第2話~
Abby II
怒拍桌子奪門出
靠父蔭初識副總
阿星望住呢位機械之國飛嚟同阿星地傾生意嘅人,然後開口:「查實你知唔知道榴槤之國嘅人均耗電量係幾多呢?」合約經理望住阿星,好明顯唔知道阿星想講乜。果兩位銷售經理叫做同阿星相熟,聽到阿星咁問,都由坐直嘅姿勢慢慢捱向椅背。阿星見合約經理唔出聲,知道第一句說話已經問中咗佢嘅弱點,既然係咁,冇理由唔大啖咬你放血㗎?
喺合約經理唔知點答阿星好嘅時候,阿星即刻再出第二招:「好,唔問你咁難嘅問題,就問你自己國家:你係機械之國嘅人,機械之國嘅人均耗電量你應該知道啩?」合約經理再一次O咗咀,望住阿星唔知點答。阿星呢個時候,喺Cassy嘅手上接過一本書,呢本書係阿星地之前精心炮製嘅。阿星打開其中一頁,上面有一個圖表,圖表係棒形圖,每一支棒代表一個國家,而棒嘅末端有一組數目字,代表世界各地唔同嘅國家嘅人均耗電量。阿星手指指住一條非常之長嘅棒,同合約經環講:「呢個係機械之國嘅人均耗電量,而呢個,就係榴槤之國嘅人均耗電量。」然後再指去棒型圖底下接近由尾數上嚟第四第五左右嘅位置,講完之後將本印刷品推到去合約經理面前。阿星望咗合約經理,兩個銷售經理同埋個工程司一圈,再同合約經理講:「榴槤之國需要盡早有佢哋嘅新能源生產,唔似得機械之國企喺好多國家嘅前面。大家都係做能源生意,你連呢啲咁小嘅人均耗電量嘅資料都唔知,走嚟同阿星浪費時間,你返去頭像國你哋嘅分公司揾艾力四先生問下阿星同佢係咩關係,你唔想同阿星做生意冇所謂,雪山國同頭像國你哋嘅競爭對手絕對想同阿星做,你浪費咗阿星嘅時間,仲搞到你公司損失咗一單生意,你哋自己返去解釋啦!唔送!」然後大力拍到枱面所有嘅杯都震到有水彈出嚟。阿星起身離開會議室,由得Cassy,Elly同埋魚生國銀行嘅人喺房入面,返咗自己房度喇。
15分鐘之後,Cassy,Elly同埋項目經理入嚟揾阿星。Cassy皺起眉同阿星講:「你咁惡嘅?唔似你平時喎。」阿星望下Cassy同Elly問:「點呀,佢哋點講?」項目經理搶先開聲:「你死啦,今次買唔成,我地單生意冇硬啦!」阿星冇理會項目經理,再次開聲問Cassy同Elly:「講下佢哋嘅反應?」Cassy縮縮膊,話:「冇呀,佢哋問我點算,都算係我舊同事,我同佢哋講叫佢哋打番總公司問下邊個係艾力四先生,然後再問下點做,佢哋咪哦哦哦囉。」阿星聽完之後笑咗出嚟,然後同Cassy話:「得啦,聽日等聽好消息啦!」Elly望住阿星,然後用手指指出面會議房話:「銀行果邊想同你傾多兩句,你方便過去嗎?」阿星聽到,即刻起身同佢哋一齊行返去會議室。
會議室入面,只剩低魚生國銀行嘅正副總裁同兩個助手。呢一刻阿星先望清楚,原來果位副總裁好年輕,唔知有冇30歲,哼哼,通常呢啲年紀輕輕嘅,唔係靠父蔭,就係做人地小三啦,反正都唔會有太大差别。阿星入到房,同佢哋握個手,總裁同阿星再寒喧幾句,話期待機械國嘅生產商聽日嘅好消息。好,薑都係老嘅辣,睇穿阿星籠嘢。握完手,總裁再次介紹副總裁,呵,都話阿星冇睇錯,係靠父蔭嘅人。
(待續)😬
[ 本帖最後由 star_platina 於 2021-7-9 18:15 編輯 ]