今次由小弟我繼續開POST，放心，呢個POST我會一如以往，唔多係度，歡迎大家自出自入，鐘意既留個言，唔鐘意既……咪唔留囉，OH，其實我都唔知啦，係咪?哈哈。
溫馨提示:本日誌無咸野，而且長氣，仲要無靚仔，係呢篇野既特點，大家想睇正妹正野真係要第一時間拿拿聲click走離開嘞，呢度唔會有男既7吋長女既36d大架。


情人節就黎，係咁浪漫既日子裡，大家會點準備呢?未拍拖既，會因為呢一日表達愛意，拍拖既，又會去努力安排嗎?如果係老夫老妻，係唔係會諗爆頭呢?而如果無情人呢?情人節會唔會更加難過，定反之言，輕鬆好過呢?其實有情人，無情人都好，都祝大家情人節快樂，因為情人唔一定係他人，情人，都可以係自己黎架嘛。

近日執屋，從舊相簿，舊香水找回很多回憶呢，識我既人，都知我以前有一位好影響我既情人，由於時間關係，不如我先以她為序，黎開展我既回憶吧。而呢個序，其實係我曾經寫過既，現在稍為修改，希望大家唔會覺太悶喇~~

咩野女人最吸引?樣靚，定身材正先?靚又點靚，身材正既定義又係咩呢?
講真，靚既女人，都靚唔過時間，時間又同新鮮感係對立面。所以我想講，其實女人吸引男人，同令男人留下深刻印象是兩回事，是兩個層次呢。

呢個睇法令我係一件事情上，佢俾我好深既體會。
當年加拿大讀書時，我記得有一次阿N應承左幫人，咁我就開車車佢去幫呢個朋友。係途中因天雨，又塞車，眼看必然遲到了，我就更心急，在天雨路滑的情況下，我一時大意就撞左車了。
想當年我係第一次撞車，所以心情有點急亂。我先第一時間問問女友有沒有事，她答我無事後。我就落車睇撞車的情況。我好記得，當時是有點狼狽的，車子撞得無可能正常行駛，下住大雨，再加上此一撞造成路面非常擠塞。我就只得一個亂字，我認當年真的很不成熟……
當我再返回車座位，我已見我阿N叫了拖車公司來，亦報左警備案，我再問佢有無事時，佢反而提我抄低對方資料。當都做好後，我就慢慢開車到路旁等拖車了。坦白講，撞車果一刻太突然了，我真係亂了方寸。
回想返，當時阿N好冷靜去應對一切，我仲記得佢叫我唔好鬧人了，再鬧都無補於事。而且亦提我打回香港給父母知，報個平安。
隨後我當晚拿了車去車房，了解要報保險的細節後，各自回家……而到夜晚，沖了熱水涼的我，電話忽然響起……
阿N的哥哥打給我: 你知唔知今日撞車，阿N佢俾條安全帶拉到個肩頸位紅晒呀?
我很突然: 我唔知喎，我問佢佢答無事啊。
佢哥繼續: 佢梗係講無事啦，佢唔想你擔心嘛!
那刻我無言，沉默了一會後: 麻煩叫阿N聽。 ( 唔使一秒阿N就接電話，好明顯佢哥丙我時要俾佢聽到 )
我繼續: 點解妳整親唔講我知啊?而家仲痛唔痛?
阿N: 唔使理佢，好少事之嘛，係紅左D，同條頸有D痛，唔知係唔係撞果一刻拉親~
[ 我無言了，因為我的粗心大意，弄傷了她，也忽略了她…… ]
阿N繼續: 做咩唔出聲?我整親，你照顧我一世囉。( 她還在佻皮地打圓場，想令氣氛輕鬆，但我為我的大意而在深深反省 )
我答: 我會.......我真係會架。 ( 那刻雖然是電話，但真有衝動擁抱著她去說的 )
她得知我反應，只輕輕說了句: 傻~~~~
我很內疚，今時今日都仲係..............亦很有歉意說: 對唔住，下次我會小心架。聽日同妳去睇醫生啦。
佢係一個好好既女仔，佢會擺我係第一位，發生事時會先處理好事情，同時間亦會理會同顧慮我感受。
我好記得第2日我帶她睇醫生時，那扯紅了的位置，醫生按時她表情痛苦，但她答我的卻又是說沒事沒事。而要是整親得更嚴重，我想我會後悔一世，亦因為呢件事，我自此開車都會好小心。
這件事其實好影響我亦俾我一個好深既啟發的，愛一個人會設身處地由對方做出發點去想。共富貴一齊去威威，男人成功了要找索靚正既女人拿來威實在係好易。但共患難，又願同甘的女人，我相信每一個男人其實都希望擁有，卻最難擁有，不要說擁有，有時就係連遇上都難。 ( 當然又不好說遇上又唔珍惜的情況吧 )

曾有人說，男人想做女人的第一個男人，女人想做男人最後的一個女人，我會說，女人想同男人大富大貴後都是唯一的女人，而男人則會最珍惜艱苦時一起渡過的女人。
10年了，我記得有次在朋友的婚宴上見到她，那感覺都可以用一秒鐘就回來。
我到現在還是會叫她做0靚妹，傻妹。
佢會答: 仲0靚妹?唔細了~~~~
我笑笑的說: 不好意思，無論妳現在改變了多少，係我腦海裡，妳還是我當年的那個0靚妹。
我們相視而笑，就被拉去一起影大合照了....................

阿N的難忘，是刻骨銘心的，她的吸引，當然不止這些，而我和她分開後的加拿大生活，正正就是接下來的三人行了……

完.

[ 本帖最後由 dragonbone 於 2018-2-14 12:21 PM 編輯 ]

新鋪梗要支持下啦，哈哈

妹，成日都有人咁叫我

報到

報到, 2個字太了, 會被扣分的. :smile_o06:

其實D分係有咩用架??
歡迎大家繼續吹吹水,HAHA.........但黎緊又情人又新年,我睇都會靜一排~:smile_30::smile_30:

支持師兄！

我係女人都覺得阿N呢種女人好吸引！

話咁快明天是年28啦

係,女人要吸引男人,其實唔難.執一執,出去行一轉要男人行注目禮應問題不大.
要令男人留下印象,花既心思唔一定係多,但一定要到位.
就好似聽歌,好聽既歌,可以有好多首,但係腦內可以回憶不散的,往往卻只有那2,3首,為什麼呢?因為觸到內心深處.

係,年28要執了,唔執,年29都唔見得會太多閑時間,因為.....情人節嘛.
HAHA.............