上次數錯左......上次應該係第20篇......今集應該係21........26日前開POST, 感覺上係呢26日好似滿腦都係Y咁........
其實呢篇雖然話係大結局, 但係應該係"死因報告"更為貼切...........
我 : 一個46歲已婚人士, 長期一個人在外國工作
Y : 一個4X單身多時既女士, 在香港工作
好多人都話"婚外情"係一場互相傷害既感情遊戲.........."異地戀"係無花無果既虛無感情........
我同Y就正正係一段"異地婚外情"..........
坦白講, 一個結婚廿年, 又長期獨自在外的男人, 點會真係心無雜念丫........
係一個好偶然既機會遇上Y, 好快我就被佢那種大笑姑婆既性格吸引, 就算只係初相識, 佢都可以同我無所不談, 亦會關心我....咁作為一個孤獨既中年又點會唔心動呢......雖然Y無令人驚艷既外表, 更係一個肥妹........好快我就發現每日同Y不斷係WHATSAPP傾計, 已經成為我每日期待既時間, 我地可以傾到廢寢忘食, 通宵達旦........
到正式叫做一齊左但未見面之前既一段日子, 我地可能都因為心入面充滿幻想, 所以大家都唔會對對方有咩要求, 眼中見到既都係對方既優點........
到正式見面之後, Y開始會介意我係屋企(香港)唔同佢傾計, 甚至有時一兩日都唔搵佢, 漸漸佢會覺得我只係搵佢"攝"時間.....甚至係只想同佢上床.....我雖然早已表面, 我鍾意佢, 但係我唔會離婚, 因為我與太太感情係淡, 但我都唔會令佢唔開心, 當然更加唔會令個女唔開心. 我應承Y, 除左返屋企既日子之外, 我可以將所有時間都比佢.........當然事實上都唔係, 我每晚都一定係先與家人FACETIME之後, 才與Y傾的......可能呢次都係我地第一次談咁複雜既戀愛, 有好多野都唔知應該點做.....所以產生好多不快........
除此之外, 相處耐左, 我先發現我地最大既問題........原來我地係兩個世界既人黎...........基本上係所有問題上都睇法唔一致, 除左性之外.......
我係一個大男人, 雖然我知道我唔會同Y結婚, 更加唔可能成日見面, 所以Y經常都會同朋友去街, 去旅行......但係我好唔高興. 雖然Y每次出街都會影下相比我睇, 但係通常佢都會加句........
"BB, 你可唔可以等埋我先瞓呀? 我返到去想同你傾一陣呀........不過我知你都唔會等架啦" 而呢句說話, 一星期大約有5-6次.........而每次SEND比我既時間都係夜晚11-12點.....
我其實真係唔明, 點解要自問自答呢? 到我答佢 : "妳早D返去唔得既咩?" "妳去玩少一日唔得咩" "我都好攰呀, 傾到就傾啦"......佢就即刻會用兩個MODEL ANSWER.......
1. "你初初都唔係咁架, 你同我傾通宵架.....你果陣都唔使瞓, 點解依家又變成咁"
2. "你又唔可以日日係香港陪我, 咁我出街有咩問題喎? 鬼叫你唔陪我, 咁我咪搵人陪我囉, 你應該多謝我D朋友啦, 幫左你陪我呀"
講真, 我自己心入面都明白, 我唔應該怪佢, 但係可能性格問題, 我每次都係會嬲.......所以我通常都係覆佢......
"唔緊要啦, 到妳有一日放工冇街去, 返屋企先搵我啦"
就係咁, 我地成日都係為左呢樣野吵吵鬧鬧.....但通常過一兩日又會冇野, 再過兩三星期又重複..........
我漸漸發現, Y其實可以講係一個PARTY GIRL (唔一定要MODEL身形先可以係PARTY GIRL), 佢好享受有人關心佢, 亦都忍受唔到寂寞.......
"咁你陪唔到我嘛, 咁佢(男)得閒, 我咪搵佢陪下囉, 係呀, 佢係鍾意我呀, 咁唔代表我係鍾意佢架嘛"
"我都好悶架, 咁有咩問題喎, 咁你都唔係我身邊"
我有時都會諗, 到底我係咪應該鼓勵Y搵返個人拍拖, 甚至同佢結婚, 咁樣令我地既關係對等, 智對大家好D呢? 但係, 有幾多男人真係可以接受將自己真心愛既女人同另一個男人分享.......當然女人都係唔可以............
"唉, 人地個老公尋日又買左個乜乜手袋比佢呀"
"BB呀, 我想搬出去住呀, 你話好唔好呀? 我有個FD(男)有間房多呀....."
"我真係唔想住係公屋啦, 又冇會所, 又細........."
"唉, 如果我搵得一兩萬蚊一個月, 食屎都唔夠啦" (事實上佢真係搵緊兩萬蚊左右)
"大排檔幾好食我都唔會去囉, 我寧願唔食囉"
"今日比個乞兒煩死, 又唔係幫襯, 又問咁多野, 都知佢買唔起架啦" (Y係做SALES的)
"係喎, 你仲爭我錢喎, 你幾時比返我呀?" "我爭妳咩錢呀?" "上次我影件衫比你睇, 問你買唔買好嘛, 你話買丫嘛, 我買左啦, 你都未比返錢我".........
