第十七章．微妙關係
個補習社女接待員叫Lia，去應徵Jenny間補習社嘅時候一心想做補習老師，因為佢間補習社比較出名，而且人工係所有補習社之中排名頭五高，但係Jenny認為Lia學歷雖然好，而且青春貌美，仍然未夠能力做補習老師。
不過Jenny覺得佢有潛質，就建議佢不如先做接待員，再吸取其他補習老師嘅經驗，等有機會再轉佢做見習補習老師，Lia都覺得留喺Jenny間補習社，好過再去其他補習社碰機會，就答應Jenny嘅建議。
之後佢每過一段時間，都會問Jenny幾時可以轉做補習老師，而Jenny始終覺得佢重係未得，所以一直都未應承佢，直到Newton話對佢有興趣，Jenny就乘機要佢接受潛規則，先會升佢做見習補習老師。
Newton就約定Lia去一間咖啡店見面，Lia去到間咖啡店，見到Newton已經坐喺度等緊佢，Newton見佢衣著簡單，臉上略施脂粉，對佢微微一笑，等佢坐低之後:「想飲啲咩?」
Lia問:「我地唔係去...?」
Newton話:「我想同你傾下偈先。」Lia話:「好呀。」但係心諗:「男人唔係一黎就想要搞嘢?唔通我唔夠吸引?」Newton大概知道佢諗乜，就話:「你呢種打扮睇落好舒服，真係好啱你，可以引死啲男仔。」Lia有啲開心:「其實啲男補習老師都成日撩我架。」
一男一女慢慢傾起黎，最後要走嘅時候，Lia話:「你幾時想要，都可以搵我。」Newton亦話:「好，我會叫Jenny好好睇住你，你會得到你想要嘅嘢，不過你自己都要努力。」
到左呢個星期嘅星期六，Audree攜同Newton，以盛裝出席一個由某集團邀請嘅晚宴，原來Newton遇到Jenny嗰日，就係上Audree個集團傾呢件事，表示唔想去個晚宴，解釋自己唔識點同上流社會嘅人應酬。
不過Audree話佢係自己唯一考慮嘅男伴，如果佢唔想去，Audree都唔會出席，Newton冇辦法，唯有笑一笑話:「怕左你啦，但係出醜唔好怪我。」Audree答應:「得啦，總之咩都唔關你事啦。」
當佢地啱啱行入酒店嘅大廳，迎臉而黎嘅係發出邀請嘅某集團新CEO，個CEO係個大約三十歲嘅漂亮女人，佢滿臉笑容噉同Audree擁抱左一下:「Audree姐，好開心你賞臉出席。」Audree話:「你正式接手爸爸嘅生意，我點可以唔黎。」
個女CEO跟住望一望Newton，問Audree:「呢位先生係?」Newton好有禮噉自我介紹:「我叫Newton，係Audree私人助理，負責幫佢執頭執尾。」個女CEO:「你客氣嘞，可以同Audree姐一齊出席，必定唔簡單，叫我Coral。」
Coral伸手同Newton輕輕握一手，再攬住Audree手臂:「我地入去再傾過。」兩個女人先行入大廳，Newton跟住佢地後面，望住Coral優美嘅背部，心諗:「一個精明能幹嘅靚女人，重要咁年輕已經位高權重，管理過百億嘅生意，做佢老公一定係好難。」
兩個大集團女CEO入到大廳裡面，自然有唔少其他商界嘅人湧埋去佢地身邊，Newton自己企埋一邊等Audree，忽然有人行埋佢身邊:「點解又見到你嘅?」Newton轉頭一望，竟然係著住一件性感晚裝嘅Jenny，Newton笑笑口話:「我都想問你，你今晚特別靚。」
Jenny一笑:「多謝。」再解釋:「呢個集團嘅CEO係我中學同學兼好姊妹，中學畢業後佢去左外國留學，不過我地一直都有保持聯絡，到佢大學畢業之後，返黎幫佢爸爸打理集團，依家重接手埋成個集團，所以佢邀請我黎佢今晚個宴會。」
Newton話:「哦，原來係噉，以前都冇聽你提過佢。」Jenny猶豫左一刻先話:「噉始終同佢係兩個世界嘅人，又唔想畀人話我黐有錢女啦，所以咪冇提囉。」Newton唔知點解覺得佢好刻意噉講，只係隨意話:「原來係噉。」
Jenny話:「噉你呢?照計呢啲場合唔啱你架。」Newton無奈話:「我都係被迫。」一邊注視Audree，Jenny跟住佢嘅目光望過去，即刻明白:「哈，估唔到連CEO都畀你搞掂埋。」
呢個時候，Audree已經應酬完嗰啲商界嘅人，轉頭一望，竟然見到Newton同Jenny有講有笑，即刻行埋去冷冷問:「你點解會係度架?」Coral聽到Audree，好快行過黎，握住Jenny隻手，有啲緊張問:「發生咩事呀Audree姐，Jenny係我好姐妹，係我邀請佢黎架。」
Audree黑晒臉話:「我知道你係主人家，請邊個人黎我冇權過問，不過我真係唔想見到佢，我諗我都係走先啦，免得你難做。」轉身行返出酒店，Newton唯跟埋佢一齊走。
出左酒店，Newton見Coral一直都冇追上黎，勸Audree唔好走，心內奇怪:「Coral將來一定會同Audree有過億嘅生意上來往，點解好似唔係咁緊張，反而著重Jenny多啲呢?」
[
本帖最後由 netsee 於 2017-8-18 05:08 PM 編輯 ]
