第五章 : 寂寞難耐
星期一，公司放工前一小時，老細同我講：
「Angela，你今晚可唔可以加班呀，個客仲未覆返我哋，可能夜啲會覆。」
唉，唔係一個想聽到嘅消息，不過，都無辦法啦，橫掂亦無籍口唔加班。
「無問題丫，老細，我就留低等電話啦。」
「好丶咁唔該晒你喇，Angela，係你最抵得諗。」
星期二，放工前一小時.....頂，同樣事情發生......
我.......又再留咗。
星期三，個客自己同我講.....I have to ask my boss，do you mind if I call you back later on today？
頂，你 later on today 即係我 tonight 呀！！
我同老細講：
「老細.....」。
老細就答：
「我無問題丫，你可以加班。」
我真係想講粗口，要我加班，仲搞到好似要佢批准？！
就咁丶等到全公司人都走喇.....。
天丶都等到黑了.....。
......仲未有 call，情緒低落至想喊出嚟，望出窗外，繁忙交通車頭車尾燈丶街燈丶維港對面香港嘅燈景，好繁忙.....好多人啊，但丶點解我咁寂寞嘅？
好空虛。
好寂寞。
人都快癲喇。
之後，我做咗一件.....可能會後悔嘅事，真係，我都唔知自己點解會這樣做，不過，還是做了，又是矛盾？
事後，我安慰自己.....唓，做咪做囉，又唔使死嘅，邊個會知喎？
唔係咸濕嘢呀，唔好諗多咗啦.....
我.....只係到「成人徵友區」發咗一帖，其實亦只係好簡單的一帖之嘛，就如下：
「大家好，想交朋友嗎」
內容亦只是：
「如題，未婚女子，公司加班中，很悶，想交朋友，非誠莫擾」
就當我按下發帖之後一秒，公司電話響起，嚇得我成個人一跳，就好像做了虧心事似的。
係等咗成晚個客回覆電話.....唉，終於等到喇，三扒兩撥搞掂好一切，就飛出公司，肚仔餓哩。
返到屋企一個熱水涼後，爸媽都入房瞓喇，不過佢哋亦等到我入門口先才入房，即使我一早通知佢哋我要加班。
入房攤到床上，人都散晒似的，突然想起自己剛才發的一帖，唔知如何呢，心情有點緊張，知道唔看過究竟，點會有心情瞓丫？
後來發現，可能不看仲較容易去瞓呢.......。
[
本帖最後由 7色 於 2015-1-16 09:31 PM 編輯 ]
