又食晏，同阿麻油味Abby一齊食。第7話～
Abby VII
櫻花女專心一致
非靠父蔭有心思
麻油味Abby一早已經喺星巴X坐咗喺度等緊阿星，攞出咗佢嘅手提電腦喺度做緊嘢，並冇留意阿星已經行到佢面前。專注做嘢嘅女人，同專注做嘢嘅男人一樣，專注嘅表情一樣咁好睇，一樣咁吸引。阿星遠遠已經睇到麻油味Abby喺度專心工作，所以亦都冇騷擾佢，就咁坐佢隔離睇佢做嘢。一個人專心，可以專心到咩地步呢？今次阿星真係大開眼界。麻油味Abby有足足15分鐘冇理會過周邊嘅環境，包括坐喺佢隔離嘅阿星在內，佢專注到只係望住部腦個芒足足15分鐘有多，而冇理會過有人坐咗喺佢嘅身邊，你話呢啲人係咪好似啲AV入面嘅情節，唔知道周圍發生緊咩事呢？
阿星又冇咁大膽，喺咖啡店入面搞搞震嘅，只係乘機望住麻油味Abby近距離欣賞下一個年輕貌美專注工作嘅女仔啫。大家都知道，阿星係一個叔叔，一個叔叔喺榴槤之國呢啲禮教咁嚴嘅國家度咁樣望女仔，俾比較肉酸嘅，不過查實喺任何地方好似阿星咁樣望女仔法其實都肉肉酸酸㗎喇，係阿星自己唔覺咁解啫。不過冇所謂啦，咀裡說不，身體卻很誠實嘅嘢阿星係唔會做嘅，要做，就做個咀裡說得，身體都得嘅人。做人要心口一致（congruence），唔係個心口有粒痣呀，係心中所想同口中所講要一致；咁樣就會思考便捷好多，因為要心諗一套口講另一套會佔用大腦好多RAM，令到思考變得緩慢，所以心口一致亦都係邁向卓越嘅其中一步，如果可以嘅話，阿星會話，想要邁向卓越，第一步就係訓練自己心口一致咁樣思考。
阿星一路望住麻油味Abby，一路欣賞佢年輕美麗嘅外貌，一路喺度打量佢呢一身OL嘅打扮：一個金絲四方框眼鏡，淺灰色嘅薄西裝褸除咗出嚟接好咗放喺公事包嘅上面，一件薄薄嘅淺黃色恤衫，鬆鬆咁包住佢嬌小但係火辣嘅身體，淺灰色套裝短裙之下露出咗一雙纖瘦嘅長腿，只係著住一對簡單嘅黑色皮鞋。麻油味Abby坐得好直咁喺部腦度打緊文件，俾人一種樸素之中帶有威嚴嘅感覺，做到副總裁嘅位置，或者多少都有靠父蔭，但係真材實料睇落都唔少。阿星望住麻油味Abby都應該有15分鐘左右，然後佢望望手錶，再望望咖啡店門口嘅方向，再四圍望，然後最後先望到阿星度。阿星對住佢傻笑，用自以為最殺死人嘅笑容面對麻油味Abby，佢一望到阿星，第一個反應係望過咗阿星，再四圍望多一個圈，然後再望番阿星，跟住先俾反應阿星，同阿星笑。小姐，你都幾多嘢諗喎。
（待續）😬
[ 本帖最後由 star_platina 於 2021-7-12 12:55 編輯 ]
