應師兄要求,第4話~
Abby IV
高度敏感多內向
陌生女聲惹遐想
阿星個電話好少開聲嘅,最多係震動模式嘅啫。平時有人揾阿星都要等阿星好彩睇到有電話,或者miss call之後打番電話俾佢。唔係因為阿星大牌,係因為阿星其實係一個HSP(high sensitivity person),即係高敏感族群。你問阿星咩係高敏感族群?咪就係個人好敏感囉。呢類人通常好容易俾人嚇親,瞓覺有人喺身邊叫,就算幾細聲,都會嚇親,而且對於人多,燈光變幻嘅地方之類亦都唔擅長應付。高敏感族群大多數都係內向嘅人,而阿星,都係一個內向嘅人,咩呢?內向嘅人唔可以多嘢講嘅?內向嘅人唔可以鹹濕嘅?
阿星個電話喺阿星返到屋企攤咗喺梳化度嘅時候響起,嚴格嚟講係震動先啱。打嚟嘅係一個阿星唔識嘅電話號碼,呢啲時候係好多人收工嘅時候,亦都係好多電話銷售努力工作嘅時候,阿星通常都會接電話,然後好有禮貌咁打發佢哋走。如果喺香港就容易好多,只要講一句hello(阿星特有嘅磁性聲線加上標準英國倫敦鄉下佬咬字同發音“霞撈”)通常就會非常之有效地令到打電話嚟嘅人嘢都唔講就自動收線,又或者陪阿星講番句“疏尼,汪冧爸”,有時咁好彩遇到個努力問阿星“哈佬,嘟於汪吐波撈蚊尼?”嘅時候,阿星仍然會用英文好有禮貌咁拒絕嘅。話哂人地咁有勇氣的起心肝冒住俾人冚線都打電話嚟問,俾番啲禮貌好嘅。
但係喺榴槤國個個都識講英文就難啲,阿星唯有接電話,聽下對方想賣咩,然後再禮貌地拒絕啦。呢啲情況其實阿星都遇唔少,所以都應付自如,簡直可以話合埋眼都識得點答。喺阿星“霞撈”之後,電話嘅另一邊傳嚟一把陌生嘅女仔聲:「你係咪星先生呀?」星先生?叫得咁生保嘅,一定唔會係阿星嘅熟朋友啦,而且咁有禮貌嘅叫法,阿星所識嘅人入面除咗第一次見嘅人之外,其他人係唔會咁叫阿星嘅。唏,又唔好話阿星搞到啲人冇大冇細,不過阿星係好容易令人覺得熟絡咁囉,親和感嘛,阿星最耍家,所以啲人同阿星好快就熟。咁究竟呢個係邊個呢?
(待續)😬
[ 本帖最後由 star_platina 於 2021-7-11 10:30 編輯 ]