FB: https://www.facebook.com/writingprisoner/

情慾診療所
第1話 西貢結界

我叫彭家星，做速遞既，係一個好普通既基層上班族，只係個人平時悶 d，身形瘦 d ，朋友少 d ，人工低 d ，我覺得冇乜特別，依家好多年青人都係咁。不過可能世界變左，經濟好左，人類進化左，連 d 女眼角都高左，好似我呢類普通人，都被降格稱為毒撚。你問我介唔介意？你個名後面多個撚字你介唔介意丫？問黎都多撚餘…

我有個阿哥，叫彭家聲，係一個醫生，屬於上層既城市人。聽講佢仲係一個幾出名既醫生。聽邊個講？屌咪得佢自己講！出名咩？講真我真係唔知，我連佢係邊科有時都攪唔清楚，佢解釋過但係連老豆老母都話聽唔明，最後佢話總知就唔係睇傷風感冒嗰種醫生。我老母佢呢句都算絶核，佢話：「連傷風感冒都醫唔好仲算係醫生？」不過佢每個月比成十皮野家用，佢攪邊科咪邊科，阿爸話話鳩知佢醫撚死人，總之大家都冇再深究落去，老母話費事萬一迫死左佢我地成家連屎都冇得食。

不過我記得阿哥佢話…佢醫既係感情。

阿哥份人好老正，見到性感女神都可以目不斜視，同我既目不轉睛只係差兩個字。我發誓咁大個仔真係未見過佢扯旗，日本AV更加唔係佢杯茶，連我既女神桃谷繪里香剥晒衫喺佢面前佢都係望都唔望下，所以阿爸一直到依家都以為佢係基既。佢讀書叻，由細到大就代表左屋企人既驕傲。而我…老豆話只要唔好打飛機打到入醫院上埋報紙已經算對佢有交代。

不過對手生喺人地度，人地要寫…我控制到既咩？佢就話條賓州生喺我度，我可以控制自己唔打咪得…我真係好想同佢講，阿爸，你都年青過，冇理由唔明格？賓州係不隨意肌黎，冇人可以控制到佢，只有盡快將佢制服，世界先會和平。

阿哥好信我，從來都唔會懷疑我，不過就成日問：「星，我銀包嗰五舊水係咪你攞左？」佢好長氣，每次問佢借錢都問呢樣問嗰樣，驗屍咁驗，所以有時我攞左就算都費事話佢知。不過佢又唔會嬲既，最多叫我下次寫番張紙放喺佢銀包話佢知係我攞左…同寫埋幾時還！

屌佢老味…兄弟都要寫借據！

佢三日唔埋兩日就會捉住我同我講佢診所發生既事，不過我一向都冇乜心機聽。佢連傾計既對象都冇，又唔鐘意躪街，又唔睇咸片，我有時真係好懷疑，阿哥究竟呢三十幾年到底係點過？

就好似有一次…

哥：「嘩…嗰個姓王既闊太真係幾惡頂，以為有錢乜都得！次次黎親都…喂細佬你係咪聽緊？」

我：「吓…你同我講緊野呀？」

哥：「你唔想聽我都唔勉強你，唔講嗰 d 一係講下你爭我幾錢嘞！前前後後加埋好似冇十萬都八萬，係咪呀細佬？」

我：「咦喂阿哥…頭先講到姓王嗰個闊太跟住點呀？我好想知你快 d 講埋落去！咪屌引啦妖！」同佢傾計我只有靈魂出竅先至免強可以捱到十五分鐘，最攞命係一邊出竅一邊重要比反應佢，唔係個客有機會要求回水，諗諗下真係同做雞冇乜分別。

