出差奇遇之一 阿姐阿姐
又係時候講古仔啦。今日跳一跳，講下呢兩星期阿星嘅遭遇。
最近出差，返咗大陸總公司受訓同開會。山長水遠去到冇雷公咁遠，酒店悶悶地，一邊做嘢一邊寫下古仔，冇咁悶。
係㗎阿星返到酒店都做嘢㗎，大瓜睇下阿星幾勤力。努力嘅孩子有獎勵，呢個不變嘅事實一定會不停發生。今次阿星喺出差途中遇到一個都係出差嘅女士，咁好彩，大瓜坐埋一班飛機，大家坐埋隔離，大瓜住埋一間酒店，你話吖，世事有冇咁轎呢?
話說阿星出差，因為職務關係，坐商務客位，闊落啲，又可以伸腳，阿星就最中意，人高嘛，冇法子。班機其實幾滿，但係商務艙只得阿星一個人，八個位，一條友霸哂成個艙，冇得彈。點知冇幾耐又有個女人上機，一抽二lung又拖隻拖喼咁，鬼咁論盡。見個阿姐唔知買啲咩一大包，又冇手將個拖喼放上頭頂。阿星見佢咁，做下好心幫佢將個喼放咗上去。
阿星幫佢放好個喼就返去自己位坐，再冇理佢喇。
阿姐唔該咗阿星，就坐咗喺走廊嘅另一邊，即係話阿星同佢只係隔一條走廊。阿星好奇望佢一眼，大約三十零歲，四眼，皮膚算白，樣唔算係靚，中等啦，六十五分。至於佢身材係點阿星真係睇唔到。
起飛啦，冇幾耐就有嘢食，阿姐同阿星嘅普通話差唔多，都係好過唔識講，知佢都係香港人。阿星有舖講嘢癮，大瓜睇咁耐都知阿星口水多過茶。坐成幾粒鐘飛機冇嘢講阿星會口臭。所以阿星就喺食飯嘅時候同阿姐傾計喇。
星: 你係香港人?
姐: 係呀。
都有啲戒心。
星: 去出差?我都係喎。
跟手俾張卡片佢。禮貌嚟嘅。
姐: 你公司喺我公司附近。
星: 係?我第一次去公司咋，啱喇，有個識路嘅人。
阿姐望下阿星，可能真係未見過阿星啲咁厚面皮嘅人。
阿姐知道阿星唔係白撞，都俾張卡片阿星。唔，高級銷售經理。
每個人都要做嘢，有一個職位，阿星都唔例外，之前公司坐個大位，依家公司做個二打六吧。反正公司有發展空間，做佢三年應該可以做返個director喇啩?
阿星最叻問長問短，有時候又真係幾討人厭。同阿姐傾計，有一句冇一句，阿姐答啲唔答啲。阿星又係衰嘅，見到人地面色不善都唔識收口，悶吖嘛大佬呀，成程機唔講嘢阿星會好悶囉。
阿姐俾阿星問到唔耐煩，直接同阿星講佢有嘢要做，攞咗部notebook出嚟打開準備做嘢，點知個空姐嚟叫佢收埋，呢班機係唔可以用手機電腦果啲嘢嘅。哈，連個空姐都幫阿星。阿姐望咗阿星一眼，好似有啲“你好嘢”咁嘅feel，點解阿星會知?因為阿星一路望住佢囉。阿姐一於唔理阿星，合埋眼養神，冇幾耐空姐嚟上飛機餐，阿姐真係訓着咗，空姐又冇叫佢，阿星見到咁，咪拍下阿姐，問佢要唔要食嘢，阿姐開眼望下阿星，擰轉身唔啋，再訓。
阿星見到咁，都一於好少理，食飽先講。商務艙嘅飛機餐比起經濟艙好少少，味道都還可以。阿星一路食到㗳㗳聲，一路唔唔唔咁讚啲嘢好食，唏，你估真係好食咩?扮咋，引下個阿姐啫。
冇幾耐，阿姐果然忍唔住起身，望下阿星，阿星望下佢，指下個飛機餐，又豎起隻手指公讚。喺阿姐未嚟得切反應嘅時候，阿星已經叫咗空姐埋嚟，同空姐講果位小姐話佢唔食佢個餐喇，話俾埋我食，你攞俾我啦。空姐有啲猶豫，望下阿姐，阿姐有啲唔高興，叫空姐唔使理阿星，攞份餐俾佢。
星: 係囉，食埋先再訓嘛!
阿姐唔啋，靜靜咁食嘢，冇再啋阿星。
一路無語，直到落機。阿星好有風度咁幫阿姐攞返件行李落嚟，跟住自己有自己行人。等埋行李，又見到阿姐喺度講電話，一路鬧點解冇車嚟接佢，咁夜咁話。阿星望下個鐘，都差唔多半夜一點，好彩阿星有人嚟接，唔使發老脾。
見個阿姐咁徬徨，又喺機上知道佢同阿星住同一間酒店，阿星又屎忽痕走去同佢講不如送埋你去啦，橫掂同一間酒店。阿姐猶豫咗一陣，見阿星已經上車，就將行李都推過嚟。
上咗車，阿姐坐埋一邊唔出聲，阿星見佢咁，就同佢講: 喂，車費一人一半喎。
阿姐窒一窒，望住阿星唔知點答好。
星: 一於咁話啦，嚟，俾你電話我，遲啲同你收錢。
一路講一路遞個手機俾佢入。
阿姐冇諗過阿星咁快手同佢收錢，見阿星咁直接俾個手機佢，就好自然咁跟住阿星嘅指示，入咗佢電話號碼落阿星手機度。阿星隨即打俾佢，阿姐電話響，一喂，阿星就話: 記得俾錢呀!
阿姐忍唔住笑咗出嚟。吖，又笑得幾鬼甜喎。
[
本帖最後由 star_platina 於 2016-6-28 02:19 PM 編輯 ]
