星期二，今日冇大雨濕濕，同Gina嘅外型唔多襯～

Gina XIV

「非常之好……當你進入狀態嘅時候………雙手會揸實個軚盤………………好小心咁揸實個軚盤……………好專心咁望住前方……………掌握好方向…………好小心翼翼咁樣駕駛……………非常之好………………（阿星用力握下Miss Tang嘅手，示意佢小心翼翼揸車）小心駕駛…………直到你到逹目的地為止…………都會好小心……………」真係差啲俾Miss Tang嚇鬼死，邊有人咁貪心，趁阿星喺電話度催眠人嘅時候“lam”埋啲催眠汁㗎？終於返到屋企，揾返副士啤眼鏡出嚟，係就係老土咗啲，總叫做有得用，用住先囉。阿星戴番副士啤眼鏡，當堂即刻一個高大威猛嘅叔叔返哂嚟啦，即刻打俾Gina睇下佢點先。Gina嘅情緒穩定咗，可能聽到阿星把充滿磁性嘅聲音，係呀，阿星後生嘅時候（家下阿星仍然好後生好冇？）曾經做過廣告獨白，亦都曾經試過打電話俾朋友，俾朋友個妹話有把好磁性嘅聲音揾佢。阿星慶幸生成一把充滿磁性嘅聲音，喺催眠治療上幫咗阿星唔少。

電話嘅另一邊傳嚟Gina嘅聲音，Gina嘅聲音話俾阿星知，佢嘅情緒已經穩定咗好多，適合做催眠治療。舞台催眠同催眠治療嘅分別，就係喺催眠嘅用法上，舞台催眠可以令到受者變成人板硬直，甚至放個人板喺兩張櫈上面當係櫈咁坐都得，催眠嘅深度去到第5-6級，屬於深層次；而催眠治療會利用言語技巧去帶領受者改變認知，比較用淺層次嘅深度，大概第3-4級。Gina講俾阿星知佢返咗屋企，阿星同Miss Tang攞完眼鏡之後就去睇下佢嘅情況先。

Gina住嘅地方早幾日阿星先去過，所以好快就到。同其他榴槤之國嘅居民一樣，Gina間屋嘅大門打開咗，鐵閘同前面泊車嘅前院大閘都鎖咗。阿星同Miss Tang落車之後行到大閘前面，大叫Gina個名，冇幾耐有個女仔走出嚟望下阿星同Miss Tang然後用英文問：「Who are you looking for？」口音非常美國，樣貌都有幾分似Gina，阿星估計佢應該係Gina個16歲嘅女。「Yes，well，阿星係你媽咪Gina嘅朋友，佢係患有抑鬱症嘅，頭先情緒出現問題你知唔知？阿星嚟睇下可唔可以幫佢做治療嘅。你可唔可以入去問下佢依家做治療得唔得？」對住陌生人大家都會特別留神，因為你唔知係乜水，阿星用yes set去降低小妹妹嘅戒心，最後請求佢去詢問媽媽嘅意見，咁做嘅話會比較單刀直入要求開門嚟得舒服，對方亦都唔會太抗拒你嘅要求。Gina個女打量下阿星同Miss Tang，然後開聲：「你就係阿星？」咦，乜原來阿星已經咁出名，連個16歲嘅少女都識。「噢，你媽咪有介紹過我？」Gina個女點點頭，然後話：「佢一早就話哂俾我知啦，你係香港人，高高瘦瘦嘅叔叔嘛，係Cassy姐姐嘅朋友。」「你同Cassy都好熟？」Gina個女一路點點頭，一路用鎖匙打開前院大閘，然後話：「你哋入嚟先啦，佢喺入邊。」Gina個女叫做Bernice，喺國際學校讀緊大概係中三嘅課程，樣貌同Gina非常之相似，如果唔細心觀察，你會諗住Gina同Bernice係兩姊妹。

榴槤之國嘅排屋大概都係咁上下，同香港一樣，越新年期嘅就越細。Gina兩母女住嘅，應該係比較舊年期，大概廿幾年嘅排屋，裡面好整齊，比起Miss Tang未幫阿星執屋之前簡直係一個天一個地。大廳係白色簡約油漆，正中有一張藤製梳化，配搭紅色花嘅座墊，靠牆身一個組合櫃，一台50吋平面大電視，組合櫃隔離係一張書枱，有電腦打印機果啲，仲有一份功課打開咗，應該係Bernice做緊功課嚟應門。大廳嘅後面傳嚟音樂聲，Bernice行埋嚟同阿星話：「媽咪喺後面玩緊音樂，你過去睇下佢？」

阿星跟住Bernice入到後廳，後廳入面仲有間房，通常係預俾啲工人姐姐或者老人家住嘅，呢度變成Gina嘅音樂室。門板關咗，強勁嘅節拍由門嘅另一邊傳出，但係聲音鬱悶，應該係有隔聲綿之類阻隔嘅效果。Bernice打開門，Miss Tang即刻掩住耳，佢其實唔太受得大嘈吵嘅聲浪，之前去Gina間吧度都試過。阿星同Miss Tang跟住Bernice行入房，就見到Gina喺度練習打碟。
（待續）😬