特長馬季今日過後，隨住"好利威"力壓"永利好"成功取得煞科日最後一場頭馬加最大進步馬匹獎後，已告曲終人散，今日整體而言熱門成績不俗，實為馬迷之福，如果賽事水平可以一直維持係今日咁既水平，相信賽馬投注額一定可以回升，請各界馬會人士正面檢討賽馬制度及賽事之水平，以及騎師之水平，勿只將投注額下跌之問題歸咎於外圍以及稅制上，甚至足球，須知道97年前賽馬興旺時一樣有外圍存在的...

第9場

     估唔到係單打獨鬥之局，主角係"紙醉金迷"同"再領風騷"。後者繼之前在上手馬房有一次僅敗後今日再一次案件重演，論馬計柏寶已可算發揮得一絕，只係馬性實在太差，沿途跑來劣性未馴，依然鬥口得離譜，全程直路跑來岳頭習慣始終未能改善，此類馬有點"自由鳥"之類風格，看來現評分下要跑得非常好甚至要靠點運氣才有機會贏番場。"紙醉金迷"今次用一絕走位贏馬，老實講此馬不是筆者杯茶，因為水準實在不算穩定，時而爆冷時而冇影，實在難以計算，故此即時有質素依然選擇放棄。"威成"今次跑得上次更好，奈何出頭後竟然又再慢車，差點更連第三都不保，十分冇鬥心而且又衝程十分短既馬，看來分數已到有利水平，但要贏馬就可能要縮到好靚，非常尺寸，下季或可往谷草一試，或可找到一條出路，但係長線成就亦都只值一場頭馬左右。"財到得勝"沿途走位論盡，大半條直路都未能望空，未能殺入三甲騎者須負全責，論馬今季同"小武士"一樣準得可愛，但係在今季多拼之下下季能否保持水準則有保留，再加上質素大抵上已定型。"勁好"到季尾時一再回復後上走勢，証明分數已經去到可一爭之水平，小心下季季初乘質新馬未起之勢偷雞贏一場。"勁好聲"現分數只能於谷草爭功，細心留意大摩亦已似放假中。"哈哈妙"不能用最佳跑法下輸得幾遠，論馬1400應該只會更合，下季可再給予機會。

第10場

      全日欣賞性最高之賽事，果然兩隻明日之星各施各法，其實論走位以"永利好"勝一籌，今日至少有5-6場賽事之頭馬用跟其相同之跑法，奈何遇上更高強之對手，只以短距離僅敗實已無話可說，只要今季不是搏得太多下季將可大放異彩，忠心準繩之性格亦令人敬佩，就算初出亦不怕，因此駒新鮮感下作戰亦佳。"好利威"再現馬王風範，看來神仙蔡今季未能拿下大賽之遺憾下季將可填補，但如想在國際賽事爭功則最好配上一個更好騎功之大師傅，計末段22.5乃全日最勁之後勁，實在令人側目。"駕進"季中抖完一輪回氣後季尾又現忠心性格，每跑例上名，所以買三重彩時例必要考慮之選，端馬分數應已差不多，唔太適合再追。"喜利多"同"新力升"實情目標已非今仗，加上已搏得頗盡，下季未必冇機會而不要望有太大進步。