘛，唔係嘅咩。攬咗一陣，Grace同阿星講，叫阿星幫佢落樓下攞嘢。攞咩咁緊要呀？要阿星起身？阿星都係唔受得人求，起身同佢落樓下。搞乜？做咩攞咁大袋嘢嚟？頭先你點嚟㗎？
「頭先我坐minicab嚟嘅囉。」Grace施施然咁答。
「喺地鐵站果邊叫車？」查實阿星地喺呢個區都叫做係好多西人識，尤其是地鐵站出面間minicab舖，啲司機同個call台叔叔都識哂阿星全家，仲成日同阿星地講笑話阿星屋企應該住咗有1000人，每間房瞓12個人咁上下。當然啦，大家吹水啫，何必認真呢？
Grace碌大對眼仔望住阿星，然後話：「冇呀，我喺屋企叫車過嚟嫁，乜你呢邊地鐵站度有minicab嘅咩？」
唔係啩？由Man屋企揸車過嚟，大大話話都要揸22英里，以minicab平均收£1.5英鎊1英里嚟計，由Man屋企嚟到阿星度足足要用£33英鎊，阿星打工做餐館一晚都係£20英鎊，仲要做到隻嘢咁，Grace搭一程車嚟阿星度就已經用咗差唔多阿星1日半嘅人工，真係豪。
阿星望住Grace，真係冇嘢好講。Grace一路催阿星快啲幫佢搬袋嘢上房。包嘢咁死重嘅，咩嚟㗎？
「你搬上去我話你知啦。」一路講一路喺阿星背後推阿星上樓。
待續😬
