（二）鬼影
天水圍某屋邨冬菇亭。
『阿大！大事不妙喇呢次！』遠處忽然響起一輪急速嘅人字拖腳步聲，朝着冬菇亭襲來。
已不知重復了多少個年頭，一任那行人路上一班師奶熙來攘往，一袋二袋，百年如一日，屋邨冬菇亭永遠有一班死老鬼喺度煲烟吹水。
『哈！係咪阿肥婆終於知道你成日去偷食？』
『吓？...你你...你點知㗎？啊！係唔係你條撚樣爆我大鑊？』
『挑！你條友去親叫雞都打鑼打豉，慌死人唔知咁！重使人爆你大鑊？』
『唉......我邊度係去叫雞吖！我見呢排Ｄ大媽＂當造＂，食咗件之嘛.....』
冬菇亭永遠係一個資訊交流嘅平台，係一個解決困難嘅地方，亦係一個共商大計、爆發無限可能性嘅基地。
『唉......個衰婆話要我寫個report比渠呀！』只見那港佬滿頭大汗，身穿10號仔紅色背心，鴨屎綠運動短褲，渾身肌膚雪白晶瑩，可以去代言神仙水。
『哈！咁我就唔驚喇！』阿Chris徐徐點上一支萬事發：『寫個report有幾難呀？叫得你寫report，即係擺明放你水啦！』
『咁咁...咁到底呢鑊野點撚樣拆先？』
阿Chris冇再望住10號仔，自顧自吞雲吐霧，若有所思。
『阿大！你呢次點撚樣都要幫我拆呀！會死人㗎！』10號仔急如一隻熱水中嘅青蛙。
『敵勢雖急，然而亦必有其不備之處也.....何不斷其糧草？』阿Chris旁邊另一個港佬忽然答嗲，之不過答到九唔撘八，唔知似乜....
『阿詩人！唔係連你都玩鳩我下嘩？』
原來呢條中坑個朵叫做＂詩人＂，專寫鹹詩，為人放蕩不羈，時時生活喺自己嘅世界入面，腦電波異常強烈。有幾強呢？強烈到可以對一Ｄ自己冇興趣嘅野不聞不問，視而不見，只專注於一Ｄ自己有興趣嘅topic，心念翻驣跳躍，直如一隻馬騮。
詩人忽然放低手上果本古董龍虎豹，似答非答：『 唉！......唔通Pink lin依家真係已經絕咗種？！.....人類對地球所犯下嘅罪惡呀......已經到咗無法容忍嘅地步喇.....』
只見果條10號仔兩眼圓睜，吹到脹咗.....
阿Chris於雲霧之中徐徐吐出一句：『波，係圓嘅........』
『波係圓嘅，即係阿媽係女人啦。咁到底㸃先？』
『阿劍波，枉你個名有個波字，你都唔曉得轉彎嘅！』
阿10號仔原來叫做劍波，卓號＂10號波＂，平時冇事冇幹嗰陣就事事做＂隊長＂，指指點點扮鳩哂意見領袖。咁有事有幹嗰陣呢？大件事囉！Ｄ風大少少都比渠吹到10號風球打到嚟咁........。
『喂阿靚女！同我寫杯＂熱撚死＂吖！』阿Chris之之由由，回身向住個新移民女侍應嗡咗句。香港地日日新鮮，渠如果講話要杯＂熱檸水＂，人地反而可能聽唔明。
10號波欲言又止，等緊阿Chris繼續講落去，冷不防果條詩人又冇頭冇尾咁無定向答嗲：『唉！....想當年你出世夠一百日嗰陳屎，你老竇老母將Ｄ顏色筆呀、介指呀、算盤呀擺喺你面前比你揀，你好揀唔揀你個凹家剷，你揀個乒乓波！！！』
『咁依家即係點樣呀你地！』冬菇亭中迴蕩住10號仔聲嘶力竭嘅呼喊：『屌！我屌！好撚吊詭呀！好撚屌鬼呀你兩條友！』
冬菇亭有鬼！
冬菇亭有班死老鬼！
(鏡頭慢慢Zoom開，只見落日晚霞，夜色四合，黑暗俏俏襲來，將那個叫10號仔的港佬的哀號聲吞滅..........)
欲知後事如何，且聽下回分解。
