收工流流，第91話～
Abby XCI
麻油味Abby嘅屋企，就好似一般榴槤國嘅有錢人一樣，住喺一間獨立大屋度，屋企門前泊咗三架車，兩架名貴機械國房車，一架金屬藍色嘅細小榴槤國國産小車。阿星知道呢架藍色嘅車仔係麻油味Abby嘅，早幾日見過啦。麻油味Abby有時好低調，唔多表露自己嘅有錢人身份，有時又好豪華咁去做一啲嘢去令到事情向佢期待嘅方向發展，阿星唔奇怪，因為阿星大概知道係咩一回事。
開門嘅，當然係麻油味Abby啦，人地開埋電閘泊埋阿星架車入去都仲有位剩。阿星落車四圍望，麻油味Abby走埋嚟拖住阿星嘅手一路行到去大門口鐵閘度，雖然阿星都叫做見過下大場面，不過今次真係不得鳥，阿星聽到屋入面人聲鼎沸，好似好多人，阿麻油味Abby你究竟想阿星識幾多屋企人呢？門口嘅鐵閘係一種古雅嘅暗銅色金屬，配以花同蝴蝶之類嘅裝飾。深啡色櫻桃木製嘅雙大門打開，就好似榴槤國入面所有嘅家庭一樣，通風，涼爽。
接近兩千呎嘅大廳，最顯眼嘅就係一樣用櫻桃木製嘅超過八呎高嘅酒櫃，一眼就睇到放咗好多唔同種類嘅酒精類飲品，間屋嘅主人非常中意享受酒精，但係唔係牛飲，係淺嚐即止嘅品酒。點解咁講？因為酒櫃打理整齊，睇得出酒櫃主人好愛惜呢個酒櫃，唔會輕易俾人打理，只會係自己打掃咁乾淨。
大廳入面只有一個男人，個男人坐喺梳化度睇電視，一路睇，一路食煙。食煙啱阿星呀，整支嚟吖師兄。麻油味Abby行埋去個男人度，“烏”低身同個男人講咗幾句，個男人整熄咗支煙，起身擰轉頭行埋嚟同阿星握手，大家估得冇錯，呢個男人，就係魚生銀行嘅總裁，阿星公司嘅財務支援，麻油味Abby嘅父親大人。咁阿星係咪要跟阿麻油味Abby一樣，都叫你一聲父親大人呢？
正所謂：
富人果然好派頭
櫻花行事屬低調
宅內人聲顯沸騰
酒櫃精緻不暇給
麻子引見男主人
金翅忐忑不安鳥
（待續）😬
[ 本帖最後由 star_platina 於 2021-8-17 21:51 編輯 ]
