星期五啦,返埋今日就放假啦~
Gina V
呢個時候,Cassy點完菜返到嚟,見到阿星傻咗咁款,就問:「做咩呀你?」
「你知唔知Gina幾多歲呀?」阿星非常之驚訝。
「我知呀,39嘛。我同佢唔似兩姊妹咩?」Cassy望完Gina,再望住阿星。似,不過似係Cassy係家姐Gina係妹多囉。Gina真係令阿星十二分驚訝,個樣好似27-28,行為就比起年輕女仔大胆主動好多,原來佢同阿星嘅年紀差唔多。餐宵夜都係Gina同阿星傾計多,Cassy係搭咀多。食完宵夜,阿星要送Cassy返屋企,Gina就話要同Cassy傾計,夾硬上埋阿星架車。送咗Cassy返上去,點都要親下攬下先肯走,臨走Cassy同阿星講:「Gina好需要你幫佢,我想你幫手照顧佢。」即係點?阿星唔明。不過呢啲嘢真係唔明好過明,有時唔知係Cassy太過相信阿星嘅能力,定係佢覺得同人分享阿星係一件光榮嘅事,佢嘅好姊妹都同阿星關係密切,而且都會中意黐住阿星唔捨得走。
阿星返落樓下訪客停車場度,Gina坐咗喺車度等,係時候送埋佢返屋企,聽日阿星要同Cassy一齊去見客,都要早啲返去瞓。阿星返落架車度,見到Gina已經喺阿星架車度瞓著咗,唯有揸住車返去佢間酒吧度先。大家都明白,酒吧間唔中都會有人搞下事,有時阿星唔多想太夜去飲酒嘅原因,其中一個都係因為咁。喺阿星架車停低咗,正想叫醒Gina 嘅時候,Gina 原來已經醒咗。阿星望望佢,問佢落唔落到車,佢即刻笑住跳落車,問阿星一陣去邊。阿星話返屋企囉,聽朝仲要同Cassy見客。然後佢問阿星可唔可以等埋佢落場送佢返屋企,家下先11點咋喎,你唔係諗住要阿星等到你4點下話?
Gina嘅意思,係等佢落場打多一段碟之後就會收工,啲伙記會幫佢清場,佢話請阿星飲支啤酒,叫阿星捧下佢場咁話。又好,見你講到咁,又請阿星飲啤酒,等埋你。阿星企咗喺人群入面,大部份時間阿星只係望到眼前有好多個頭殼頂喺阿星嘅附近。阿星嘅視角係咁上下,除咗啲頭殼頂之外,十零呎之外就係個打碟台,Gina已經行咗上台喺度打緊碟。Gina放番啲紮起嘅頭髮落嚟,好陶醉咁喺度打碟,左手嘅紋身喺紅黃藍綠嘅燈光底下變得好怪異,但係Gina嘅專心真係令阿星好尊敬,呢啲咪叫做專業囉。Gina打完最後一隻歌,落咗打碟台,即刻跑到嚟阿星面前,同阿星咬耳仔:「我打碟叻唔叻呀?」叻,有個咁靚嘅打碟,阿星日日落嚟啦!Gina聽完之後非常之開心,趁阿星烏低身講嘢嘅時候即刻雙手攬住阿星條頸,然後喺阿星耳仔話:「阿星你真係好,你要晚晚嚟睇我喎!我哋走得啦!」
(待續)😬
[ 本帖最後由 star_platina 於 2021-6-25 07:25 編輯 ]