一次過追哂，好高登FEEL，好好睇
估唔到同為90's d文筆咁好呀下

但你爆自己全名，唔驚比人起底? HA

七不思議食女事件 Vol.26

自從野狼同牧子聯袂消失，我屋企既花灑就不斷漏水。勢估唔到，2013年既今日，我媽為左慳錢，依然堅持要用電熱水爐。花灑管流水潺潺，逼使我用膠桶，將漏出既熱水盛滿，然後照頭淋落去，免得凍死。與一盤熱水相觸既四分一秒，我不斷幻想呢件事從來都無發生過。但係，熱水往往流去企缸底，形成漩渦，將我捲入罪疚之中。

牧子。牧子。牧子。

兄弟。兄弟。兄弟。

唔知幾時開始，我既生命為背景音樂所羈絆。無論去到邊到，我都會塞住耳筒。根據ITUNES上面既統計，Coldplay既The Scientist已經播左731次，跟隨其後既，分別係播左535次既飛砂風中轉，同埋播左490次既明知故犯。

因此如非必要，我都越黎越少番HKU。同時我都唔想留係屋企做毒男，對住我哥個讀HKU法律系，細我兩年既細佬。

我細佬叫Larcos，港大法律系四年級。雖然佢同我係同一個老母生，但係性格截然不同。如果我係浪漫主義既李白，佢一定係寫實主義既杜甫。細個親戚聚會，兩兄弟少不免會有比較；我飛揚跳脫，自然比沉穩既Larcos受歡迎。唔知係咪因為咁，Larcos為左證明自己，就努力讀書，拔尖入左HKU讀Law。入左大學之後，Larcos好似食左瀨尿牛丸咁，人聰明左，講野又大聲左。

「哥，你搵到工未？」

「而家先十月咋喎，遲下先算啦。」

「D工就Deadline架喇，我讀BBA D Friend都報晒工咁濟，你仲係到日日對住個鍵盤寫寫寫，有咩好寫姐？」

「我係大文豪，你識條春咩。你讀Law威喇、叻喇，未畢業就有Magic Circle請你，個世界仲唔係你既？」

常言道「長兄為父」，雖然老成既Larcos係我細佬，但係佢仲煩過中學捉人唔攝衫既訓導主任，成日催我搵工。自從Larcos摺得濟，被Hall quit左，番左屋企住，佢既生命窮得只剩下GPA，日日係Facebook上載Readings，話俾大家知佢讀緊書。

為此，我經常去樓下既冰室，飲杯紅豆冰，食個菠蘿油，拎住Notebook，寫下野、睇下書，打發時間。

食完個茶餐，我望住吊扇轉呀轉，拎住電話掃呀掃，將杯中檸檬篤到無可再爛，然後第二日晏晝，又黎望住吊扇轉呀轉、轉呀轉、轉呀轉，再叫個常餐，將檸檬攪呀攪，篤呀篤，好似玩大富翁抽中左機會卡，回到起點。

細個讀書，一堂入面，我會花一半時間望住天花板吊扇，總係驚佢會一野轟落黎。調位坐係吊扇下面，彷彿預告厄運既來臨，寄語生命既易逝。估唔到既係，今時今日只有係呢間冰室鳩坐，望住吊扇轉動，我先可以將糾結既思緒鋪平，以三十幾蚊既茶餐，換來片刻既寧靜。係通漲猛於虎既社會，我真係唔知道，三十幾蚊食屋企都煮到既野，究竟係抵定唔抵。

星期一。「常餐，雞翼米、凍檸茶少甜、多士烘底。」

星期二。「常餐，雞翼米、凍檸茶少甜、多士烘底。」

星期三。「常餐，雞翼米、凍檸茶少甜、多士烘底。」

星期四。「常餐，雞翼米、凍檸茶少甜、多士烘底。」

星期五。「常餐，雞翼米、凍檸茶少甜、多士烘底。」

我對食物要求好低，只要唔係太難食，我可以日日都食同一樣野。吃喝拉睡係人類本能，香港人特別喜歡替食物拍遺照，然後放上網分享；我經常有奇怪念頭，就係呢類人都會臨沖廁之前，幫自己篤屎影張相，只不過係唔好意思，先唔將篤屎放上網。

係冰室坐得耐，食完個雞翼米同火腿奄列，我都會盡自己既本份，去報下D Management Trainee既工，隨波逐流，穩穩陣陣大概都唔會浸死。

信和MT。What are your strength and your weakness。中銀MT。Academic Qualification。恆生MT。Past Working Experience。機管局MT。What makes you the best candidate for our this position。新世界MT。What is your biggest achievement in life other than those achieved in college。馬會MT。Cumulative GPA。匯豐MT。Honours/Expected/Achieved。合和MT。Scholarships and professional qualification – N/A。地鐵MT。Do you have friends or relatives working in our company。太古MT。Extra-curricular Activities。證監會MT。

然而，每填一張申請表，就好似細個去寺廟，用硬幣扔龜頭一樣，一去無回頭。一切都只不過係買個希望，性質同去馬會買張電腦飛無分別。

斜陽映照，令冰室盡處既格仔窗框，閃閃亮亮，我諗起王家衛《花樣年華》入面既周慕雲。我以指當梳，好似周慕雲咁將頭髮梳理，深呼吸一口氣，同自己講，我要做作家。

我要寫一個蕩氣迥腸既故事。我要出人頭地。我要人人都識我 。我打開Microsoft Word，半句鐘之後，左下角Word Count依然係零。的而且確，我並唔係想像力豐富既人，從不能靠想像力打J。所以 ──

為了取材，我必須溝女。

為了寫作，我必須溝女。

為了出人頭地，我必須溝女。

為了阿媽，我必須溝女。

星期六。「常餐，雞翼米、凍檸茶少甜、多士烘底。」常餐一遞埋黎，我即刻感到極度違和，眼見凍檸茶變左凍奶茶，多士亦都無烘底。正待我要發作，含一啖茶，一野噴落去小二哥到，霸氣屌柒佢落錯單既時候，呢位女郎，就好似球員準備入替一樣，係邊場熱好身，然後劃個十字聖號，親吻草地，闖入左我既奧脫福球場，換出左牧子。

(未完待續)

[ 本帖最後由 賈子story 於 2014-1-18 01:38 PM 編輯 ]

究竟係雞翼公定米??

completely understand the feeling which something about looking for a job, frustrated and annoying....but you still have to accept those kinds of suffer from this pain...

Thx for your updates!  It is time to rewind your chapters again

PS Glory Glory Glory MU!:smile_38: :smile_38: :smile_38:

好正~~   thanks for sharing

大文ho, 我刀住你隔離村, 有時放假刀會去個冰室食個點幾兩點中既早餐, 睇下報紙, 玩下手支, 唸下野, 係幾好feel 的, 話唔定刀有撞過你:smile_30:

七不思議食女事件 Vol. 27

我一抬頭，就見到女侍者既單眼皮，緊緊咁盯著我既內雙眼皮。

「唔好意思，我好似叫凍檸茶，唔係凍奶茶喎；件多士都無烘底。」

雖然女侍者二十出頭，皮膚不甚白皙，但係星目流盼、朱唇輕啟，蓄小馬尾，露出前額，完全唔似勞動人民；佢既氣質，就好似西多士既糖漿，瀉到一碟都係。美女侍者朱唇一開一合時，我望佢發怔，半句都聽唔入耳，頓然不覺自己塞住左部耳聾機，播緊The Scientist。

「And I am going back to the start…」，歌聲隨住我手指掃兩掃，戛然而止。

有人話過，受左傷既烏龜脫左殼，就會變成一條會飛既四腳蛇，係空中飛呀飛，飛到電熱水爐後面，收埋自己， 一旦見到吸引既人，就會爬上去佢胸口，任你點撥佢，佢都唔放手。只有四腳蛇厭倦，佢先會飛番入個殼到扮龜。

讀者看倌要知道，我係無傷心期既浪子，無路肩既屯門公路，女司機一個唔小心，就會撞埋山邊，香消玉殞。我經常慶幸我係男兒身，如果阿媽生少我四両肉，係世俗道德塔利班既眼光之中，我諗我大概係人盡可夫既小淫娃。

「唔好意思呀靚仔，我幫你換過。」女侍者笑了，笑得極媚。

「靚仔？哦，唔緊要，你新黎架？之前無見過你既。」

「我係親戚介紹黎幫下手咋；其實，我無點讚過人靚仔。」

「仲有呀，唔好成日塞住隻耳仔啦，聽下我呢到播既歌啦，全部歌都係我揀架。」女侍者笑得雙眼成直線。我除下聽筒，先發覺冰室播緊王菲既《夢中人》。

縱使《倚天屠龍記》入面，殷素素講過「越好看的女人，越會騙人」，但係被美女盛讚，我心中不覺飄飄然，哪怕呢個不過係廉價既客套話，同「得閒飲茶」一樣，純粹都係講下，唔會認真。

唔知點解，自從呢個女仔進入左我生命，我老母終於肯買番條喉，整番好個花灑；亦因為咁，我就唔駛係花灑管下面擺個桶，去盛載漏出黎既熱水。熱水形成既漩渦，我亦都好耐無見過。

第二日，我一如既往去左呢間冰室，叫左一個常餐。但係呢個女仔無番工，冰室亦都無播王菲既歌。我坐左成個下晝，用電腦寫左蕩氣迥腸既短篇小說既開首，我不斷幻想呢個女仔既背境，嗯，佢應該係新移民少女，無學歷，係社會既最低層苦苦掙扎，一定好想用美色出人頭地；佢遇到港大畢業既男主角，然後呢，然後呢？我實在唔知呢個故事會唔會有結尾，因為，我今日見佢唔到。

第三日，我又撞到呢個女仔。佢幫我落單，我照舊叫左個常餐，雞翼米、凍檸茶少甜、多士烘底。我坐左係到好耐，但係我除左落單，我無同過佢講野，因為我相信「人生若只如初見」，我唔想我既美好想像被破壞。

我而家同緊一個幻想中既女主角，一人分飾兩角，透過鍵盤談不存在既戀愛。我望住美女侍者嬌小玲瓏既身型，思緒就好似缺堤既潮水不斷打岸，使得手指擊打鍵盤，完全停唔到。

男主角叫阿邦，阿邦好寂寞，落完單之後鼓起勇氣問女侍者拎電話，然後呢，然後呢，然後佢地一見如故，打得火熱，好快就係埋一齊。加甜、加甜、加甜。如果唔係篇小說無人會睇。扑野要寫五百字。唔可以太露骨，如果唔係會得失女讀者。意象意象意象。唔得，呢個故仔太大路，會被講故台d故仔淹沒。加多幾個角色。加多幾條感情線。唔可以太煽情，會失去文學性。咩係文學性？

我打下打下，一片迷惘，將個故事寫到曲折離奇，好似港產爛片咁，留左幾萬條伏線，但係我功力有限，覆水難收，一時三刻寫唔到落去。我經常偷望女侍者取材，佢亦都禮貌地向我報以微笑，一定係諗呢條友搵唔到工，痴撚左線，日日係到打躉。

第四日，女侍者又無返工。我好失望，叫左一個常餐，食一半，扔左一半，開住部電腦，完全寫唔到落去。

第五日，我再寫，越寫，就越覺我並唔係才氣縱橫既大文豪。所以，埋單既時候，我鼓起勇氣，講左句：「你可唔可以俾你電話我？」

女侍者一揚眉，撥一撥頭髮，係褲袋拎左部Samsung Note2出黎，笑意盈盈咁講：「拿，成部拎去。」

時間凝結，吊扇轉動。女侍者拿著Note 2，眼睛像新月，騷得入骨。

(未完待續)

我好少在這版留言, 但係你真係寫得幾好~~~
請繼續努力寫埋落去~~~

繼續努力