食晏啦，又半日啦，第16話～

Abby XVI

阿星帶咗麻油味Abby去阿星屋企樓下個停車場度泊好車，再同佢一齊行去酒吧度。似乎麻油味Abby對阿星住嘅地區都幾好奇，一路跟住阿星行，一路左望右望，睇下啲茶檔，一時又問阿星呢檔係賣乜，一時又擰轉頭問阿星住喺邊。阿星指指馬路對面剛才阿星同佢行過嚟嘅大厦，話俾佢知阿星住19樓，佢竟然追問19樓邊個單位。查實阿星唔多想話佢知，求其指下樓上一個露台隨便答佢。但係你永遠都估唔到，一個人係可以打爛砂盤問到篤嘅，阿麻油味Abby追問阿星係邊個露台，阿星望住佢，佢用手捉住阿星隻摺袖，搖咗兩下，然後望住阿星話：「講俾我知啦？」要耍呢類問題而又唔令到對方難受，都需要少少技巧嘅，正喺阿星準備用呢啲技巧嘅時候，阿星個爛舊電話再次響起，應該係震動先啱。呢個電話救咗阿星，因為阿星耍人嘅技巧唔太耍家。咩呢？阿星係個老實人，唔太識耍人嘅囉。

電話係Miss Tang打喺嘅，問阿星仲有幾耐，阿星即刻同佢講阿星只係5分鐘嘅腳程，佢叫阿星快啲嚟，Gina同埋另一個人都等緊阿星。另一個人？乜水？Miss Tang話：「你快啲過嚟咪知囉。」咁神秘？呢個時候Gina喺電話嘅另一邊大嗌：「星星你快啲過嚟啦，我等咗你好耐啦，Miss Tang等咗你好耐，神秘嘉賓都等咗好耐啦！」邊～～～個神秘嘉賓咁神秘，你講得咁興奮呢？阿星再問多兩句，Gina即刻收咗線，電話嘅另一邊非常之嘈吵，除咗勉強聽到Miss Tang同Gina講嘢之外，根本只係得背後嘅雜聲。

阿星望下麻油味Abby，麻油味Abby又望住阿星，不過阿星真係諗唔到神秘嘉賓係邊個，就同阿麻油味Abby話一齊行過去酒吧睇下究竟邊個係神秘嘉賓啦。頭先喺電話另一邊傳嚟嘅Miss Tang同Gina嘅笑聲同叫聲，令到麻油味Abby非常之好奇，究竟阿星啲朋友係咩人，阿星同佢笑笑，話你一陣去到咪知囉。麻油味Abby見到阿星笑得不懷好意，竟然仲更加大踏步向前走，仲要捉住阿星嘅衫袖拉住阿星行添。行下行下，兩個人就行到去Gina嘅酒吧門口，嘈雜嘅音響，擠擁嘅人群，頸爆嘅音樂，麻油味Abby企喺門口已經開始跳舞。阿星拉一拉佢，問佢嚟過未，佢搖搖頭笑，話未嚟過呢啲地方。阿星拖住麻油味Abby隻小手，拖住佢穿過擠擁嘅人群，去到打碟嘅位置，見到Gina喺度打緊碟，就指指Gina嘅位置，同麻油味Abby講：「打碟個女仔係阿星嘅朋友。」然後再拖住佢行到去Gina留俾阿星地嘅貴賓房度。

呵，原來除咗Miss Tang之外嘅神秘嘉賓，係佢。

正所謂：

櫻花滿腦求知欲
打爛沙盤問到篤
同鄉來電賣關字
麻油煎妹初相識
神祕嘉賓藏背後

欲知後事如何，請看下回分解
（待續）😬

[ 本帖最後由 star_platina 於 2021-7-15 14:01 編輯 ]