怪獸家長已不會再像以前天生天養般，但相信小朋友學識最多嘅就是唯命是從，又或變成脫韁野馬！

我都好驚自己變左怪獸家長

師兄，好似Dragon師兄講，“提供機會同選擇.佢地有無能力,又或能力係點,唔可以太著意”，咁就冇咁易做怪獸家長。

要成日提住自己。

要懂得從子女角度去睇佢地面對既事，又要有成人成熟既智慧引導佢地成長。若果唔係危險既事，可以俾佢地嘗試。

所以宜家呢一代的父母真係唔易做，以前父母的角色就只係帶我哋嚟呢個世界，讀書就靠我哋自己，將來條路點行亦係靠我哋自己，但宜家的小朋友實在唔同以前，好細個就可能已經睇到佢哋潛能發展，再好好栽培，亦可能為佢地將來作好預備。

我黎講,我係天生天養.但人總會想下一代好既.其實而家我覺得除左成日講既買樓,政治外,我感覺後生仔係多出路.以前我地成年人會為小朋友舖條路讀呢樣果樣到大,出黎做野先搵錢.但而家,你諗到個apps,又或後生仔有頭腦,搵錢又或充實人生好似都可以比上一代早同快.思想正確,而家好多野都會係機會.

早晨咁多位,築跡步入最後階段,多謝咁多位.

………TO BE 下回……… ( 接近尾聲 )

*第10回，表白心情，情深表白。 上篇*

那時候的我，對阿N我知道那是愛，說明，那是愛，不是喜歡，啊……對，層次是不同的。在我來說，我可以喜歡很多東西，我會同人講我喜歡這，鐘意那。但愛，我實在很少說出口，什麼時候說出口?真的是一個很考人的問題。

********************************

大家還記得阿Ken同Cherry拍拖呢件事嗎?阿Ken，我一個唔熟的朋友。Cherry，一個非常標緻既台灣女生。如果Echo係代表野性美，Cherry就係代表純情了。阿Ken同Cherry佢地拍拖了，當時好快就全校都知道，當然有好些人都好失望啦，但學校根本就唔會有幾多個會好長情，當阿A被人追左，好自然下一學期出現B、C、D時班友又會繼續追過。而佢地拍拖大約一、兩個月後，故事才正式開始................

我好記得，果日我如常落堂過去library搵阿N，但見佢和幾位同學有點擔心的在窗外看著停車場，咁我就估有什麼不妥的跑上前看。 ( 我地library係可以望到停車場既，方便一放學就拎車走人嘛。 )
我: 咩事啊?
N: Ken同人係停車場嘈緊啊。 ( 我探頭向外一望，就望見Ken同幾個好生面口既人嘈緊，其中一個係Cherry既番薯大哥。講真，佢俾人嘈我無咩野，但同場仲見到Alan係度。 )
我: 佢地做咩啊?Alan都係度既?
N: Alan係落去勸佢地架~~~~ ( 我見到呢個情況，二話不說就跑左落去停車場了。由於圖書館既死角位，一開始我只見幾個人在推撞阿Ken，但當我跑落去停車場時，先知道情況比想像嚴重得多。 )

我跑去既方向，就係停車場既角落位，果度原來一早泊左5,6架車，當阿Ken佢地推推撞撞到附近時，果5,6架車都打開晒門，每架車都有4,5個人企左出黎，一下子我地就俾最少20~30人圍住。果時我已跑左埋去，對方為首果幾個在推撞阿Ken，我和Alan就去分隔住大家。大家有睇廿年前既古惑仔嘛?鄭伊健果套呢?果時係加拿大上畫，整個氣氛同畫面可以說十分相似。

我: 慢慢來，有事好說。 ( 我夠膽講，我既普通話係達到好普通水平................ )
番著哥: 沒什麼好說，你答我，你想怎麼樣? ( 番薯哥在質問阿Ken。而我和Alan繼續做分隔的動作。 )
Ken: ................... ( 條友居然唔出聲，低住頭等人打咁，但果時係20~30人，真係一人一腳佢都玩完。而我都想盡快搞清楚咩野一回事。 )
我: Alan，究竟發生咩野事? ( 我細聲的在問。 )
Alan: 阿Ken同Cherry散左。 ( 我呆一呆，心諗:咁快?拍拖1,2個月度喳喎。但講真，後生仔女拍拖，拍下散下好平常。咁當然，以當時情況，除非我傻左遮，唔係都唔會講出口啦。 )
番薯哥: 你在耍她嗎? ( 番薯哥直接推倒阿Ken了，那時我人已在當中，當然要將氣氛盡量cool down。 )
我: 冷靜點，有話好說。 ( 講完就有個貌醜非常的矮仔行出黎。 )
樣衰仔: 不用說了吧?現在就打啦!!
即好老實，我唔係未打過交，但如果俾20~30人圍果隻唔係叫打交，係叫俾人打。而且我計牌面，我形容一下俾大家聽，阿Ken，身形尤如新馬師曾一般，你大力D我估真係可以一拳打穿佢個身，佢可以叫紙版人。而Alan，佢靚仔架，成個陳鍵鋒咁，但亦即係唔多打得。如果你叫我走我估我實走得甩，但果時落得去就唔諗呢樣野。所以我還是那句。

