「佢。有。女。朋。友！！！」
呢5個字就好似一巴打醒左我，然後再跌入深谷一樣，但係朋友面前我仍然要扮鎮定。
我「車～關我咩事啫！」
朋友「無事就ok啦，咁唔阻你啦，繼續搵周公啦你！」
收線後，我訓係張床，感到無比嘅失望。我唔介意繼續dry，但點解難得遇到個令我心動又啱key嘅人，佢偏偏係unavailable! 琴晚嘅一切只好當發左場夢！
過左幾日，係公司埋頭苦幹做緊嘢時，突然收到G電話。。。
G「Hello Christy!」
我「Hello! 搵我咩事？」
G「上次同你講過嗰套戲，今個星期四上喇，想約你一齊睇。」
我「唔... 禮拜四呀... 我驚我要OT 喎。」
G「咁星期六朝你得唔得閒？」
我「星期六... 你... 唔洗陪女朋友咩？」
佢停左幾秒無出聲。。。
G「佢... 要返工，同埋佢唔鍾意睇呢類戲... 不過如果你唔想，我自己去睇啦。唔阻你做嘢喇，bye bye！」
我未嚟得切反應，佢已經收左線。
嗰一刻我個心十五十六，我係咪太老實呢？係咪唔應該篤穿佢呢？但我真係唔想做第三者，所以算啦，就當有緣無份啦！
之後個星期日，同屋企人飲完茶，見無嘢好做就突然心血來潮想去睇嗰套戲，但套戲比較冷門，加上又臨急臨忙好難搵到人陪我睇，所以我就自己走左去戲院。套戲雖然冷門，但因為得兩間戲院上，所以都好多人，好彩我單丁位先買到飛。睇完出嚟，準備行去巴士站搭車，竟然見到個人好似G，睇真d原來真係佢！
