屋台橫丁
離開酒店，冒著冷風一路係小樽巿內信步向屋台進發。之前都提過，入夜後小樽有如死城一般，雖然當時都係大概9點左右，但城裡已經好似香港凌晨2-3點咁，幾本上所有店舖都已經閂門，好難先會見到有人行過，搞到我都好懷疑自己係咪手錶壞咗，拎手機出黎再對下時間先至確信真係「時間尚早」。
一個人在異鄉，加上係咁寧靜既環境，再加上陣陣冷風撲面吹來，感覺非常舒服放鬆，彷彿又返到去獨遊台灣果次既心境當中。雖然由酒店去屋台路程都有少少遠，但一個人行都算係一種享受(唔知係咪人老咗，真係開始有時會覺得寧靜都係一種奢侈，一種享受)。
行下行下終於到咗呢個旅遊書上介紹既「屋台村」，外面睇上去真係唔顯眼，入口處就係好似平時行街經過都唔會望既橫街窄巷咁，唔係有心去都唔會留意到。走入去條巷仔入面，即時係另一個世界。兩旁開著一間間小食店，再行入D有個好空矌既中庭，圍住中庭既又係一間間小食店，亦即屋台。
面對咁多屋台，呢個時候真係又「選擇困難症」發作既時候。再兜多個圈一間間睇下食乜。唔行由自可，行完之後真係症狀加劇。因為間間都OFFER唔同食物，有D做燒肉，有D做串燒，有D專食罐頭，有間做立食等等，間間都好似好吸引咁，而且望入去，好多入面既人都已經傾得好開心，而且大部分都好似已經坐滿咁。
既然如此，事情就變得相對簡單，就係揀間有位既入去。黎到呢間食燒烤既屋台外面，再睇睇個MENU。今次得自己一個人仲要又係唔識日文黎到D咁LOCAL既地方，真係有少少怯。係門外繼續扮睇一份唔係太睇得明既MENU睇咗一段時間，做好心理準備，深呼吸一下，鼓起勇氣拉開趟門，一入去，已有4人分佔兩邊坐位，我就揀門口對正食台既位置坐低，準備好好渡過是次日本之旅既最後一晚…
