原來呢度咁多人分享故事，等我都寫下我啲情屎，等大家笑下先得：
十六歲，係一個尷尬年齡，話大唔大，話細唔細。好命的，已經有女朋友或讀書成績好，唔好命的，就混混岳岳，書讀唔好，女溝唔到。我係唔好命果隻，書又讀唔好，仲要係和尚寺，冇女溝。細個成日諗，係咪我樣衰，冇女仔中意？十五歲果陣，肥仔一名，不過生得高大，中三已經全校最高，所有師兄都靠邊站。中三讀書唔好，老豆就一腳踢咗我去英國，同我嘅同父異母阿哥家姐住。叫我去學下外國經驗，書讀唔成都要識講英文咁話。自問英文每次測驗都排名一二…………由尾數上，所以去英國讀書等如送我去死。
去到英國，當然人生路不熟，十五歲嘅中三學生，又識得幾多英文呢？都係死路一條，又唔識聽，又唔識講，點學法？阿哥同我安排咗一間政府學校，梗係啦，免費喎。慘嘅係我，成間學校得果三個中國人，最大係我，另外兩個得十一歲同十三歲。等我留意下啲鬼妹同學先，原來啲鬼妹都唔係個個靚，有啲都好扒下。我讀果班好似冇乜靚女，睇嚟都係食白果，又係食自己過日子。點知原來點完名就轉班，去第個班房上堂。咦，有女睇喎，第一個睇到嘅，高頭大碼，波大腰…………都好似粗啲，棕色頭髮，成個英國妹樣。後來熟咗摸過先知佢條腰一啲都唔粗，係啲冷衫外套影響咗我嘅視線。佢叫Sharon，正式英國妹，高高大大，啲鬼仔叫佢科學怪人(Frankinstein)，對我嚟講就冇乜問題，因為全校只得一個鬼仔六呎七高過我。Sharon份人好扺得諗，見我唔識英文就一馬當先走嚟教我做嘢，手口並用怕我唔明。查實唔明都冇乜所謂，望住佢咁落力講解，又指手劃腳又哄到好埋咁同我用埋一本課本。啲鬼妹的確好早熟，細細個就用香水，雖然到我依家嘅年紀，會覺得佢用嘅香水好俗，但係十五歲嘅我又點識呢？只係覺得好香，本身已經唔多識聽佢講乜，聞到陣女香就更加不知所云。
我記得Sharon曾經話都我唔專心讀書嘅，老實講，佢坐隔離跟本冇辦法專心。我成日都想摸下佢，不過對一個十五歲又未經人事嘅我嚟講，好難做得出。偷睇老頭啲AV就睇得多，實戰就未試過，諗起以前中三啲同學有女朋友，又摸又錫，錫完摸完返嚟唱，我真係妒忌又羨慕。話咁快又落堂，又要走房，原來Sharon又同我一科，不過今次佢冇同我坐，佢同其他女仔friend一齊坐。我自己一個坐最前，咩人都望唔到，等多一陣，見到隔我兩行最前排坐咗個金絲貓喎！咀大咗啲，直頭可以叫ear to ear，但個樣就正到呢，似我細個睇果啲閣樓寫真集入面果啲金絲貓，身材就唔知嘞，又係冷衫外套咁。往後嘅日子，我成日楝住隻右手托住個死人頭向左睇住佢。起初佢望下我，我望到佢望，死命咁望實佢，佢即刻唔敢望我。久而久之，佢慢慢習慣咗我咸濕嘅目光（之後啲女仔係咁話我，話我對眼好咸濕）會不時互相對望，望到先生叫嚟鬧為止。呢個女仔叫Helen。
第三堂係上英國文學，我識鬼咩，老師叫咗個四眼妹陪我讀，佢短短頭髮，對眼好細，細到有時幾乎以為佢訓咗覺。Emma都係高高瘦瘦，不過睇落似係高瘦平。冇香水，冇美豔，清清地，純如白水。但有一份温柔，一份嫵媚。
其他堂唔記得嚕，總之我呢一年就圍繞喺呢三個女仔之間。
[
本帖最後由 star_platina 於 2016-1-8 03:55 PM 編輯 ]
