Day5
我份工需要o既工作時間其實好長，而且返工時間都會比大部分人早。所以每日都係未天光就已經起身，天黑先會收工。工作時間太長已經令我覺得非常麻木，好似往後只有工作同工作。而佢o既出現，令我感覺到原來人唔係單單只有工作，我好興幸同感恩佢出現o係我生命當中，但係我亦都感到唔開心點解佢會咁遲先出現。
人，有感情，更加容易令自己覺得矛盾。不過人，更加應該要知足，唔識知足只會令人跌落深淵。要控制自己身心其實一o的都唔容易，控制唔到只有不斷要求，到時只會有反效果。所以每每我要求做一樣野都會好矛盾，因為永遠都唔會佢會點回應。
佢，因為家庭關係，每朝都需要好早起身。所以當我起身send第一個msg俾佢時，好快佢就回覆番我。了解多左，其實會感覺到佢o既生活相對其他人沉悶同簡單，照顧好屋企，得閒同朋友食早餐，得閒夜晚同朋友約食飯，等等。有人會覺得呢種生活非常寫意，有人會覺得悶到發慌。我感覺到佢應該屬於偏向後者。
不過估唔到今日竟然發生左兩件事。第一，我開始病。第二，我第一次聽到佢把聲。佢把聲比我想像更温柔，更甜美。雖然佢不停講自己把聲唔好聽，不過我感覺到唔係。雖然大家只係傾左短短o既幾分鍾，但係已經比起我當初得到o既多。雖然對話唔多，不過我感受到佢o既開心，更强烈感受到佢份恐懼，始終我同佢有著唔見得光o既關係。
每次我病，都會比較手尾長。今次比之前雖然嚴重性唔多，不過身體上好辛苦，好想好想佢o係我身邊。但係，我明白唔可以有過分要求，所有就算佢都想黎探我，我都會心痛咁婉拒。唔知佢明唔明呢種心痛，想見又不能見o既呢種痛。
早退，睇醫生，食藥，每一件都好想佢o係我身邊，但係我要接受事實。丟轉頭諗，佢不停咁同我傾，佢亦都未必好過。我完全感受到佢份擔心，擾心。所以我減輕同佢表達我病情o嚴重性，為o既只係想減輕佢對我o既擔心。
Day 6
因為食左藥o既關係，所以差唔多到中午先醒。訓醒見到佢send左兩個msg俾我，我完全感受到佢份擔心，不過食左藥o既我，精神狀態其實係極差，基本上只係不停想訓。所以同佢傾左一陣，我又再訓番。
估唔到藥力o既強勁令我不停咁訓，我不停同自己講唔好訓，但係失敗o既我做唔到。
一件令我感覺心痛o既事發生左。因為今日少左同佢傾，佢開始迷茫，對住自己另一半，覺得需唔需要去到呢一步，同一時間佢分唔清佢對我究竟係一份掛念定係習慣。睇到你一路send o既msg，我久違o既眼淚開始慢慢咁流出黎，流緊原因唔係因為佢同我講o既野，而係點解我會令佢咁唔開心，咁痛苦。我想佢開心而唔係想佢覺得痛苦，雖然我俾唔到任何野佢，但係佢o既一笑已經足以令我覺得精神百倍。
但係今日，佢o既唔開心令我非常內疚，我感覺自己o既病竟然會令佢唔開心，有一刻我好憎自己，憎到大大力咁打左自己一巴。不過皮肉之痛完全比唔上內心o既痛。
雖然係帶住一份唔開心o既心情同佢傾，不過我唔想俾佢感受到我份心情，所以我極力掩飾我呢份感覺。反而我地各自都講左我地o既過去，相比之前，我知道o既比之前更加多。我亦都決定好好咁做佢o既一位傾聽者，無論大小事，我都希望佢講俾我知。
P.S. 其實寫到呢day心情開始沉重，因為諗起當日o既心情，所有o既對話突然o係個腦浮現晒出黎
Day 7
