Kat姐何出此言呢？

我又冇接觸過那位男士，何來感覺？

有興趣知，因為社會上有好些出色的人也是gay的，我也認識些。

HAHA,我唔算情深既.我都有咸濕行先時~~~~

師妹呢個朋友既生活就夠正啦.
我識一個律師朋友,佢又係單身,仲要食齋,但運動好好,每年都好似師妹朋友咁呢度去玩果度去玩,我深信佢享受單身帶黎既自由.
佢平時既工作已經要好有交帶,條理.我估佢幾enjoy單身再黎既自在.
呢樣野,我成為人夫都明白.因為我係會等妻女瞓晒就享受做自己野,果種完全自主既自由空間,係非常之正.

無錯啊,咁上下啦.

HAHA......多謝先,係呢,好快180,我盡快update埋佢先.

其實對女性興趣不大,呢樣野真係唔係好出奇.
我係加拿大,阿N之後,都掛住玩多.(其實有點呻笨)

噫，玩乜先？

我想像當年師兄心情未回復，所以如此。

由於好快就180頁,所以會寫得有點多,有點長~~~~希望唔會太辛苦大家.

*第9回，Mocha*

男主角: Are you kidding? 被翻譯成: 妳是吉蒂嗎?
女主角: I am serious. 被翻譯成: 我是史奈兒。

************************************

教阿N學車，係開心既。大家可以想像下，一個平時好叻既人，面對住佢無把握事情既時候，佢個樣，係可以好天真同搞笑的。我記得，阿N已經搵師傅學左幾堂，有D把握了，就膽粗粗問我借車，而果日，我應承佢食完lunch就去附近較靜既住宅區練習。而記得當日一齊食lunch既，仲有Alan，Wayne同Johnny。當阿N去洗手間之際，我亦同呢幾條友講會去陪阿N練車。

我: ai,我一陣同阿N去練車喎。你地係唔係一齊架?
Johnny: 講真，你借個老婆去俾人揸?我真係做唔出囉。
Wayne: 有咩所謂，揸佢老婆果個係佢女人黎架嘛。
我: 你地食屎啦。
Alan: 咁學之前可唔可以車我返學校先呢?
我: 點解呢?
Alan: 我咁靚仔，我唔想死住喎，而且有人會傷心架。 ( 指的是Echo。 )
Wayne: 我啱啱先搵到女朋友，我更唔想死喎。 ( 指的是Jelly。 )
Jonny: 頂，唔爭在埋我，我仲有女要追架。 ( 指的是Wing。 )
我: 你班死仔，唔係咁無義氣下嘛。
Alan: 我地都係想俾機會你地獨處遮~~~~ ( 呢句都未講完。就傳來了殺氣…… )
N: 咩啊?我記得你地幾個今日lunch之後無堂架喎。 ( 原來N回來了。 )
Johnny: 無啊，但我一陣要交功課嘛，仲未做起，想係library度做埋佢。
N: 如果我無記錯，你既功課不嬲都係抄我果份架喎，係嘛? ( KO一個。 )
Alan: Echo好似約左我喎。
N: 唔使好似嘞，佢約左Cherry食lunch傾心事，連我約都推左講唔得閒，何況你? ( 又KO埋另一個。此時阿N望住阿Wayne，阿Wayne知道，阿N對Jelly講盡好說話所以佢地好順利成為一對。 )
Wayne: 哼，你班人無義氣架，N姐開車有咩咁大陣仗，我第一個上車。 ( 眾人投以鄙視既眼光望住阿Wayne。 )
我: 下嘛，咁型仔。 ( 我在笑笑口。 )
Wayne: 最多……最多一陣扣兩條安全帶之嘛…… ( 說完大家在笑，阿N在拍打Wayne，跟住我地就上車了。 )

在較靜人少車少既住宅區開車，係較安全既，如果你問我，唔危險咩?犯法架喎，sorry，犯規行為有邊個後生既未做過，太乖從來唔係我杯茶，何況呢D真係好小事。係開車時，大家都扮晒緊張，扣上安全帶。加拿大既住宅區，House通常都有埋地面停車場，而停車場又有籃球架打波用，所以會好多小朋友走黎走去，因而限速下非常之慢。

我: 原來呢度都幾靚架喎。 ( 我指既係環境，平時少去既區域。 )
N: 哎呀，你唔好分散我注意力啦。 ( 阿N少有地緊張。 )
Wayne: 係囉，阿N妳慢慢揸，我唔急架，係上堂前車到我返去就得架喇。 ( Wayne一唱。 )
Johnny: 係喇，只要係上堂前妳俾到份功課我抄就得架喇。 ( Johnny一和。而我在竊笑。 )
N: 你地兩個呀下~~~~
我: 呢個時候，慢，轉好，再輕輕力俾油去。 ( 我在講下自己心得，中和下氣氛。 )
Alan: 你估呢個車速，我地開去White Rock，要幾耐呢下。  ( 講完呢句，因為阿N回唔切軚，車輕輕鏟上了草坪。眾人隨即望住Alan…… )
Alan: 我錯，邊度都唔去，留係車度…… ( 就係咁，阿N練完第一日車了。 )

放學時，我見著阿N悶悶不樂，我就提議她陪我。一開始我沒說什麼，直到去返今日她開車時既住宅區。

我: 慢慢，細心留意。 ( 我用了說教的語氣，我看出阿N虛心在聽。 )

和阿N的相處，是簡單的，我不是不想氹她追她，而是我想，在她有需要時，我可以幫上忙，那才是真正的關懷。人總有不擅長的地方，對阿N來說，開車就是了，但她有個很值得欣賞的地方，就是會自我要求同克服。當日學完車，我們去到商場食野。

