係呀，十幾年前同C一齊，兩個人都係初戀，兩年後分開左，相隔十年再重遇返，而家已經係兩公婆了~

真你幸福:smile_40:有仔女?

又有排追

仔未有，貓仔就有，兩個都仲想過下二人世界，weekend 可以無牽無掛出去同朋友聚下~

:smile_30: 都係既 有冇仔女都唔重要 2個人既相處得好 自在最緊要

Wow.... Congrats!!!
但係你地一定經歷左好多野先可以一齊到....
難得！

可能個舖完左都未追完...

同C真係一齊左，大家都係初戀無可避免會有好多好白痴但兩個人又覺得好sweet既野，每日除左上堂既時間之外都係一齊，食飯會好似成個canteen 得我地㓚人個冇其他人咁，你一啖我一啖，又傻瓜又bb咁叫，攪到左右隔離食唔落飯，來來去去咪又係campus上堂，都一樣要企定係門口佢等我又或者我等佢，要一落堂就第一時間見！返到hall就一係佢黎我房陪我打機，一係就我去佢房陪佢溫書，攪到我地既roommate 成日頂唔順出去！
重點係我地好enjoy呢種肉麻生活一啲都唔厭倦！最終俾人唱我地係hall入面既神鵰俠侶，見到就叫我地楊過小龍女黎寸我地！
時間過得好快，我出左黎做野，可能個時慣左三點不露（冇三點都唔會起身），份工都專登搵下午三四點先返，十一二點先放工既（自己讀engine，但就做sales engineer，其實冇定返工時間，交到數就得，話知你唔見人）
C個時每日放學就上我公司搵我陪我，因為佢想見我多啲，到我走得先一齊去食野我再送佢返屋企。
其實久唔久一次當然冇問題，但星期一至五都係咁就開始出現問題同磨擦... 第一我會擔心佢，日日咁過黎等到十一二點先陪我食野再送佢返屋企，咁好影響佢讀書，雖然佢黎到我要做野佢都係自己溫書，但咁溫又點得呀，第二就係晚晚攪到咁夜先返去瞓，第二日邊夠精神呀，而且佢黎到公司就算坐係房自己溫書唔洗我陪佢，我始終心掛掛唔可以專心做野... 再加上我返三四點，好多時放工食完野啲同事都會叫飲杯野傾下計或者去篤下波，慢慢就好似每晚要係C同朋友同事之間取捨咁...
當我同C講不如唔好每日都黎搵我，佢就開始以為我對佢淡左唔再想成日見到佢... （其實佢到而家做左老婆都仲好少女心態，覺得有愛既人係身邊係最重要，其他咩都冇所謂）
唯一個令到兩日之間多磨擦最終導致分開就係佢好鍾意扭計，好多時係專登搵野黎扭想見到我氹佢既心急緊張樣（讀書時我好就佢，知佢鍾意就會因為佢一個眼神一下扁咀而花盡心思，係我倆一種好傻氣既情趣），可惜當我出左黎做野，個人唔可以成日咁細路仔，加上工作壓力影響唔再可以好似讀書時放低所有野全心全意同佢玩呢個傻氣既遊戲... （當係公司，同事朋友面前，唔通著住套suit拎住支筆扮小朋友咩），我好有責任係有時冇諗到佢咁做係想我開心想我變返讀書時成日有笑容係面上... 有幾次控制唔到情緒發佢脾氣問佢想我點...
慢慢見面時間少左，以往既歡樂與童真亦逐漸消失... 我倆依然愛著對方冇變... 但可能生活圈子不同，我地開始失去以往無憂無慮既相處...
我開始好自私咁選擇同事朋友，覺得同佢地傾計可以有共鳴... 而好多時我同C去講我既事佢唔理解，我感到佢好想令我放鬆開心返，可惜做唔到朋友個種舒發...
當時我係自己搬左出黎住，而C亦都搬爻黎同居（佢只得year1既1個sem可以住hall），但由於我既返工時間，基本上佢返學我仲未起身，我返黎佢亦都瞓左，即使我地由當初既熱戀到而家既平淡，我地都好珍惜呢段初戀冇諗過分開，或者世事就係咁弄人... C爸爸媽媽見到佢面上既笑容唔再好似往惜既天真... 知道我倆之間有問題存在，就建議佢過英國讀master...
其實當時C同我講，我有一剎想同佢一齊過去讀，但工作令我事業心更強，我作出左導致分開既選擇...
我同C差不多三年既感情走到終結...
我從來唔會魕水悔自己既決定，覺得無論結果係點，只要係自己意願所選擇既，就要承擔面對，後悔唔會有幫助或改變（老婆到而家都冇怪我當日既選擇，反而話我承擔接受自己既決定係我既優點，每次講返以前既事佢仲會安慰我如果當初唔係咁決定，或者都唔會係大家各自經歷成長後重遇，今日都做唔成夫妻，我都覺得當日就算我同佢一齊過去，可能因為思想既分歧，反而會由愛情變為感情最終決絕分開，當日係大家仲愛對方下分開，今日先會再次珍惜認定對方）
當年雖然並無後悔分開既決定，但就留下一份無奈與遺憾於心底，十年來即使我有其他既感情發展，但呢份遺憾一直成為我唔可以全心投入另一段關係既障礙... 更估唔到呢份遺憾係C心中既影響係大到佢唔可以嘗試另一段感情，當去年我倆重遇，俾我知道佢呢十年一直放唔低我，心中抱著萬一既冀望可以再同我開始，令我倆於一年內認定對方，珍愛對方成為夫婦，今日成為朋友眼中既樹熊連體嬰，肉麻既代言人xd~

世事就係咁橋，我同C就好似postit兄同T咁因為女方去外國讀master而分開（希望大家唔會覺得我係作故仔抄postit兄啦），唔同既係由我既決定導致分開，其實老婆當年真係為左呢份愛好遷就我，就係因為我返工又叫佢唔好成日黎公司攪我，佢想見我多啲先搬黎同我同居，當乍外父外母都有因為咁唔係咁鍾意我，係老婆不斷強調係佢自已決定唔係我叫佢搬黎先好少少...
諗返轉頭當年佢搬黎真係好委屈... 一心想見多啲令感情可以維持，但偏偏就每日大家只係見到瞓左既對方... 不過當時即使我倆因為圈子既不同，無左往日純真既愛情，但每個星期六日我地都會留係屋企珍惜相處既短暫時間，大家唔講野都會靜靜地享受心靈上因對方係自己懷中個份滿足...
老婆由細到大俾屋企照顧得好好，凡事都有工人幫手，連碗都冇洗一隻，但就每日為我打理家頭細務！依然滿足地笑住幫我做佢完全未做過既事！
當年外父外母都因為呢樣野好心痛個女，曾遷怒於我，係老婆從心出發覺得為我而做係一份滿足，打動到外父外母，我同佢地既關係先有所改善！
好多謝你呀老婆，我感到我真係好幸福！

雖然都追唔返大家講到邊 但重要嘅係post 個post 繼續快行 慶幸我認識到大家 慶幸我有過你們給的支持祝福 慶幸係封版前我仲可以同各位講以上說話 祝福各位每一日都能愉快渡過 多謝billy 分享！