期待
不得不承認，收到Mandy短訊之後，心情十分興奮，亦都十分期待。究竟佢一句「返黎揾我」令人有好多想像空間。我努力咁抑壓自己嘅興奮，因為講到底，佢句「返黎揾我」其實同「得閒飲茶」可能係同一類嘅敷衍說話。如果希望越大可能失望越大。所以我決定揾d野做，唔好俾呢件事充斥我嘅腦海。
自己一個人行出酒店揾野食。經過幾日獨處之後，我發覺一個人去旅行最大問題係食飯。除非你係去老麥嗰類快餐店，否則你想正正經經走入一間餐廳食飯嘅話，一個人係叫唔到餸，好多想食嘅野都係食唔到。所以呢一晚我又遇到同一問題。遠道而來黎旅行，當然我相信無人會想餐餐老麥KFC。所以我都係去食下肉燥飯類，起碼叫台灣地道食品。
食飯期間一直都無短訊收到。其實話唔去諗，除非做和尚，否則呢個情況下又點可能做到心如止水。突然諗起關心研一隻金曲入面一句歌詞成餐飯就「望著電話做人」。
食完飯之後，漫無目的咁喺街上閒逛。經過7仔，突然諗起係咪要買定d乜呢。儘管呢一刻唔確定有乜野會發生，但有準備總比到時拿手唔成世好。所以就入咗7仔買咗幾罐台灣啤酒再加一盒套套。之後就滿心歡喜咁返酒店。突然覺得世界係美好嘅。。。
