大家好，我真係好耐無update，早幾日講過會更新下我呢半年同佢既生活。
好耐以前同各位師兄拎過d意見，得閒放假做乜好呢？
係香港，由於我同佢呢種關係都唔係好見得光住，好難可以同佢大搖大擺咁行出街，就連一齊落街食野都好難，你地知嫁啦，一棟大廈最八卦就係果d終日無所事事，掛住打牌過日晨既師奶，比佢地知道左，一定會好多閒言閒語，由一樓到二十幾樓佢地都識得，真係超厲害！
同埋有樣野，唔知大家平時生活有無呢種感覺，同一個女仔未開始時，即係做朋友啦，大家可以無乜顧忌，但當大家中間出現左感情，就變到有d野咁。
就好似我咁，未同佢開始前，我同佢都係鄰居關係，果時同佢一齊做GYM，一齊出出入入都唔覺得有問題，但依家開始左，就會好避忌咁，呢d係咪叫心虛呢。但講真，我又無所謂，但始終佢都係離過婚，又有個女，年紀又比我大，比人知道晒一定係佢受晒，我又唔想佢比人傷害，佢以前已經傷過一次。
有一日，我問佢:「妳會唔會唔開心，我地依家偷偷摸摸咁？」
佢就話：「比人知咪重衰，妳知香港人幾咁八卦嫁啦。」
好彩佢都話無問題，可能因為佢都怕比人講啦，
我就行埋佢度從後攬住佢話：「妳放心，我會對妳好好，彌補呢樣野既唔開心。」
然後，我係袋度拎左兩張去澳門既船飛出黎。
「妳睇下係咩黎？」
「嘩，你幾時買既嫁？」
「早兩日咋嘛，去到果度我地咪可以肆無忌憚咁拖手，行街，做咩都得。」
「傻瓜，你又知我實得閒嫁喇？」
「妳唔得閒咪買過第二日囉，好小事者。」
「傻瓜，晒曬d錢，留返d錢去到請我食野好過啦。」
就咁，我地就開始左我同佢既第一個旅行喇
