北上的港燦 第3回
北上的港燦
第3回
早幾日係一年一度既中秋佳節，我陳廣燦咩住個大大個既背囊，係堔水步黃金高登一帶睇下呢樣睇下果樣呀，最後只係買左幾隻ＤＶＤ番去打算將電腦Ｄ咸片燒落隻碟度．後來有人係街派卡片話對面有好多新電腦ＧＡＭＥ新戲新歌新SOFTWARE賣，咁當我伸隻手想囉張卡片時，佢就主動同我講有四仔賣，中美日韓人獸咩都齊．我真係唔係好明,點解佢對住我淨係講話有四仔賣:smile_39:
好啦，入正題啦，本來想一個人靜靜咁過中秋，但我作為洗腳妹既初戀男朋友，我冇理由比佢中秋一個人過既，佢一定會掛住我掛住到喊，說時遲那時快, 果然洗腳妹冇幾耐就打電話比我, 佢話我好掛住我, 好想念我, 好想我中秋去陪佢, 同埋最後千叮萬囑叫我記得帶多個錢過去, 我問佢點解, 佢話多個錢旁身嘛~ 我當時覺得好開心好感動, 中秋節都有女掛住我, 咁我就放棄左返屋企將Ｄ四仔燒落去ＤＶＤ既念頭，直接衝關北上，好啦，講左咁耐都唔記得介紹一下洗腳妹個名，佢叫李友蘭（如果大家識佢記住唔好叫我長腳呀！），今次同洗腳妹又係一如以往，到處咁樣行下街食下野，入到去堔圳既一間港式茶餐廳，見到入面坐住既多數都係香港人，我當然特別自豪咁樣拖住洗腳妹，抬高個頭大大步咁行，盡顯男人味，係香港根本從來無呢Ｄ比我表演自信既機會，可能係因為洗腳妹有幾分姿色，佢地經過都望左幾眼, 然後就交頭接耳咁品評，我心諗你地唔恨得咁多架啦，我同洗腳妹呢Ｄ之間既係真愛，洗腳妹成日都同我講佢唔係一個貪錢既人同埋佢唔會騙人，其實我對佢呢番說話一直都深信不疑，因為第一日佢幫我按腳果時，佢話我又靚仔又可愛，個樣又似劉華，單憑呢一點都足以証明佢唔會扼人啦！所以我陳廣燦係會用我香港人天賦既聰明腦袋去思考大陸妹講既每句說話，絕對唔會咁易輕信架！等我Ｄ朋友仲成日話我蠢,叫我醒下！其實我就話眾人皆醉我獨醒！我同洗腳妹之間既係真愛！真愛我找到了!
我同洗腳妹坐低左之後，係隔離張台聽到二個港男係度吹水，其中一個話佢個香港朋友係大陸度識左個洗腳妹，比條女扼盡身家，初初識佢果時要佢買金戒指，後來又叫佢租樓買樓，又買呢樣又買果樣比佢屋企人，份糧得果萬幾蚊，每個月就洗幾萬蚊，搞到爭人周身債，月頭出糧要捱麵包，朋友勸佢又唔聽，搞到泥足深陷．．．．我聽完之後，心裡面暗笑點解會有Ｄ咁蠢既港人，同一時間我覺得自已好幸福，有個咁好既女朋友係我身邊，我發現佢戴住左我當日買比佢果隻金戒指！洗腳妹話係時候為未來準備，要有個家庭，咁我同佢講不如結婚啦，但佢話結婚係唔夠架，最緊要買層樓比佢，咁樣生活先有保障，嘩，估唔到咁快為我地既未來著想，而且又想得咁周到，又咁想同我有個安樂窩！我真係覺得好開心好感動，好啦，雖然我暫時自已未有能力，但係我都會諗盡辦法去實現！！Ｘ眾銀行香港成日都賣廣告話大Ｘ銀行香港全力服務大眾，又可以為你實理夢想，再唔得就問老豆老母囉晒佢地多年積蓄上去買樓，我諗佢地見到我成家立室，都會好高興！