我每次聽到佢請呢D說話, 我就覺得好嬲......因為我自問係一個受得苦, 又唔會睇唔起人, 因為我自己都係屋村長大.........
我每次都會同佢講 : 妳咁樣諗野既.........我覺得我地既價值觀好唔同..........
佢每次聽到都會發脾氣 : 咁係丫嘛, 我都係講我點諗比你聽啫, 又唔係話你, 都唔知你咁大反應做乜.........
每次最後我都只會答佢一句 : 哦
"老公呀.....我真係好想你做我真正既老公.......我知我地一開始, 你係講左唔會離婚, 但係我真係好想呀......"
"我應承你丫, 我唔會要求你離婚, 我只係須要你愛我就夠啦"
"我明既, 你一個人係外地做野, 好悶, 搵我攝時間, 我明既"
"不如以後你返香港唔好返屋企丫, 或者返屋企果次, 你唔好話我知你返左香港丫"
"不如我地都係算啦, 我好想結婚, 但係我知你唔會同我結"
Y每次見面都會同我講, 有時甚至講到聲淚俱下咁........我每次都會覺得對佢唔住
"老公呀, 你老婆好屌D, 定我好屌D呀"
"老公呀, 你老婆一定係成日比人屌, 所以你返親香港佢都唔同你做愛"
"老公呀, 你比我地D片你老婆睇丫"
每次攪野, Y都會成日講呢D說話, 我事後都有同佢講 : 下次可唔可以唔好再講呢D野, 妳講完會開心D咩?
Y : 咁我係小三之嘛......
講到呢度, 我好似講左好多Y既不是, 但係我好想講, 每個人係待人接物上都會有自己既一套, 所以冇話邊個岩定錯. 可能係好多人眼裡面, 都覺得係我多餘啫.........
結左婚仲溝女, 人渣........
呃蝦條就呃蝦條啦........扮撚哂情聖咁.......
Y都係想同自己愛既人一齊啫.......
屌, 你覺得自己好清高咩? Y呢D先叫真性情呀.....
你唔好再玩Y啦, 佢當比鬼責就算, 你快D走啦, 我大把好過妳既男人介紹比佢呀......
呢D說話, 係Y SEND比我睇, 係佢同佢最好既朋友訴苦時, 佢朋友所講既.........
係過去呢兩年, 我地有好多甜蜜既事, 但亦係無數既晚上發生上面提到既矛盾. 所以期間我地都分開過三次......每次唔夠一個星期, 我地都會搵返對方, 每次都會承諾冇下次.........每次都會即刻安排一個旅程見面 (之前既甜蜜回憶, 其實有幾次都係分開再復合而安排既行程)......每次甜蜜過後, 唔夠兩三個月, 又會重複發生一次, 直至.....
2020年1月30日.......
Y : 你係咪一定唔會離婚同我一齊?
我 : 不如妳答我丫, 就算我呢一刻係單身, 同妳結婚, 妳係咪可以保證我地可以白頭到老?
Y : 你愛我, 就哂我咪得囉.......
我 : 係要互相遷就架, 同埋就算我離婚同妳一齊, 我都係要係外國返工架?
Y : 咁你返香港做野唔得既..........
我 : 我係香港有野做, 就唔使去外國做啦.......係香港我做得D咩? 做果D妳認為搵埋食屎都唔夠既工呀?
Y : 咁你唔想日日同我一齊?
我 : 我唔想, 因為如果日日一齊, 我相信我地鬧交多過食飯....
Y : 咁你愛一個人唔係就要就佢既咩?
我 : 好多野都係雙向架? 唔係我肯就妳就可以架. 講真, 我真係好愛妳, 但係唔係我愛妳, 妳愛我就可以架嘛..........
Y : 點解唔係.......我係真係好愛你架.........
我 : 我都係, 咁又可以點?
Y : 咁你點解唔可以為左我做多D呀?
我 : 基本上除左要我離婚唔得之外, 其他都可以傾呀.........
Y : 咁算啦....我好想結婚, 既然你唔可以, 咁就算啦.......
我 : OK, 我只係想同妳講聲對唔住, 我做唔到妳既要求.............
兩個帶住口罩, 但又淚流滿面既人各自轉身離開............我亦都馬上將Y既電話號碼從我手機上封鎖...........因為, 我真係做唔到佢要求既野, 我知我地都好唔捨得對方, 可能唔夠三幾日, 我地又會再搵返對方, 又會重複.......我實在唔想再重複啦....所以只要佢搵我唔到, 我又唔搵佢, 我地先可以真正既放生對方.........將來有冇機會係返埋一齊, 我唔知, 但係係過去呢一個月, 我透過係度寫下我與Y之間既回憶, 每一次都會令我好懷念..........
我知道呢篇好似係我向Y既控訴, 又好似為自己玩弄感情而搵藉口...........
點都好, 我地都完了.........
多謝咁多位既一直支持