我: 有話好說，不用這樣吧? ( 呢個時候總會有路人甲乙丙出場，而一個比我仲大隻得多既人行出黎，我記得，佢露出大大的胸肌同粗手臂架衰鬼~~~~師妹們可能好喜歡都未定。 )
大隻男: 這樣吧，我們雖然人多，但公平點，單對單吧。 ( 其實單對單絕對唔公平的，磅數唔一樣，妳唔會見美國隊長同HULK打掛，何況佢仲有成20~30人做back up添。而且佢講時係望住我地3人，唔係阿Ken一個，所以我同Alan都盡量推開大家，因為我知再係咁就一定會開拖，但正當呢個動作維持唔到幾耐之際。 )

遠處傳來一聲怒吼: 停手!!!! ( 唔單止我，所有人都停下來朝聲音方向望去。 )

此時原來魯芬從校門行出來，身旁仲有幾件咖喱啡磅住咁大刺刺行埋黎。
魯芬: 幹什麼了，要我說兩次嗎? ( 說時已站在我們身旁，一手推開最大隻同最醜果兩件。再望一望我同Alan。她稍為推開我再細聲說。 )
魯芬: 咩都唔好講。 ( 說完她就一手拉住番薯哥同原先最惡果件台灣仔埋一邊，真係好似做戲咁指天督地講左唔夠一分鐘。魯芬就拍拍番薯哥膊頭，再點點頭聽到她說一句交給她辦就好了，跟住其他人就真係散開晒。我看著台灣幫班人徐徐地行返上車及開車走了。此時魯芬再過來和我們3個人逐個說。她先對阿Ken開火。 )

魯芬: 靚仔你咩料，你同人一齊唔夠幾個月就飛人，你家陣係唔係玩野啊。 ( 呢種口吻，完全係唔客氣既鬧，阿Ken照樣無反應無還擊。雖然我唔喜歡阿Ken，但身為朋友見佢咁樣俾個女人鬧，我是反感的。 )
我: 男女拍拖既野，一齊分手好正常遮，我諗阿Ken都唔想既。
Alan: 係囉，佢地點解分手我地又唔係好清楚，未必係阿Ken問題呢。 ( Alan在幫口。阿Ken照樣無語。 )
魯芬: 仆你個街，唔清楚事既係你地兩個好無，呢條友識人地唔夠一陣就氹X人上床，上完床家陣就玩分手，條女第一次拍拖架喳，而家個女仔喊到死死下日日以淚洗面啊，知唔知?  ( 我聽後我同Alan都好驚訝，用質問的眼神住阿Ken，佢低下頭繼續無言。而魯芬就繼續。 )
魯芬: 你兩個唔該搞清楚件事先幫手好無?呢條友係唔抵幫既，我原本想由佢俾人打鑊甘就算，點知你兩個居然跑落黎幫人出頭? ( 魯芬鬧得啱，我今次受教，但我同佢唔熟，佢又做咩會出現呢?我在疑問…… )
我同Alan: 唔該晒。 ( 除左呢句，我諗唔到可以講咩。 )
魯芬: 唔使唔該我，你兩個亦無資格叫得郁我，你地要多謝就多謝佢地啦，係佢地好緊張咁搵我，我先落黎既遮。 ( 在圖書館行落黎車場的入口遠處，看見2個人，一個係Echo，另一個，當然就係阿N了。 )
我同Alan: 唔該晒。
魯芬: 得嘞，夠嘞，唔好婆媽係咁講同一句說話唔該，快D走。 ( 講完我同Alan就往入口處跑去。而2個女仔見到我地既舉動，她倆的反應又好不一。Echo順勢跑去Alan處，而阿N呢，她見我跑去，她反而推門走往圖書館方向。我拉開門追上，在關門離開眾人前一刻，我只知魯芬捉住阿Ken黎喪鬧，而Alan和Echo，他倆已走在一起，當時他倆如何我不清楚，我只知道，就是先追上阿N，我奪門而入後就見到阿N，她站在約門後10步的距離停下。 )

我: 阿N!! ( 她停下，沒轉身，依舊背住我。 )
N: ……
我: 唔好走…… ( 我在緩步向前。 )
N: ……
我: 我最初因為見Alan、Ken係下面有危險，所以先趕落去。佢地有事，所以我先幫忙。 ( 我在真心說出理由。 )
N: ……

阿N的沉默，是在嬲我嗎?當我行近不足阿N兩個身位的距離時，我見她依舊背著我在震抖，同時也在飲泣，她在強壓那種不安的情緒。這一切，都是因為我造成的。此時她在說。

………TO BE 下回……… ( 接近尾聲 )

[ 本帖最後由 dragonbone 於 2016-7-13 09:10 AM 編輯 ]

好緊張! 阿N個心離一離吧...

很期待下一集。

我都能理解阿N的心情，眼見自己鐘意的人有事，心裡一定係好緊張，會想辦法去做一啲嘢，希望可以幫到佢，亦會因為擔心，情緒低落甚至喊起來。