不過，如果我肯比時間關心下佢…就唔會有以後既事發生。

阿哥大我十年，但我地兩個一齊行出街好多街坊都會認錯，d 人知道係佢就會贊佢靚仔有型，但知道係我就會話咸濕猥瑣。

我個 friend 韋雞佢對呢個現象就解釋得最為透徹：「你地兩個基本上係一樣既…」

我：「咁點解佢有型我猥瑣？」

韋雞：「係氣質！氣質決定命運！」

我：「咁個樣一樣氣質都一樣架啦屌你！」

韋雞：「我先至要屌你！氣質呢樣野…就好似食物入面既調味料，例如煲湯咁，齋睇湯水你撚知煲湯咸定甜？好似你呢 d 叫淫底…毒撚一般都係呢隻湯底，日日搵 av 黎淆煲湯有乜辦法唔咸？你呢類禽獸其實冇走出街非禮細路女已經叫夠定力！不過又難怪，成廿幾歲人都仲係青頭仔未聞過女人香，谷精上腦係遲早會發生既事黎。呢…你阿哥就唔同，做醫生日日見幾多鮑魚？話你知做男人成唔成熟有冇魅力就係睇你見過幾多隻新鮮鮑魚！」

[ 本帖最後由 劉金發作品 於 2017-10-18 08:51 AM 編輯 ]

我：「佢好似唔係婦科喎…」

韋雞：「咁醫生叫你除你除唔除丫？」

我：「咁又係咁又係…你又岩…」

韋雞一到合法性交年齡16歲既時候，就已經開始跟佢喺麥記兼職時既上司出入色情場所，佢雖然同我同年，但大大話話已經有七八年既叫雞經驗，佢講既野自然有一定既份量。

我：「講淫我幾時淫得過你！」

韋雞道：「屌所以話你…我呢 d 叫風流！好似你咁嗰 d 叫9流流！明唔明？不過呢d咁抽象既概念你 d 毒撚又點會明？不過你放心，一場死黨遲 d 搵日我介紹我阿頭過你識你破處就指日可待！嘿！」

我：「唔駛客氣…我淨係想正正經經拍下拖…」每個未經人道既毒撚，心入面又點會冇女神？

韋雞：「鵰你真係…家陣破處好唔正經呀？要技術架！你估求求其其篤入去就算呀？拿呢門手藝學識你一生受用呀細佬！我師父仲有招不傳外人既絶學叫化骨綿掌…」

愛情既野，你 d 雞蟲又識咩？

晞雯就係我希望用黎破處…呀唔係…係用黎了解呢種抽象概念既對象！

佢樣子清純，長髮披肩，莉渦淺笑，仲有一雙鳳眼，人地話呢種眼係最淫蕩…除左樣靚，佢身材仲正，骨肉均稱，唔大唔細，堪稱完美既 body！

每次派件到佢公司，我都會特登借 d 易留耐 d ，希望可以望多佢幾眼，但係佢一望番過黎我就會即刻縮開，嗰種『偷』既感覺我覺得真係好正！不過行過既人都會放低一兩句說話比我聽：「死變態仔…」

而我呢個弱點，就成日比佢同事 Molly 姐用黎點我做呢樣做嗰樣既籍口…

Molly姐 ：「阿邊個，派完件未呀你？派報紙都冇你咁耐！」

我：「派報紙緊係快啦，丟低喺門口就得，我幫你跟埋人名派，呢 d 服務邊度搵？順豐得呀？分分鐘叫你自己落樓下攞添呀阿姑！」

Mollly 姐：「蝦你…咁你派完未得格？」

我：「派完啦派完啦…」呢種阿姑係你好想喺後面兜頭中佢後腦嗰種八婆。不過公平 d 講，其實睇佢都只不過三十出頭，應該同我阿哥差不多年紀，樣衰冇罪，我係唔應該歧視佢。