N: 請你飲咖啡。
我: 下，我未飲過喎。 ( 係，我從來唔飲咖啡既，咁耐以黎，打波做gym我都係飲開健康飲品，即好colorful果隻。 )
N: 咁我介紹呢個你飲。
我: 哦…… ( 我接上人生第一杯咖啡，星把佢咖啡，Mocha，Frappuccino )
N: 好味嘛?
我: 好味，但咁甜既?咖啡係咁架咩?
N: 呢隻有朱古力味，易入口D，你第一次飲，我估呢隻你會喜歡。 ( 阿N，佢會係好簡單既事情上看出用心去顧慮別人，咖啡第一次飲實在未必係我杯”茶”，但有埋朱古力加cream，我係愛上的，直到現在，認識我的人都知，我鐘意飲Mocha，不多不少都因為她。 )
我: 哦，咁妳果杯又係咩黎架? ( 阿N果杯明顯同我不同。 )
N: 我果杯?Cappuccino囉。 ( 我在飲，她也在，我想了想…… )
我: 點解Mocha咁好飲，妳唔叫呢?
N: 哦?因為我怕肥囉。
我: 下，乜妳唔係因為我第一次飲，所以先叫呢隻俾我咩? ( 車，等我仲以為佢會顧慮我感受添。 )
N: 係啊，但主要係你唔怕肥，我怕嘛。
我: 我點解唔怕肥呢?
N: 你都肥洛，唔使減啦，但我唔同，我要keep嘛。 ( N說時是笑笑口，我知佢在玩野。我也不介意……不……我不介意佢玩野，但我介意佢講我肥呢。 )

我唔會講因為阿N說話既原故，我走左去做gym，但我會講因為她，我決定操fit自己。那時候，我會成日同Alan去做gym的。

我: 係呢，你同Echo點啊? ( 我們輪流在舉鐵，也在互相訴說大家的近況，請不要以為女生才喜歡，男人偶然也會談談女人經。 )
Alan: 唔……好似係幾好，又好似唔係。 ( Alan在掙扎什麼呢? )
我: 即可唔可以講返D地球人既說話呢?
Alan: 佢想我同佢一齊，早幾日佢有主動開口問我，可唔可以做佢男朋友。
我: wow wow，Echo真係好主動喎，你要考慮D咩? ( 從Alan既對答，我當然睇得出佢無應承Echo啦，但一個咁可愛動人既女仔，Alan又諗緊咩呢? )
Alan: 我感覺總係欠缺D野……
我: 關唔關我表妹--- Lena事。 ( Lena，我表妹，上一個學期初黎報到，旋即引起唔少人既追求，Alan係其中一個，原先行得好埋，可惜不知何解，二人鬧反了，情侶做不成，就只剩朋友式的打招呼。 )
Alan: 可能係，可能我仲未放低佢，又或Echo係可愛卻唔係我所愛。
我: 都明白既。 ( 我在若有所思…… )
Alan: 你呢?你同阿N點啊? ( Alan在轉對象話題。 )
我: 我地好好，但太好，我有點唔知點出手。
Alan: 乜原來我地Dragon哥都有苦惱既時候架咩? ( 我知Alan不是在取笑。 )
我: 奇怪，我對其他女仔，唔會有呢種幻得幻失既感覺。
Alan: 係唔係對佢雖然了解，卻完全沒有把握呢?
我: 係，點解呢? ( 我在出奇Alan講中了point。 )
Alan: 鐘意一個人咪就係咁樣囉。
我: 講黎聽下。  ( 我望住Alan，在洗耳恭聽。 )
Alan: 你同阿N夾，大家亦對對方有好感，但夾得耐而無下一步，問題就會出現，就會有一種如果有進一步時，但對方原來唔想，就會連原來的朋友關係都無埋呢種擔心。
我: 你同Echo係咁樣?
Alan: 唔係，我知Echo鐘意我，我唔否認我對佢有好感，但我唔想因為人有我有，又或因為女生可愛吸引，就好似順理成章要係埋一齊。 ( 我明Alan講咩，係加拿大生活，出外靠朋友，心裡寂寞時，想有人關心關懷，男女拍拖係一件非常容易既事，而對象係Echo時，可以講大部份男生都夢寐以求添，但係唔係咁必然既事就要令佢發生呢?唔一定，至少Alan唔係咁諗，而佢，絕對有條件咁諗。 )
我: 我明，要人鐘意自己，有何難，要自己同時喜歡上對方，先最重要。而Echo，未俾到呢種感動你? ( Alan在點頭，係，無錯，女生喜歡浪漫，女生鐘意被寵被愛，理所當然，亦天經地義，但大前題係，要有呢位男生出現，男生有了對象，哪怕問題有多難，佢果副浪漫engine都會turn到最強黎run。Alan令我忽然明白了許多。 )
Alan: 係呢?一陣搵阿N?
我: 唔喇，佢好似約左Cherry。Echo呢?有無一齊，知唔知咩事呢?
Alan: Echo有同佢地一齊喎，但我無問，我仲煩緊Echo個問題未答呢…… ( 我在拍Alan的膊頭。 )
我: 俾人知一定丙鑊你。 ( 我既意思係，Echo咁可愛，就只會有Alan呢種人，又或用呢種理由而唔即刻應承，仲會有考慮既空間。 )

那時候的我，對阿N我知道那是愛，說明，那是愛，不是喜歡，啊……對，層次是不同的。在我來說，我可以喜歡很多東西，我會同人講我喜歡這，鐘意那。但愛，我實在很少說出口，什麼時候說出口?真的是一個很考人的問題。

………TO BE 下回……… ( 接近尾聲 )

[ 本帖最後由 dragonbone 於 2016-7-8 03:15 PM 編輯 ]

講中晒！

男女私情，像身外物