第六十三章．各走極端
「你嘅表現的確好好，起出我嘅預期。」Newton喺娛樂公司聽完Lesia向佢講嘅工作情況，展示滿意嘅表情:「唔止可以面對群眾，重成為女神，開左你嘅女神群組。」
「噉我幾時可以拍廣告或者電影呀?」Lesia緊張問:「如果你想要我獻身先答應，我都可以接受，我明白呢個圈有潛規則。」
「你諗多左嘞。」Newton笑一笑話:「不過我有一個最後考驗畀你，你等我一陣。」起身行出房，冇幾耐就返入黎，手上攞住幾套性感比基尼。
「我會安排你去一間別墅扮成渡假，著上呢幾套比基尼影一輯相。」Newton將個安排話畀Lesia知:「完成之後放幾張相上你個群組，我再安排你拍廣告。」
「吓，太性感啦，唔止我自己接受唔到。」Lesia抗拒:「我爸媽見到我影呢啲相，實鬧死我。」
「噉你就唔使再諗拍電影做女主角，唔好以為擺出個純情就夠。」Newton認真話:「觀眾睇得多都會厭，你想要紅，就唔可以有任何顧慮。」
「但係我真係接受唔到畀咁多人睇住我著得咁少。」Lesia臉有難色:「你唔好迫我啦。」
「好，既然你自己放棄機會，噉我同你解約啦。」Newton唯有話:「不過你已經夠晒人氣，可以去搵其他娛樂公司捧你。」
一直諗緊點對付Lesia嘅Joan，想過好多方法都行唔通，直到有一日佢放工行出大廈嘅時候，偶然望過公司大廈對面街，仍然見到一個喺呢幾日放工時間都會出現嘅男仔，而且左望右望，好似等緊人噉，佢忽然想:「呢個宅男呢幾日都黎等人，會唔會等嘅係Lesia呢?」
於是Joan行過馬路，好有禮貌噉同佢打招呼:「先生，你好呀。」個宅男好似有啲驚，只係同佢點點頭，佢問:「你係咪喺度等女神Lesia?」個宅男即刻問:「你識佢架?」Joan微微一笑:「Lesia係女神，呢幢大廈嘅人都識佢啦，特別係佢放左啲泳裝相上群組之後，更加受歡迎。」
個宅男突然有啲激動:「佢唔可以咁性感，噉會害左佢架，我黎搵佢就係想提醒佢。」又問:「你知唔知佢喺邊?」Joan安慰佢:「你冷靜啲先，我都唔知呀，而且佢已經辭左職嘞。」個宅男即刻有啲急:「噉點算好呀，我一定要搵到佢。」
Joan心諗:「呢個宅男似乎可以利用。」就提議:「不如噉啦，我叫Joan，都識得一啲佢公司嘅同事，我試下問佢地，一有佢消息即刻通知你，好唔好?」個宅男立即點頭話"好"，Joan:「噉我地交換手機號碼，保持聯絡啦。」
交換完手機號碼，Joan問個宅男:「你叫咩名呀?」個宅男答:「我叫Eric。」Joan話:「好，噉你走先啦，唔使再黎等，我遲啲會搵你。」Eric臨走前強調:「噉你有消息馬上通知我，幾夜都得架。」
「你冇權單方面同我解約。」Lesia反對Newton嘅決定:「我亦都唔會同你解約。」
「就算唔解約，我都唔會捧你。」Newton好認真噉話:「除非你接受我嘅安排，否則只係浪費大家嘅時間。」
「好，你要我做乜都得。」Lesia考慮左一又陣，知道唔顧慮得咁多:「但係你要保證捧紅我。」
「以你依家嘅人氣絕對冇問題。」Newton答應Lesia:「其實我一早已經有晒捧紅你嘅計劃，Audree集團份工你唔使再返嘞。」
過左幾日，幾張Lesia著住比基尼嘅相出現喺女神群組，即時引起所有迷戀佢嘅男人哄動，但係Audree集團嘅男職員已經搵唔佢，原來佢放完相跟住辭職:「多謝Audree你肯畀機會我。」Audree話:「嗯，你返去對Newton講，我遲啲會同佢計。」
不過即使Lesia辭左職，Jason仍然好掛住佢，不停喺個群組留言，問Lesia去左邊，然而Lesia都冇回覆，直到幾個星期後，Lesia做女主角嘅廣告出左街，Jason先喺電視上再見到佢，從而知道佢係Newton娛樂公司嘅合約演員。
Lesia辭職之後，Joan心知即使佢離開左Audree集團，Jason仍然會對佢念念不忘， 一日唔對付佢，自己個計劃隨時都會因為佢而受破壞，但係始終諗唔到一個比較合適嘅計劃，既可以對付佢之餘，自己又唔被懷疑。
Joan曾經想過搵人影Lesia裸照，又或者搵人輪姦佢，再將個過程拍落黎，但係諗深一層，噉做反而重可能得到Jason嘅同情，情況會變得比依家更差，最後佢決定先加深同Jason嘅關係，再繼續搵機會對付Lesia。
[
本帖最後由 netsee 於 2017-12-3 02:50 PM 編輯 ]