Molly姐：「咁你仲望咩呀？仲唔走？見你踎喺豎縛鞋帶都縛左成十幾分鐘…做咩呀？繡花呀？岌野至掛！」佢一野就擋住左我望向晞雯既視線。

我起身拍拍個羅柚：「咪走緊囉…催催催…吹蕭萍呀你？」

Molly姐：「蝦你…喂！咁得閒望不如幫我換左桶蒸餾水佢先啦，鬼死咁重…」

我：「你估阿拉丁呀吹兩野願望就達成？食自己啦你我趕住下一單…」

Molly 姐：「蝦你個死仔包…好！你唔幫手呀，咁晞雯你自己換番嘞！小心腰骨呀！一陣扭親連觀音坐蓮都玩唔到就一世架啦！到時要怪就怪呢 d 見死不救既禽獸啦吓！哎依家 d 後生仔真係做多少少野都唔肯，晞雯你搵男朋友千祈唔好搵著呢 d望就識得望，著數就識攞既 …」

一聽到晞雯識觀音坐蓮，我當然係唔會就手旁觀：「得得得… 水喺邊呀阿姑？」

Molly姐 ：「你阿媽就阿姑！咪喺你腳邊囉，籮咁大隻眼都唔知睇乜春野…咁做人無前途架你踢一踢先郁一郁！怪唔之得一世做速遞！」你個八婆又知我會一世做速遞？唔通我係醫學世家我又要話過你知？

晞雯細細聲：「Molly…咪玩人啦…」

Molly笑道：「乜玩？換埋水可以望多兩眼有佢著數啦！喂喂…小心 d 呀！打瀉桶水有排你索呀！拿你換得企理 d 最多一陣我send 兩張晞雯 d J 圖過你嘆嘞！」我幾乎就想當眾讀出我既 whatsapp 號碼比佢知。

晞雯嗔道：「啐…你嗰 d就 J 圖！」

見到佢兩條女好開心咁扭作一團，晞雯嗰身貼身背心同熱褲，完全將著住衫係冇野睇呢個概念扭曲，除左扯旗我真係諗唔到仲有咩可以用黎代表我嗰陣既心情，真不枉我咁賣力去幫佢地換水，如果佢可以臨場加演嗰招觀音坐蓮我就真係死而無憾。

