人夫人妻日誌#28 - 單身日誌1 ( P1, 11, 72,120 )
單身日誌
它不會太長篇，只是記下單身時，很多過去的日誌……..故事雜碎而多，時間序或有早有遲，而今次，發生於我加拿大的生活，和阿N分開之後………
因為早排收到她的短信，所以才想係度寫一篇短篇，一篇關於她的故事，她叫Lucy，現在已為人妻， BB也有好幾歲了，所以她現在已乖乖定性了。當年她算是一個有點特別的女孩，一位當年我在加拿大讀書時認識的女孩。
回想當年，加拿大機場。
Tony: 幫我睇住我表妹啊。
我: OK,放心，唔會被人蝦佢既。
Lucy: 車，係都只係得你蝦我之嘛。
我: 嘩，妳講笑好，妳果堆觀音兵，邊個會埋到妳身蝦妳。 ( Lucy作狀推我之後，Tony也沒好氣地擰頭。 )
Tony: HAHA,唔講笑，上機喇，有咩電聯啦。
說畢，Tony就步向登機，由於他有急事，所以skip左黎緊既semester而回港，呢D都係常有既事，只係今次稍為有點特別既係………他交了他表妹Lucy俾我照顧。
Tony係我一位非常要好的朋友，他有事，我當然會幫，而他表妹Lucy就有點特別，Lucy才來了一季，已經成為學校既風頭躉，其實唔難理解，因為她真的堅靚，如果要問佢似邊位，簡單講既就係張佰芝了，仲要係初出道果隻。而我，當然唔係咩正人君子，但有趣既係，自從同阿N分左手之後，我已經在情感上成為絕緣體，所以Tony亦放心叫我睇住Lucy，而我，亦順理成章很多時稱呼她做阿妹好了。(不是契妹呀下。)
有時眼看Lucy好多飛來蜢，場面係有趣的，因為我見她並不太享受被追既感覺，而我，專門負責車佢放學同埋間唔中既LUNCH，當然，不可能每日如是，因為我都有我既私人生活，成為單身後既我，重投朋友間活動同埋聚會既常客，這點，奇怪地惹來Lucy的不滿，當時的我，還是不懂的，當然也沒有理會她啦，直至一日。
Lucy: 你去邊啊? ( 我正要離開學校，在車場上準備開車走人。 )
我: 我去打波啊。
Lucy: 我跟埋你一齊去。 ( 說時她已逕自坐上前座。 )
我: 妳唔係有番薯班人約左妳出去食飯咩? ( 番薯係人黎既，估都估到係清兵果隻啦，簡單講，係Lucy裙下追求者之一。 )
Lucy: 我唔去佢地果度啦，好悶架。我跟你，開車啦唔該。
我: 吓，我呢度妳又知唔悶?妳悶唔好叫我車妳走呀下，我唔理妳架。 ( 講時Lucy已在扣上安全帶。 )
Lucy: 點解仲唔開車既?
我: 小姐，我仲等緊人啊。 ( 說時遲，那時快，我另外的女性友人都上車了。 )
講真，我唔係傻既，上我車的2女1男，都係我朋友，而當中既Sylvia,係對我有意思，我係知既，以前因為有阿N，所以佢無舉動，而家亦因為無阿N，我對所有女性，都唔會有進入的遐想舉動，至少…….暫時係。
好快，join埋其他人再一齊打完bowling後，我地如常地上車食飯去。我習慣係一大班人出發，所以開車既其實唔止我一個。走時，Lucy好自然去我車坐上前座，而當食完飯，有車既就會載無車既人回家，直到最後得Lucy在我車上。
Lucy: 講樣野你知，我今晚發現在D野，我發覺呢，Sylvia對你有意思。
我: 哦?妳好似見人無幾次，請問點發覺呢?
Lucy: 你咪理啦，女人第6感好靈架，你唔覺佢望你時有D唔同架咩?
我: HAHA…….唔同又點。
Lucy: 乜你知架?你對佢都有意思? ( 此時的Lucy望住我問。 )
我: 無喎。
Lucy: 無你又車人。
我: 我對妳都無意思，我車唔車得妳先。
Lucy: 我點同呢。
我: 妳點唔同，以我目測，妳女人黎架喎。
Lucy: 車，你咁蠢，都唔明既，我係妳阿妹黎架嘛，我有責任保護你架。
我: 妳保護我?咁客氣?? ( 我在哈哈笑，她就沒好氣望向窗外了，直到她的homestay家門口。她才回頭。 )
Lucy: 你真係對人無意思。
我: 我呃妳做咩，我暫時對咩人都無意思住，得未?
Lucy: 得，咁我走嘞。 ( Lucy滿意我的答案後就走了。而故事…….正式開始。 )
[ 本帖最後由 dragonbone 於 2018-7-23 09:51 AM 編輯 ]
