臨走前我醒起樣嘢問Richard ，我問：Richard哥，聽Amy講你喺九龍仲有間餐廳個喎。佢回答話：係呀！就係太子嗰便，係一間小本經營嘅扒房，乜你都有興趣咩？我話：冇，想話有機會約啲朋友過去食下飯咁啦，可唔可以俾個地址我？Richard好爽快喺件衫袋揞咗張咭片，佢遞俾我話：嗱地址印喺上面，幾時去食飯嘅話，Show張咭片俾我哋伙記睇，咁就免收加一再打八折，記住多啲嚟幫襯呀。Richard真係一個好好先生，我再三多謝之後同佢講再見，唔怪之得Amy咁冧佢啦，事業有成又有錢，為人大方又識得體諒人，我做女我都想埋佢身，其實個次唔係Richard出手相救，Amy可能俾條鬼仔溶咗都似，無以為報唯有以身相許，又唔怪得Richard嘅，俾Amy掀住嚟砌好難有男人走得甩，聽Amy講Richard亦都冇乘勝追擊揾着數，仍然保持住君子風度，真係難得，反而Amy用心不良至真。行出酒吧先發覺件制服衫都幾異相，大大隻字印住個酒吧名，變相做咗人肉廣告板，於是決定棄地鐵搭巴士，減少尷尬場面。