愛上屋台
今次去5日4夜既北海道行程按照計劃去咗2個城巿，分別係札幌同小樽。其實每次去日本我都好鐘意去「屋台」，即係日本既大排檔。話係大排檔，但分分鐘D消費仲貴過一般食肆。但入到去呢D屋台，可以真真正正咁感受當地人既生活，而且野食真係相當唔錯，一般都好少會令我失望。係呢D地方食幾串串燒，飲返杯啤酒，你就會明白點解日本人咁鐘意去屋台。
今次編排行程時早已做足功課揾定札幌邊度有呢D屋台。北海道大概係因為凍既關係，佢地D屋台都入室，已經變成一間間小店，同係福岡真正街頭屋台路邊攤唔一樣。ANYWAY，第二晚如安排黎到札幌屋台村食晚餐，素當時大約9點左右，我地揀左一間食炸串既入去，入到去只見裡面既人已經酒過三巡，言談甚歡。當然，呢D咁細既地方一有人行入黎一定會成為全場焦點。第一，你一拉開門冷風就吹入去入面D人度，第二，地方窄，你點都要同人逼一逼先坐得低，第三，老闆會同你打聲招呼。
所以當我同女友行入去時，全場靜一靜望左我地一眼，不過好快佢地又回復到佢地自己傾既野入面。當然佢地傾D乜我地係聽唔明拉。坐定後同老闆打聲招呼問佢有冇英文MENU。結果係無…不過唔緊要，去過咁多次日本再加上MENU上有漢字，大概都知道有咩可以ORDER。
落好單之後，老闆用佢有限既英文問我地邊度黎。雞同鴨講咁勉強傾左一陣之後，老闆就好似有野宣布咁同其他食客講左一輪嘴野，當中我同女友只係隠約到有提到HONG KONG二字。之後其他食客就望住我地。小弟本身就唔係話好怕醜果種人，而且喜歡交朋友。呢個時候再聽唔明都大概估到老闆係介紹緊我地。所以我都同大家SAY左個HI。正好此時啤酒到，我就舉杯同佢地「乾杯」，其他人都一齊舉杯。一下子我地就叫做打成一片。
以下落黎既時間老闆就做左我同其他食客之間既翻譯，後來其中一位朋友就透過老闆同我地講話請我地飲頭一ROUND。我表示感謝同對方講左句「ARIGADO」，之後就係咁一邊食一邊飲一邊傾，而我女友就怕醜，全程幾乎無講過野，係久唔久同我講2句。坐左個零鐘，女友話悶嗌走，我心入面梗係想坐多陣拉，但知道佢開得口都「去意已決」。君子不立危牆之下，無為返到去有排煩，所以我同意走。臨走前同各人道別。大家都好熱情咁送我地并祝我地係日本玩得開心。表示謝意之後我地就敵離去。
今次係我去屋台咁多次食得 (玩得) 最開心既一次，真係好鐘意果種氣氛。當時我已心諗，走之前一定要再體驗多一下屋台文化。呢個時候我點都估唔到再一次入屋台，除左屋台文化，仲體驗到另一種日本「文化」……..
