thank you your report:smile_40:

唔好期望太高，就算講都係點到即止:smile_30:其他自己想像下

處唔係俾佢破，所以唔洗封老毛俾我:smile_30:

我做細舖，有別於啲大型連鎖式嘅電腦舖，多數都係熟客嚟搵下我吹水，訂嘢，

曬下佢啲OC( 超頻 OverChocking ) 成績 或者 研究下啲硬件嘢 ( 硬改 )，

小弟就興趣多多，所以同啲熟客無所不談，但對有啲客我會好識耍太極耍走佢，

但第二日或者隔幾日佢又會返嚟搵我...

咁果個禮拜一路都有同佢ICQ，傾嘅其實都係啲家常便飯，

食咗啲咩呀，想去邊度食嘢，係公司發生啲咩事之類，

而S本身當時係一個叫幾開朗熱情嘅女仔就係唔識拒絕人，

可以係佢字典入面係無拒絕依兩個字( 識我之前 )，

成日都招致好多狂蜂浪蝶令佢好困擾，

我係果一個星期係ICQ入面同佢傾下，我有時點樣對啲客耍太極，

佢又好有興趣咁係咁問，所以我就係咁講，

間唔中放Lunch果啲時間食完飯之後，

佢知我有返工都會打嚟我公司搵我( 我一個禮拜返四日 )，

如事者，我記得果日係禮拜五，佢話佢唔舒服所以放假，

係屋企抖下，果日我就開緊工，一到兩點都完全無嘢做，依個鐘數只不以講搵隻烏蠅拍下都無，

咁就同佢傾電話，傾咗半個鐘佢就話要落街買啲嘢，叫我等佢一陣，

隔咗成個鐘我見佢無哂反應，但ICQ又ON緊LINE，我以為佢暈咗係屋企啦，

所以打俾佢，不過無聽，我就對住個MON係度心諗，唔係真係暈咗呀？

忽然有人拍門口塊玻璃，結果係佢嚟咗，

隔住塊玻璃門，當我見到佢，見到佢仲識笑，我就放鬆哂，

佢打開度門，入到嚟，第一句就話。

S：「你啱啱打咗幾次俾我，搵我有事呀？」

咁我講笑咁講，枱頭放咗張外賣紙( 當日用嚟抄低佢電話果張紙 )
我：「係咩！我打去叫外賣，果間茶記打幾次都唔聽我電話，仲話歡迎外賣喎，...乜我原來打錯電話俾你呀？」

佢見到真係有張外賣紙係枱，就扁哂嘴個樣好失落
S：「原來你唔係搵我，仲等我過嚟搵你悿...」

我就即刻醒水反返轉張紙，俾佢睇下張紙係寫咗佢電話上去然後，氹返佢
我：「講下笑咋，我ICQ你又唔應，打俾你又唔聽，以為你唔舒服到暈咗係屋企咋！」

佢即時甜笑講
S：「原來你都算關心我嘅！」

我就拎我部當年嘅神級機款就算IFC頂樓掉落街只會掟死人都唔怕跌爛嘅3310出嚟

佢呆咗一呆，就問
S：「點解你有電話嘅？公司架？」

我就答
我：「我公司咁Cheap點會出部電話俾我丫....自己架，尋日先開台」

其實我都唔知係巧合定咩，事前我都唔知佢都係用Orange ( 當年除咗ICQ之外，就係搵同台SMS )

我拎起張外賣紙 ，就打俾佢，

佢見到我 電話 no.時又講咗一句好似錯相識嘅說話....
S：「嘩你電話no.咁靚嘅又...」

我其實都係咁啱撞正依個no.，一見就指定要依個，
我：「哈哈！係咩...無呀咁啱合眼緣咪揀咗佢囉。」

然後佢都未答我就有個客推門入嚟，

佢望一望個客，然後就好識趣咁話
S：「咁我唔阻你做嘢喇！走先喇我拜拜。」

我當然有一刻嘅失落然後同佢講拜拜，之後就發揮我專業而高強嘅耍太極本能，好快速咁耍走咗個客( 條友我仲記得佢咩樣，經常入嚟運桔 )

即刻就SMS S.，問佢走咗去邊( 我當時學嘢真係好快，我花咗一晚時間嚟學識電話個筆劃輸入法，
當年我亦都係自學倉頡，打字最快果陣每分鐘可以83字，我業餘有幫啲出版社將手稿入電腦，
當時依個副業幾好搵，好過依份嘢收入，但宜家20字都可能俾多咗我 )

佢好快就答返我，我係你公司附近呀...

