星期五啦，大家努力，返埋今日就放假啦。第18話～
Abby XVIII
呢啲說話，係有一個固定嘅模式嘅，喺表層結構（surface structure）入面，麻油味Abby係讚緊阿星啲朋友，你只要答佢：「Well，係呀，佢哋好玩得㗎。」就算係應付咗件事。但係深層結構（deep structure）入面講緊嘅，係另外一回事。究竟阿麻油味Abby呢句說話嘅深層結構係咩呢？大家又知唔知其實佢問緊咩呢？佢就係想知道阿星嘅女伴，究竟同阿星有啲咩關係。呢個問題，可能大家都會覺得，阿星你係咪諗多咗，點解佢咁問，會係咁嘅意思？阿星呢度簡單解釋下點樣拆解表層結構同深層結構嘅語法模式先。
所謂嘅表層結構，就係照句子嘅字面解釋，對方講咩，你解釋啲咩，非常之容易，係咪？而深層結構呢，就係根據當時情況，發問時間，對方態度，語句形式等等嚟判斷對方話語入面嘅背後意思。你會發現，原來對方係講緊一件事，但係其實佢講緊另一件事，好好玩，好好笑。拆解對方話語入面嘅深層結構，就好似讀心術一樣，藉由與對方對話而讀取對方冇講，但係好想講俾你知嘅潛藏訊息；又或者對方極力隱藏，但係說漏咀嘅資訊。所謂嘅讀心術，並唔係真係咁神奇，知道對方諗緊乜，而係將對方嘅話語內容，表達時嘅聲線語調，表情動作手勢等等加以分析所得出嘅結果。你問有冇咁準確？阿星會話你知，接近80%嘅準繩度，剩低嘅20%就係受到經驗，觀察力，自己嘅先入為主之類嘅主觀因素影響。
麻油味Abby望住阿星欲言又止，阿星就知道佢喺頭先阿星嘅答話入面揾唔到佢所想知嘅答案，但係再問，就會表露出佢對阿星嘅好奇心，喺第二次見面就表示對對方好奇，對好多人嚟講係好尷尬嘅事，尤其是係女仔，任何地方嘅女仔大都有一個習性，就係喺關係未確定之前盡量保持被動嘅態度，縱使佢係對呢位男性已經有好感。阿星明白，亦都理解。
等阿麻油味Abby去完厠所出嚟，阿星同佢一齊穿過擠擁嘅人群，人又真係多咗啲嘅，阿麻油味Abby以大約只有155cm嘅身高要喺一大班捧Gina場嘅男人群之中穿梭，又真係困難啲。等阿星做下好人，捉住你隻手行，幫你過去先。
正所謂：
提問技巧深似海
麻子果真不甘心
來探情史之全豹
欲言又止免穿崩
風度牽手梭人群
欲知後事如何，請看下回分解
（待續）😬
[ 本帖最後由 star_platina 於 2021-7-16 08:35 編輯 ]