Molly 姐：「喂話時話乜呢排唔見 legal 嗰邊個靚仔 Adison 既？」

晞雯：「唔知呢…」

Molly姐：「係咪囉囉攣呢？好！一場姊妹就幫你打聽下！等你唔駛日思夜想晚晚諗到濕晒瞓唔著！嘿嘿嘿！」

晞雯面紅紅道：「你就濕晒…成日講埋晒 d核突到野！」

聽到佢地講既野，我個心即刻拿住拿住… 成個人 down 到不得之了…

原來…晞雯諗起嗰個男人會濕晒…呀唔係…

原來…晞雯佢已經有意中人！

聽佢地講，嗰個人仲係律師黎，雖然係見習侓師，但係已經大把前途，要揀又點會揀個做速遞既黎付托終生？講你都唔信啦係咪…

收工返到屋企…

媽：「星，一陣你攞碗湯落去比阿哥飲啦！」阿哥佢一早已經搬左出去住，阿媽周不時都會叫我攞野落診所比阿哥。

我：「媽！飲湯緊係返屋企先至飲架啦，邊有喺診所飲咁唔衛生架？你想唔想見到自己個親生仔架？我失戀呀，依家邊度都唔想去！」

媽：「失戀？妖阿星你咪玩啦做速遞學咩人講失戀呀！」做速遞唔可以講失戀…咁做咩至講得？

媽：「仲學人講衛生！平時最那渣嗰個就係你！你係咪睇得床下底 d 碟多得滯出現幻覺呀？妖兩父子都一擔擔！」

我：「吓…老豆都…喂我唔想同佢睇埋同一隻碟喎！佢有冇攪過我隻桃谷繪里香呀媽？」

媽：「痴線！都唔知你 up 乜…快 d 攞湯落去啦！叫你做小小野都阿之阿左。話你知阿哥健康即係我地成家既健康，阿哥有咩事我地屎都冇得食呀！唔通靠你呀！」

我：「得得得…你唔駛再講，我依家就去搵屎過你吔！」佢下一句應該係冇水都疴篤尿照下，唔好以為個樣生得似就有阿哥咁本事…

搵到錢就等於有本事？阿媽你睇呢個世界實在睇得太簡單！好多野係…

佢一隻拖鞋飛埋黎：「蝦你仲唔行？咪響豎 on 99 咁得架，d 湯凍啦衰仔！係咪要我郁手你先捨得出去！」

阿哥間診所我不嬲都唔係咁鍾意去，一來唔係商場舖，開喺 d 商業大廈上面，陰陰森森冰冰冷冷咁，總之成個 feel 就好怪… 二來樓下個看更李伍每次見我都問長問短，好似見到賊咁，，過左七點入去仲要登記，明明就認得我…第三就係…阿哥有個比間診所同李伍更加怪既護士，叫 Barbie，我最怕就係見到佢！

去到診所，見Barbie 攪緊佢 d 指甲，望都冇望我 dup 低頭搽緊指甲油：「黎做咩？」

我：「阿哥呢？我攞湯黎比佢飲。」

佢倒左碗湯出黎，我仲以為佢攞入房比阿哥飲，點知一口氣就飲晒落肚，仲伸條利出黎 lam 左兩下咀唇：「咸左 d。」

我：「喂…唔係攞比你飲架！仲飲Q晒…」

Barbie ：「彭醫生唔喺度。」

我：「唔喺度？唔喺度唔代表你可以飲佢 d 湯喎…阿媽又話佢會夜 d 返既？」

Barbie ：「夜 d 番唔代表佢會喺診所。」

我：「咁你知唔知佢去左邊？」

Barbie ：「佢都咁大個人，唔駛咩都同我講，我會比自由佢。」佢既身份的確好特別，喺阿媽面前真係成個身抱咁，無計…阿媽驚阿哥搵唔到女人，而最接近阿哥而又最易上既女人…應該就係佢！阿媽話佢咀角有粒癦呢種女人最淫蕩！

我：「都唔知你講乜…咁點算呀？阿哥佢平日唔係喺診所就係屋企，家陣點搵佢呀？」

Barbie ：「你冷靜 d 先，一個人自殺之前通常都會去佢平時最鐘意既地方。」

我大驚：「自殺…唔會掛？阿哥好地地點會無啦啦自殺？」

Barbie：「好地地夠會地震，呢 d 野講唔埋，如果連搵個人傾計都難，又或者得唔到屋企人既關心，好似一部搵錢機器咁猛搵錢淨係養住幾個廢人，人生冇左目標失去左生存意義自殺都唔係冇可能發生。」