然後我就叫佢你得閒可以嚟坐陣架，你今日又唔舒服下次唔洗突登走開，

佢轉過頭又返嚟，今次我認真咁望咗佢當日嘅衣著，
淡色嘅連身裙，入面著吊帶底衫，化好淡嘅妝，同好熟悉嘅香水味
S：「我又返嚟喇！」

突然有一剎那嘅衝動問佢
我：「歡迎你返嚟，不如你等我收工一齊去食飯囉...既然你出咗嚟，不如你去行下街，如果真係唔舒服就返屋企休息，我收工打俾你睇你係邊啦！」

然後佢就望住我...
S：「你宜家係唔係叫約我去街呀？」

我：「of coz！你唔得閒？」

S：「唔係呀！今晚食咩好呢！等我諗下先，你放工再話你知！咁我去行陣喇！」

之後就好漫長好漫長好漫長，時間過得好慢好慢，咁挨到收工，
第一時間就打俾佢，
我：「我終於收工喇！餓到肚都扁咗...今晚食咩好呢...」

然後我聽到佢笑咗一下
S：「哈.，你咁瘦，餓唔餓個肚都扁架啦...嗯...我地今晚去食日本嘢囉不如。」

我當時算叫做收入唔錯...絕對唔係一個一般嘅中學生( 你要記得我係連學都唔返走去返工 )
我：「好呀！我都想食。咁你宜家係邊？」

S：「我宜家係尖沙嘴呀，我過嚟搵你？」

我：「緊係唔好啦！我宜家走得喇，我過嚟搵你啦」

咁一路傾電話，一路坐地鐵落尖沙嘴，我記得當時啲地鐵隔音好鬼差，架車一郁就嘈到拆天，

快活不知時日過，轉下眼就到尖沙嘴，我就叫佢不如係海港城等...

我當時腳都算長，所以行嘅速度同跑其實差無幾，

好快就到海港城，接住就當然見到佢，我果陣唔算叫太高，175左右( 宜家 180 )，

佢163高，佢就經常都話，你真係好高( 佢到宜家都話我好高 )，

我正想話，不如去山林道果邊食囉...

竟然異口同聲，一齊講，

我地兩個你眼望我眼咁係度傻笑，

然後就慢慢咁行過去山林道，

至於點解我會有衝動約佢食飯，其實當日係我生日，

但相識兩個星期，佢當然唔知我生日，

一路行，一路講下笑，去到果間日本餐廳，

佢就問我，

S：「依間嘢都幾貴下，如果你唔夠錢大家可以AA架喎！」

我忽然自己覺得好man咁講。
我：「唔洗啦，我約你食飯就緊係我俾架啦....依啲婆毑數今日唔好同我計！」

咁入到去，其實佢都已經就住我，唔嗌太貴，我就當然唔會就住自己，
見佢想食嘅我都會嗌....
當時食日本嘢其實都幾貴下，因為埋單都1800蚊，無嗌過酒之類
大家食飽飽，八點鐘，時間仲早，所以醉咗仲好。

我就話，都係尖沙嘴不如落清吧飲兩杯囉。可能我個樣真係無咩攻擊性，佢諗都唔諗好爽快
S：「好呀，我去開有間有Live band架，環境唔差」

咁就同佢慢慢散步咁行返出金馬倫道果邊，出返漆咸道，落咗間地庫bar（當時我未夠秤）
但清吧好少爆燈，就算爆燈都有絕招，就係放杯清水係自己面前，啲龜查牌你唔係太串都唔會難為你，
咁就叫咗兩杯生啤，一路同佢摸酒杯底，佢飲完酒講咗好多心事我聽，
我其實都係一個幾好嘅聆聽者，一路都會同佢分析下啲事，
大約飲到十點鐘，我地兩個都飲咗三四杯，佢同我講佢有啲唔舒服有啲暈，想走，
當時我當然唔會意識到佢果日m come啦，如果我知道我都唔會叫佢去飲酒...同食日本嘢，
然後咁就扶佢上返去見佢撳住個肚，我先意識到...

我就話
我：「不如我送你返去啦...」

佢本身話唔洗嘅，但我見佢真係腳步浮浮，又痛到撳住個肚，聲都出唔到
我：「唔得！你一個女仔返去我唔放心..」

之後就較硬夾咗佢上的士，直踩過海，
成程車佢都係撲係我心口，係咁話好痛...好暈，
我自己就緊張到手心出汗，心跳加速...
到佢屋企樓下，我都唔知我那來的力，
俾錢個司機找都唔洗找就一手抱起佢，
然後抱到佢上樓，係佢手袋入面搵鎖匙，
放低佢係床上面，佢已經不醒人士...因為佢真係醉咗，
幫佢除鞋，有一剎那念頭幫佢換衫...忽然我都唔知自己痴邊條根，都幾大力咁兜巴星咗自己一巴
然後我乖乖地坐咗係佢餐枱張櫈，望住佢，過咗陣(其實都唔係一陣係五個鐘之後，零晨三點鐘)，佢終於醒咗，
S：「咦...係你送我返嚟架？」

