六十三、彤的邀請
阿彤找阿玉去吃早餐。阿玉見距離看舖的時間尚有兩小時左右,就答應了對方。阿玉抵達茶餐廳時,見到阿彤已在門外。阿彤問阿玉:”如果買外賣上我屋企食,方唔方便呀?”
玉:冇問題呀。
點餐時,阿玉見餐廳內還有些空位,對於阿彤買外賣的建議就開始有疑惑。同時她想起,阿瀅是否在家呢?於是阿玉就拿出手機準備發訊息予阿瀅。但幾乎同一時間,阿彤就說:”阿瀅今朝一早就返左學啦。”
玉:嗯……希望佢尋晚冇激親你啦。
彤:冇呀……佢難得返來訓,我梗係開心啦。
阿玉將電話放回在手袋中,沒有再問阿彤為何傾向買外賣。兩人之後閒話家常,直到來到阿彤家中。
兩人坐在飯桌前,阿彤就問:”阿瀅有冇帶過你上來呀?”
玉:冇……冇呀。
彤:有都唔怕講喎。
玉:冇……
阿玉又不明白為何阿彤覺得自己曾來過。但很快阿彤就解釋了自己為何有這想法:”其實……你同阿瀅……唔係朋友……係拍緊拖先真,係咪?”
對阿玉來說,阿彤這句話有如突襲。她完不會懂得如何反應。
阿玉那愕然的表情其實已出賣了自己。阿彤續說:”你咁樣反應,即係係啦。我冇惡意,我唔反對架。你對阿瀅好,佢又開心就得。”
既然阿彤這樣說,阿玉覺得也不必否認:”嗯……多謝你咁開通……”
彤:冇話開唔開通嘅,咁唔通叫你地唔好再見咩?我自己啲男人都唔係個個見得光啦。所以阿瀅唔鍾意我……
玉:我估佢會明白你嘅……係啦……你點知我同佢啲野架?
彤:你地尋晚嗰啲眼神出賣左你地啦。我睇得出嘅。
玉:咁你尋晚冇問過阿瀅?
彤:梗係冇啦,我點敢問佢。
玉:但係……如果俾佢知道你接受我地,你兩母女關係都會好啲。
彤:唉……就算尋晚返到來,我都冇話可以同佢坐低傾下計。點開口?
玉:咁啲仔女呢個年紀,都唔容易同佢地傾心事架啦。
彤:係喎,你話你個仔都差唔多年紀,咁你地點相處?有冇計傾架?
玉:冇呀,好少啦。佢而家都唔我住。
彤:佢跟佢阿爸?
阿玉即時思考怎樣解釋阿南可以去澳洲讀書一事:”唔係……佢……有個親戚有啲錢,咁就可以去澳洲讀書。”
玉:咁即係你第一個人住?
彤:呀,係呀。
玉:咁唔怪得阿瀅唔返來啦。佢可以成日去你屋企都得。
阿玉沒有否認,只有尷尬地笑。阿彤續說:”不如你地今晚喺度訓啦。我真係冇所謂架。你地喺阿瀅間房,做得大聲啲都冇所謂。:
阿玉更覺尷尬,唯有裝作專注喝台上的飲品。但阿彤不打算放過阿玉:”我今晚八點幾至放工。飯就唔同你地食架啦。希望返來見到你地兩個啦。”
阿玉無法不回應:”咁……咁我睇下佢點啦。”
彤:唔該晒你。
玉:唔好咁講。
彤:我睇唔掂個囡,要你幫我睇住。
玉:唔好咁講。佢唔理解你啫。覺得你識男朋友唔啱。但我都想佢明白,一個女人靠自己一個湊大小朋友,係好需要有個伴喺身邊。
彤:哈!你應該好了解我。但其實而家我都係自己一個。之前個男人,早排分開左囉。所以你同阿瀅喺度唔會見到男人架。