抬頭一望，竟然係P！
咁有緣咁都撞到？P話因公司有緊要事，所以個trip延遲左，而家咁有緣撞到我，要我一定要帶佢周圍去。當時我都好開心見到佢，所以我都拍心口應承左佢。
無幾耐就登機，不過佢坐business我坐economy 哈哈！中途佢都有過嚟我個位傾左陣，到港後拎行李時佢又特登等埋我，不過我地唔同路，所以我俾左我電話no. 俾佢之後我地就分手，佢約左我兩日後見，因為佢有公事要處理，而我走左咁耐，都要抽d時間陪下屋企人同男朋友。
因為係平日嘅晏晝機，無人嚟接我，原本都有諗A（男朋友）會俾surprise我，但結果都無，佢份人就係咁，無d情趣。其實今次同K件事之後，我都有好好諗過同A段關係，我地一齊左年幾，一直都好平淡但穩定，佢對我算好，份人又好穩陣可靠，所以我都覺得係可以付托終生嘅人。但今次之後，我發覺自己其實唔算好愛佢，我又仲後生，係咪要咁快就定落嚟呢？加上我同佢性生活麻麻地，而家先發覺e樣野原來對我係幾重要。所以我都想返來後同佢講清楚。
係巴士一路諗緊同A嘅事時，忽然電話響，一望係K個台灣電話！佢睇時間知我應該返到，仲問我點解唔打俾佢報平安？我話佢知竟然撞到P，佢一聽就好緊張，話一定係P搵人查我班機，特登同我搭同一班機，叫我唔好同P出街，更加一定一定一定唔好上P酒店房。我覺得佢諗多左，同埋佢又唔係我邊個，咩事要咁緊張？
收線之後我諗番當日同P食lunch時，又真係好似有提過自己邊日走，唔通佢真係特登扮偶遇？