我：「吓…養住班廢人…」

Barbie ：「況且…我 feel 到佢今日唔係咁開心。」

我：「乜阿哥都會唔開心既咩？」

Barbie ：「就係咁先至奇！一舊飯咁既人竟然會唔開心…呵呵呵…」

我：「你笑咩呀？」

Barbie拎起手袋 ：「我收工嘞，bye！」

我：「喂…咁我點呀？」

Barbie：「呀係，聽日約左王太黎做治療，如果彭醫生有乜三長兩短，你返黎頂佢，你兩個一樣樣個客唔覺既，係咁先。」佢咁就走左，完全冇關心過自己老闆既死活。

頭先佢話…一個人自殺之前會去佢最鐘意既地方…但係我連阿哥鐘意 d 咩都唔知，又點知佢鐘意去邊？

忽然間電話響起，一睇個來電顯示，係阿哥黎！我即刻就喂落去：「喂！阿哥係咪你呀？咦喂乜咁沙既？」

我隱約聽到佢喺電話入面叫：「細佬…係咪你呀？」

我大叫：「哥，係我呀！你究竟喺邊？收得咁差既？你係咪用中國移動架？」

哥：「我唔知你講乜…細佬你究竟爭我幾多錢…沙沙…」

我：「哥…呢個時候你仲問呢 d 野？你究竟喺邊呀？」

哥：「我唔知…周圍都係草…沙沙…」

我：「你行山呀哥？」

哥：「係…行緊山…咦…前面有 d 數字…」

我：「係咪座標呀？哥你讀黎聽下啦！」

哥：「哦…咁你聽住…40342 40342 43243 43420 024 43420...」

我滴晒汗：「哥…你係咪玩野呀？」

哥：「咦…前面有人…」

我：「係咩人黎呀…」

哥：「喂…兄台…你點呀…」

我：「哥…」

哥：「你唔好暈住…你叫咩名呀？」

一把虛弱既男聲道：「丁…利…華…」

我：「丁利華？」我記得呢個名！因為我細個最沉迷既就係呢 d 解釋唔到既奇異事件。而呢個丁利華，就係2005年喺西貢行山報警之後失蹤既警員！網上邊仲有流傳佢報警時既一段錄音。因為呢段錄音有好多解䆁唔到既地方，例如一 d 唔存在麥理浩徑既座標，又或者丁利華喺電話入面一 d非常奇怪既回應，最後…就傳出西貢有結界呢個咁詭異既傳聞。

哥：「喂我唔同你講住…有警察…細佬你幫我睇住診所先…我好快返…沙沙…」

跟住我就聽到嗰邊個自稱丁利華既男人大叫『救命…救命呀…』跟住就係我阿哥把聲：「唔駛驚我係醫生…你比我睇下先…咦…哎…呢次仆街嘞…嗚……」

電話斷左線，我再聽唔到阿哥把聲。

不過可以攪到阿哥佢爆粗，一定係遇到 d 好唔尋常既事情…就好似…遇到呢個自稱丁利華既人！不過依家電話斷左線，切斷左我同阿哥唯一既聯繫，我再收唔到佢任何訊息…

正當我苦無對策，急到瀨屎前既一刻，我忽然靈光一閃…

冇錯！係電話！佢個手機係我幫佢set 既，用衛星定位就會知佢依家喺邊！

我即時喺佢診所入面既電腦上網，關閉左十幾個自動彈出黎既咸濕廣告之後… 咦？點解診所電腦會有咸濕廣告既？乜話…可以讓你生氣勃勃四小時？

我抄低左個網址之後，好快就查到阿哥部手機依家既位置…熒光幕顯示…阿哥佢依家既位置…係西貢！

而我連夜搭的士跟定位搵到入西貢，衛星定位最後既位置，竟然係食糖水出晒名既滿記。

點會咁…阿哥由細到大都唔食甜…

我有一種不祥既感覺！

有個一頭長髮，夜媽媽仲戴住副黑超叫長毛既伙記向我走埋黎：「哥仔麻煩你找左張單佢先嘞！」

我：「我都冇叫野食，找咩數呀？」

長毛：「你冇食姐，你大佬食左丫嘛！」

我：「你見過我阿哥？佢依家喺邊？」

長毛：「咁緊係見過架啦，唔通好似你咁黎運吉呀？」

我：「咁…咁你點知佢係我大佬？」

長毛：「鵰你兩個一樣樣，盲既都知啦！仲有呀，你大佬喺張單留低左幾隻字比你，唔信你自己睇下嘞！」

張單上面，除左榴槤班㦸、雪山黑珍珠配云哩拿雪糕同楊枝甘露之外，仲有幾隻字喺度，我一睇就認得…真係阿哥 d 字蹟黎！

上面寫住：「星，你幫我找數先，扣數，好快返！」

原來佢問我爭佢幾錢，係想扣數…

阿哥佢究竟去左邊？

待續

[ 本帖最後由 文字囚徒 於 2017-10-13 11:16 AM 編輯 ]

終於都有新野

創作…係需要時間的

皮蛋王又返嚟 正呀 加油 撐硬你

好好笑😂😂😂

啲對白抵死兼貼地，支持樓主

:fst_011:

睇得爽就好:fst_002:

[ 本帖最後由 文字囚徒 於 2017-10-13 11:10 AM 編輯 ]

👍👍👍👏👏