我：「係呀...你m到，你早啲同我講丫嘛....我唔叫你飲酒啦，辛苦你喇...」

之後佢望住我笑咗一笑然後就問我
S：「點解你塊面，有個掌印嘅？我打你架？」

我：「唔係....係我自己打自己。」

之後佢就腳步浮浮咁行埋嚟，個人好近距離咁摸咗我塊面一下，問
S：「點解你咁傻要自己打自己呀？」

我：「我驚我把持唔住咪兜巴星咗自己一下囉....做人唔得咁嘅，絕對唔可以承人之危囉！」

佢望住我咁講咗句，望一望個鐘，
S：「你真係傻...不過多謝你送我返嚟，宜家三點幾，你住邊架？」

我望住佢
我：「我...住新界架...」

佢又細細聲笑咗笑，
S：「都咁夜喇，你走都唔方便，係度等天光先走啦...今晚真係好多謝你！」

然後，佢錫咗我塊面一啖...然後再問我
S：「點解你尋晚會約我食飯嘅？」

我就好老實唔客氣咁講
我：「其實尋日係我生日...」

佢好愕然咁講咗句
S：「吓！你唔話我知！我完全無準備悿！遲來嘅生日快樂！」


我：「多謝你嘅生日快樂，今年生日我好開心。」

然後佢就問我
S：「咁你今年嘅生日願望想要咩？」

我諗咗諗答佢
我：「已經實現咗喇，今年唔洗要咩願望！」

佢又細細聲笑咗笑
S：「你真係好傻呀，不過都好，我再諗諗送咩生日禮物俾你啦就！」

然後我就話，
我：「你諗下啦就，咁你仲有無舒服呀？快啲去沖過涼啦，我都休息瞓一瞓先。」

佢就話
S：「好啦，咁我去沖涼先喇。你覺得攰嘅話就上我張床瞓啦！」

我望住佢，
我：「吓！真係架？可以咩？」

佢甜一甜笑講咗句
S：「係你咋，第二個我唔會俾囉，我沖涼先喇！」
然後佢就走咗去沖涼...

我都瞓咗陣，大約半個鐘左右，聽到開門聲，我就醒咗，
我望一望廁所佢著條桃紅色嘅睡裙行出嚟，
問我
S：「你洗唔洗都沖涼呀？你今日都攰喇沖過涼舒服啲。」

本身其實我只係想天光就走，但飲完酒沖個熱水涼個人會醒啲，
咁我就話
我：「好啦....但無毛巾喎....」

佢就好快咁拎咗條濕濕地嘅毛巾俾我。然後講咗句，S：「你唔介意嘅就用我依條啦！」
我果刻產生咗一個念頭，我成世仔，都未試過有一個女人對我咁溫柔，我望住佢笑咗笑，佢就話你快啲去沖涼啦....咁我就好快快手手，行咗去沖，大約十分鐘之後就，出返去，我見佢坐咗係張床到我就問我：「你唔瞓？」
S：「等埋你先瞓...」
果刻我真係無諗過會發展成咁，但其實之後都仲未叫開始....同佢正式開始係三個月後嘅事
佢張床係King size所以都幾大張下我：「咁我真係瞓架喎...」
好快我就瞓著咗，本身都係分開瞓，瞓瞓下我feel到佢碌咗過嚟攬住我，我醒咗一醒，佢就話S：「整醒你呀？」
我：「唔係呀...我本身好醒瞓」
S：「攬住我丫...」
我猶豫咗一下，然後就攬住佢，我：「今日真係好開心，多謝你」
S：「我都無做過啲咩...」
我：「唔洗再做啲咩，到現時為止我都覺得足夠喇。」
S：「好啦，咁快啲瞓啦傻瓜。」
好快我又瞓著咗，然後到下午大約一點幾就醒咗，我起身果陣，佢仲瞓緊，其實佢個樣真係好迷人，起碼令我著迷，我保持住一個姿勢，盡量唔整醒佢，咁望住佢，真係足足望咗成粒鍾，隻手麻痺，動作大咗少少先整醒佢....

續
我咁記得係因為係一個特別日子，真係好完整地記得，果晚一字一句同做過咩，事隔咁多年我都仲記得好深刻。今次我打完出嚟，我直頭係重溫咗果一晚發生嘅事，真係好夢幻。雖然時至今日有時上去佢度，我同佢都會飲醉，都會攬住瞓，但我同佢，真係係分手再重遇之後，整個關係已經超越咗愛情嘅限界。但本質上無得返轉頭，我地亦唔會因為肉體上有衝動而去破壞我地以前經歷過最美好嘅時光，大家都唔會超越大家嘅底線，我同佢都認為，咁樣係最好。
the unexamined life is not worth living for human beings - Plato's Socrates
送上一首曲作為今段結尾
https://www.youtube.com/watch?v=b4iqUy1lYzk
Starlight - 戦闘妖精雪風 OST

你當年好純情

:smile_13:我宜家都咁純情

支持支持！

純情的回憶！從icq開始的故事:smile_o12:

初期就係......實情係我對住佢無guts，同我無自信，
而且佢一路都俾咗好多位我入，
但我就理智行先，所以一直拖拖到三個月之後先一齊，
佢自己都成日係度話，就係依日對我有好感，
佢話比著第二個，唔會坐係度望住佢坐幾個鐘...
一係就粒聲唔出掉佢上的士，一係就車咗唔知佢去邊然後上咗佢:smile_30: