又到收工嘅第41話~
Abby XXXXI
最後阿星送咗麻油味Abby上車,等佢安心揸車返屋企。喺樓下,阿星踢住對人字拖同麻油味Abby行去攞車,行到去架車前面,麻油味Abby擰轉身望住阿星。阿星叫佢早啲返屋企冲個涼瞓啦,阿星都要返去瞓,聽日仲要返工。麻油味Abby企咗喺車門前面望住阿星,阿星又望住佢,硬係好似有啲嘢仲未做。
「頭先呢,點解你唔拖埋我上床?」麻油味Abby問。查實阿星係鹹濕嘅,而且年輕貌美身材好如麻油味Abby咁,阿星真係唔區㗎,不過頭先要照顧Miss Tang先,都係唔啦。阿星哄埋啲麻油味Abby度,令到佢要抬高頭望住阿星:「你估下?」阿星笑,笑得不懷好意。麻油味Abby抬高頭望住阿星,阿星都望住佢,不過其實距離近到咁,阿星都唔係好望到佢係咩樣,就係咁,大家望住大家,最後終於兩個咀四片咀唇貼埋一齊。
你問究竟係邊個錫落去先?呢個問題問得好,阿星要耷低頭望住阿麻油味Abby,由於阿星個頭嘅重量關係,最後支撐唔到就向下跌,喺冇辦法亦都控制唔到嘅情況下,就錫咗落去喇,咁係咪解決咗你嘅好奇呢?呢次純粹只係友誼接觸,因為當兩個咀四片咀唇分開嘅時候,麻油味Abby同阿星講:「你個咀唇好乾,爆哂冊喎。」咁點呢?然後麻油味Abby喺手袋度攞咗支嘢出嚟,打開蓋,用嚟搽自己嘅咀唇。哦,原來係支潤唇膏。麻油味Abby搽完之後,望住阿星話:「你要搽冇?」阿星望下佢,咬住自己下唇,然後話:「阿星唔慣搽咁厚喎,咁點算好?」麻油味Abby見阿星咬下唇,佢都咬下唇,望住阿星然後話:「係囉,咁點算好?」係囉係囉,咁點算好呢?
正所謂:
經理麻子懷心事
含情默然目交投
紅唇四片皆相印
道出英雄乾如柴
櫻花欲來潤一番
欲知後事如何,請看下回分解
(待續)😬
[ 本帖最後由 star_platina 於 2021-7-26 18:06 編輯 ]