經過左Day6，我地又變番不停傾計o既模式，雖然心入面都總係有少少唔開心，不過好快呢個感覺已經無左。
平常o既佢，通常起身一陣就會訓番，不過訓o既時間唔會太耐。不過今日，佢訓左好耐，差唔多我地有四個鐘無傾，個份擔心同驚不停浮現，做野無晒心機，不時望住部電話，就連同事，老闆都問做咩今日成朝不停望住部電話。到佢訓醒，我先放下心頭大石。
之後話題傾到見面，其實我有問過佢想唔想見我，雖然大家都已經想見對方，不過我都感受到佢o個份驚慌。就係我同佢開始討論見面o既時間同地點o既時候，我同佢講第二日其實係我同佢相識一星期紀念日，佢突然提議第二日就見面。我個心突然跳左出黎一樣，因為我點都估唔到我地會咁快就面，我亦都好即時咁應約。
既然已經決定見面時間，下一個問題要解決就係見面地點，始終佢都係有家室，見面地點其實選擇唔多。其實最方便會係上我屋企，但疑於地點距離加上其他外在因素，最後我地決定去一個早上比較少人出沒o既地方。
距離見面時間越近，心情越緊張，緊張o既係終於可以見到一個自己喜歡o既人，不過同一時間，我亦都覺得不安，因為我估計唔到見面之後會點。越諗其實越心寒，因為始終見面同未見好大可能變左兩個世界。
當晚我同佢傾到十一點半左右，大家都決定俾大家訓。雖然講好左我訓，但其實我當時真係訓唔著，原因就係緊張同驚。
Day8
終於到左見面o既日子，由起身，梳洗，出門口，開車出發，心情仍然無變。其實呢種心情真係幾難受，開心與唔開心之間同時存在。(呢刻o既需要食枝煙先可以寫落去)
到達接佢o既地方，心情不變，不過我知道我需要o既係要做多我應承左佢o既事。放下心情買早餐，買野飲，等佢。佢一日未出現，緊張o既心情依然無變。當佢同我講已經落車，我開始手震。
佢，終於上左。我第一個反應係唔敢望佢，而佢都唔敢望我一眼。當我第一次真真正正由倒後鏡望到佢o既時候，我個心幾乎跌出黎。而我感受到佢o個份緊張，緊張到大家都唔敢出聲，只有笑聲。作為男人o既，決定不停講野，希望可以令我同佢第一次真正相處o既氣變得平淡o的，開心o的。車程雖然唔耐，但係我都要盡力表現淡定，至少令佢覺得安心。
到達目的地之後，我提議一個地方去食早餐。或者因為經過一段車程，佢好似已經定左落黎，反而坐係佢側邊o既我，緊張到連早餐都食唔落。
呢個地方，我永遠都唔會忘記，因為呢個地方係我第一次拖佢，第一次錫佢，第一次攬住佢o既地方。雖然大家都有講有笑，不過我感覺到佢對我份感覺唔同左，正如我之前擔心o既一樣。越相處得耐，越覺得佢就係我要揾o既人。我知道呢幾個小時我確確實實咁擁有佢，佢o體温，佢身上o氣味，到呢刻我都未忘記。不過幾個小時後，就好似由山頂直插到山腳。
過左幾小時o既"拍拖時間"，終於到左要分別o既時間。好唔捨得，好想時間會停落黎，不過我知咁係無可能，大家都要返去現實世界。到佢落車o個一刻，個心真係好酸，心酸o既唔係因為係時候分別，而係見佢頭也不回咁落車，離開。感覺就好似分手o既情侶一樣。
之後我好似鬼上身咁，不停msg佢。而佢開始都覺得我過份地demanding。我決定要俾自己停一停，唔可以再太過份地"chur"佢
呢日o既我可以話經歷高低起跌，由開心直接跌到唔開心。當晚其實無乜點訓，望住漆黑o既四周，個心酸得難以形容。就係咁，我地第一次約會完結。
