第八章 : 無敵是最寂寞
「無敵是最寂寞」
頂，武俠小說嗎？
使唔使咁高傲呀？
還是，他真的也寂寞呢？他怎知道我寂寞呀？到底他是高傲還是寂寞呀？佢句說話是甚麼意思呢？
早上返工車程，我就是反覆想著嗰句「無敵是最寂寞」。
頂，無敵寂寞關我鬼事咩，人哋有老婆寂乜鬼寞呀，騙人的說話。
返到公司老細即時叫我入到佢房！
性騷擾我？
差不多啦。
Oh，我老細又肥又矮，即使未做得我老豆，都夠資知做我 uncle。
所以，我係唔會有嗰 d玉樹臨風，成功成熟成家立室男人，專門跟公司女秘書有染，做人小三嘅危情出現的。
我肥矮老細一見到我，即時笑顏滿面：
「Angela，閂埋門先。」
我心有一點點寒，乜嘢料呀，孤男寡女閂房門，「哦」，仍是把門閂咗，老細就肥頭 dup 耳，烚熟狗頭地講：
「唔好畀外邊人見到.....Angela，I want to give you a big hug.....哈哈哈」
我非常牽强，好膠好硬的笑容：
「乜嘢事呀？老細。唔使喇，真係唔使。」
太遲，老細大肚已經頂到我小腹，佢個人又矮，頭就喺我心口上d d，又肥又重，想推都推佢唔到，就咁白白企喺度畀佢抽水。
頂，佢仲未講乜嘢事，我開始爭扎，推向佢膊頭，佢先肯放手：
「老細，你鬆開我先啦，我透唔到氣喇。」
「哈哈哈，對唔住，因為我實在太高興，見到你就想攬實你，忘記咗講畀你聽乜嘢事添。」
頂你抽水就抽水啦。不過我仍然保持微笑等佢講，話過我份人好 nice 啊，我是天使丫嘛。
「Angela，連日嚟你跟嗰個美國大客，佢哋好滿意你嘅安排，佢哋決定同我哋簽約，所以你同公司賺大錢，你話我係咪應該攬實你呢？......諗諗下，想錫你添呀。」
肥佬又想向前，不過今次我已經有預備，兩手向前一伸，每手仲叉起二指，對準佢雙眼，藍藍指甲油，好似僵屍索命咁隊著佢.....肥佬，咪埋嚟呀，插盲你雙眼呀，當然，嘴只係講：
「係呀，真係好消息.....唔使錫喇，不如你加我人工啦。」
死肥佬，又賺錢，又抽水，你咪財色兼收？分 d 嚟洗下啦，我值啫。
哼，一招插眼，一句call 水，就如一盤冷水，肥佬即時靜下：
「加人工呀？.......唔.....」
好似割緊他的肉，不過未say no 呀，即係有機會，佢掙扎緊呀，好，再推一嘢：
「老細，加啦，如果唔係加我人工，使乜閂埋門驚人見到喎？」
閂門閂得咁過癮？今次自己捉蟲吧？好，再加一句：
「唔加，我以後唔加班喇，男朋友話無見面時間呀。」
終於好似脫大牙般：
「好啦，加就加啦，咁，你放低手，畀我表達我高興多一次啦。」
死肥佬，係都要咬多一啖，但都無計喇，放下劍指，任由魚肉吧：
「攬多一下好喇，唔使錫喇。」
感覺有 d 好似做雞，出賣緊自己肉體。
衰肥老細滿足獸慾後，番埋位坐低，竟然夠膽死問：
「Angela 你隻香水好香，叫乜嘢名，等我買返支畀我老婆搽下先。」
唉，佢諗緊乜，我真係唔想知呀，救命。
