引用:
原帖由 一夜狂歡 於 2023-9-20 13:02 發表
原來帶病返工真係好很辛苦,車廂入面逼到隻狗咁,仲係要帶住口罩連呼吸都有困難,再加上不停俾人單打,真係夠你受,行到返馬師道公司大廈𨋢口等𨋢,大把人喺度等,到輪到我入𨋢嘞,發覺非常礼讓,冇乜幾個人同我爭𨋢,嘩世界變!梗係!見你個 ...
放心我有備而來,唔驚你發爛渣嘅,入房前醒目掟走口罩先,入到去但見條友玄壇咁嘅面,用指責口氣話:林仔你有冇搞錯…..。未等佢講完我第一時間坐低,將個頭伸到前一前同佢講:早晨呀陳生!咳咳咳咳!又打乞嗤再狂呻鼻涕,條友驚一驚問:喂你咩事呀?好唔妥喎,咁都返工?我當然發揮病嘅威力啦,不停咳住話:陳生你唔係懷疑我詐病嘅咩!咳咳!我琴日感冒發燒到依家都未好番,仲好似嚴重咗,我一路講一路伸到個頭越嚟越前,再話:呢樣嘢可大可小喎,你懷疑我詐病曠職喎,咁我梗係要驗明正身先得㗎,你估病係好玩㗎。講完再對到條友正一正狂咳一輪,條友驚到係咁縮,揞住紙巾惺惺作態話:你唔好誤會我唔係咁意思,我只不過係關心同事咁解啫,你係我下屬,你病我都唔安樂㗎。吊你啦假成咁,面皮幾丈厚,講到呢度條友先至恍然大悟,即刻話:你做咩唔戴口罩呀?想傳染人呀?我心諗我梗係想傳染你啦pk, 益你呀。我扮嘢話:先前有㗎,不過呻鼻涕呻濕晒揼咗,我又冇士啤。條友好緊張問靚女有冇口罩,靚女話冇之後再call人話:喂你嗰邊有冇口罩,快啲欏幾個過嚟。好快有同事攞咗口罩過嚟,原來得一個咁多,條友質問話:得一個咁多?你哋平時唔準備多啲㗎?同事有啲唔順話:係得咁多咋,一向都係咁架啦,好少會用到。條友悻悻然接過口罩,然後叫走個同事。