第十三章
入夜, 可兒走左落街, 正不斷打住電話比巧兒, 已經打左兩日, 電話終於都接通左。
「可兒, 可兒, 妳去左邊度呀? 呀媽已經搵左妳兩日嘞, 嗱, 妳而家咩都唔好理住, 妳先聽呀媽講,記住, 妳千祈唔好再番黎呢度, 而家唔好問我點解住, 總知妳就聽呀媽講, 有的咩事嘅, 呀媽自然就再會聯絡妳架, 記住要開住電話呀!」
可兒收左線後, 巧兒就正一面妄然咁, 病房內, 巧兒身邊嘅子健同芷姍正陪緊巧兒。
芷姍關心地問住, 「巧兒, 咩事呀? 做咩聽完個電話就呆哂咁嘅?」
巧兒搖住頭, 「呀媽話…叫我…千祈唔好再番去住緊果度!」
巧兒再繼續呆住, 子健同芷姍正互望住, 隔左一陣, 芷姍同巧兒講。
「巧兒, 不如咁啦, 出院之後, 妳就…黎我屋企度住住先, 橫掂我屋企剩係得呀爸呀媽同我, 而間屋又有成三個房, 咁到時妳又可以成日都陪我傾偈, 而我又樂得響屋企度有個伴, 子健, 妳覺得我呢個提議好唔好呀?」
子健問巧兒,「巧兒, 妳就先去住芷姍屋企度住住先囉, 好唔好呀?」
已經別無他法, 而且難得芷姍又肯咁做, 巧兒亦樂得應承, 出院之後，巧兒亦真係去左芷姍屋企度住, 已經過在半個月時間, 呢一晚, 子健芷姍同巧兒三個人正一齊出外晚飯。
子問笑住問,「係呢芷姍, 復活節假期我地有的咩細藝好呢?」
芷姍諗左一陣, 「呀, 子健, 不如我地帶埋巧兒一齊去日本度玩番幾日吖!」
「好提議喎, 巧兒, 妳以前有冇去過邊度旅行呀?」
巧兒搖住頭, 「我…咩地方都未曾去過, 而且, 我亦都無任何嘅旅遊証件!」
芷姍同巧兒講, 「咁不如姐姐就先同妳去申請左旅遊護照先, 咁復活節假我地咪可以一齊去旅行囉!」
巧兒從來諗都未諗過自己可以有機會去日本旅行, 呢一刻聽到咁, 簡直有的唔相信呢個會係事實, 終於, 芷姍陪巧兒去申請左護照之後, 旅行團亦都報左名, 到左臨出發嘅前幾晚, 巧兒已經興奮到開始瞓唔著咁滯。
到左旅行出發嘅大日子, 呢一朝早, 陽光普照, 三人去到機場大堂嘅時候, 巧兒已經興奮到攞住芷姍部相機係咁四圍去影住相。
芷姍見到咁, 跟住就笑住同巧兒講, 「巧兒, 不如我搵個人幫我地揸機, 就等我地三個一齊響呢度影番一張合照吖!」
子健叫左個路過男仔幫手揸機, 跟住兩個女仔就企響前面, 而子健就響後面搭住兩女嘅膊頭, 卡擦, 攪掂, 睇番張相, 三個人都面掛住笑容, 但似乎最開心果個就係巧兒咁, 上機嘞, 子健同芷姍專登留左個窗口位比巧兒坐, 飛機終於亦都要起飛嘞。
巧兒居然有的驚嘅感覺, 但隨住飛機飛到半空之後穩定落黎, 巧兒已經正全神貫注咁望住窗口出便, 到左日本後, 第一日巧兒就已經玩得十二分之盡興。
旅行團番到酒店之後, 三個人協定芷姍就同巧兒同一間房瞓, 而子健就好好彩, 居然可以自己另外一個人瞓響一間房度, 而唔使同其他人一齊同房。
已經玩左三日, 第三晚, 佢地三個響東京度夜晚自己出左四圍去玩, 三個人就去左一間日本餐廳入面再去食和牛, 的日本清酒似乎比起其他地方嘅更見好飲, 連巧兒唔識飲酒嘅都有試埋一份。
已經又飽又攰嘞, 三個人正帶住醉意咁番返到酒店之內, 子健開始連企都企唔穩咁滯, 連芷姍都差的扶佢唔住, 巧兒見到咁, 亦都上前幫手扶埋子健另一邊, 上左樓後, 已經頭痛左好耐嘅芷姍, 當行到房間門口之後, 卒知都係頂唔順咁要同巧兒講。
「巧兒, 我個頭好痛, 我真係要番入房度先, 妳扶埋子健入房之後, 一陣妳就自己番返入黎啦!」
芷姍開左房門之後, 跟住就遞左另一張匙卡比巧兒, 巧兒就繼續扶住子健番返入佢個房間之內, 入到房後….
子健已經開始要嘔吐大作, 「唔得, 我…要嘔嘞…..」
「唔好嘔住呀, 我扶你入去廁所度先好嘔呀!」
巧兒正扶住子健趕住入去廁所之內, 子健搭住巧兒個膊頭, 正向住廁所內係咁嘔住, 已經差唔多嘔完, 子健亦已經醉到連都企都企唔穩咁滯, 巧兒正博哂命咁抬住子健行番出廁所之外。
「好重呀, 仲差少少就到床邊架嘞, 快的行埋去啦!」
終於捱到床邊嘅時候, 巧兒正要將子健放落床嘅時候, 子健原本一隻手搭住巧兒, 乘住跌勢, 子健突然將巧兒成個攬實。
「芷姍, 唔好走啦, 今晚就留響度陪我瞓…嘔喔….」
子健攬得巧兒好實, 而巧兒亦正責住響子健嘅身上。
(待續)
