呢一晚之後我同C開始每日都有icq，當然同一個hall每日都有見面啦即使時間唔多，但總算係一個好開始！
每星期都有一至兩晚會落去街下，weekend仲會出去食飯，去到呢個關係，雖然未算一齊，但雙方都知繼續落去只係差一個適當既機會同氣氛去講個句說話就可以真正開始！
而hall入面既同學朋友都默認左我同C係一對！
開心既日子每日咁過，但係C身邊出現既男仔依然不斷，我心裡好矛盾，一方面留意到C有心去同佢地保持朋友關係避免對方既追求，另一方面又好忐忑，明明感到C對我相對其他男仔有所不同，但又搵唔到理由㑕自己相信可以咁幸運能夠令C選擇我！
或者係自己對感情既執著，覺得如兩人真心相愛，心靈上既感受與配合係重於一齊，所以我好抗拒去做好多為得到對方既身同心而去做既門面工夫，例如送花送禮物，行為語言上失去自我一心只為迎合對方去奪取芳心！
總覺得如對對方有愛意，對方做啲咩即使只係簡單既一個動作一句說話係自己眼中都係與別不同充滿吸引力（所謂情人眼裡出西施）！隨著愛既增加，什至可以從心裡感受到對方所有包含著對自己既愛所散發出黎既魅力！
可能講得好玄，但事實即使只係簡單一個表達禮貌既笑容，我的確感到C對我既一盼一笑同對其他人係有所不同，原來C都係一樣有呢種感覺！
係一個星期六晚同C兩個人去左西貢食晚飯，我忍唔住突然轉話題問佢！（可能因為酒精影響先咁大膽）
”C，其實我諗緊咩你感唔感覺到架？”（又開始心跳同爆汗）
”咩諗咩？你講邊方面？”
”我對你係點”
”你對我好好，好照顧我好關心我”（佢都有少少面紅，唔知係酒精定同我一樣係緊張）
”但係都有好多其他人一樣對你好”
”兩回事，每個人對我點都同其他人無關，你對我點唔關其他人事，其他人點亦都唔會影響到你”
”咁你在乎既呢？”
”你咁問我點答喎”
”我覺得我同你比起其他同學之間既關係已經有分別... 你呢？你係咪都有呢個感覺定係覺得冇乜分別都係同學朋友？”
”um... 我要諗下點答你，我一時間唔係咁識點表達”
”你知唔知hall入面什至campus都有唔少人講我地？”
”傻瓜，點會唔知喎”（呢句傻瓜令我好似上左天咁，佢真係講到我成個身酸軟晒）
”雖然我地而家只係朋友關係，見面既次數亦唔係特別多，但我真係覺得好唔同，起碼我唔會每星期都單獨同其他女仔去街食飯傾心事，更加唔會因為心裡面諗住其他女仔攪到囉囉攣，絕對唔會見極其他女仔都好似唔夠，未試過每日都對下一次約會充滿期待！你係我心裡面已經同其他女性朋友唔同層次！你係第一個完全充斥我生活裡既人！”
”你咁講我點答你喎... 不如你講你想點啦”
”可能每日你都聽到有人講你知佢想點，但我冇諗過咁做，因為我想點一啲都唔重要，我覺得我同你所想既係咪一致先最重要，當兩個人各自所希盼既原來係一樣先值得在乎！我又一次自己都唔知自已講咩啦，我都唔識表達啦...”
”傻瓜，你知唔知你真係同其他人完全唔同呀？”
”點唔同”
”我唔識講呀，總之你所做所講同埋你既思想都同荂金他人唔同，但係我妳清楚你俾到一種其他人俾唔到既舒服感覺俾我”
”咁你應該都知其他人講我地既咩，你咩感覺？”
”我不嬲都唔會理會人地講咩，把口係人度控制唔到，但當我知道佢地講我地時我其實開心架”
”咁你所想既係咪即係同我所想既一樣？”
”我講到咁你都仲咁問架”
”我想同你一齊... 你願唔願意俾個機會我呀...”
”傻瓜，你感覺唔到既咩？”
”其實我好矛盾，一方面感覺到，令我好開心覺得自己好幸運，但另一方面我又搵唔到理由去認同呢個想法...”
”點解？”
”你身邊太多追求者啦，我俾唔到原因同自己講你選擇既係我...”
”我都講左啦，佢地點一件事，你點係另一件事，點可以拉埋一齊講架”
”即係點？”
”係，佢地為我都做左好多野，但佢地個個所做既野俾我感覺都係為左令我留意佢地，出發點都係想我覺得佢地與別不同！而當每個都係咁做仲要根本唔係我所追求既時候，已經令我麻木冇感覺啦”
”咁我呢，有咩唔同？”
”你令我覺得你好真摯咁同我溝通，感受到你係認真想了解我既事，同時你又會好主動咁不斷講你既野我知，無論好定壞既都會好想我清楚咁，唔似得其他人咁掩飾自己，選擇性咁俾我知佢想我知既事！”
”咁你唔會覺得我好衰咩？我自己好多時都覺得自己唔係一個好人...”
”我聽到你講自己既事，有啲真係估唔到，可能我由細到大既生活中都冇接觸到掛，但係我聽左又唔會話怕左你喎，我知道都係你長大既過程，我感到你反而比同年紀既更加成熟更加識顧慮他人既感受，所以同你傾計我有一種其他人俾唔到既舒服！而你覺得自己唔好既事相反令我覺得係對你既幫助，經歷係會幫助成長，唔會輕易就迷失什至行差踏錯，所以你俾到我一份信任，覺得只要有你係身邊，發生咩事都可以輕鬆面對！”
”我會成日因為你而囉囉攣，好想成日見到你可以係你身邊，即使只係靜靜咁一齊行，心裡面個份平靜可以令我好放鬆好享受，什至想個刻時間可以停落黎！”
”其實而家我地既朋友認定左一樣野，你同我亦都唔會覺得要同佢地解釋清楚，好似都有少少因為佢地講既說話而感到開心，其實我地既關係都只係差你既一句說話，你仲有咩令你覺得我冇理由想同你一齊？其實愛情係主觀既感覺，唔需要啲咩理由架，你知唔知我最驚喜？當你只係簡單咁向我訴說你既往事同成長，好似講緊其他人既事同你無關咁，但係個份冷漠唔知點解又會俾我一種好溫柔既感覺！”
”多謝你呀，估唔到原來你咁在乎我，雖然呢個月黎大家都只係好似朋友咁相處，但係我相信大家都對對方有感覺，呢一刻亦都清楚雙方心裡面點諗，C，你願意做我女朋友嗎？”
”傻瓜，成日都有人同我講呢句說話，但一直我聽到都冇感覺，所以全部都係拒絕既！你知嗎，由你對我講呢句說話我等左好耐啦，雖然一直以黎同你都係啲好平凡既相處，只係散步傾心事同食飯，連戲都冇一齊睇過，更加冇一齊經歷過啲浪漫既事，但我有呢個感覺，同你一齊係每日都平淡但充滿快樂既日子，有你陪伴我身邊已經足夠，唔需要特別都安排啲咩節目，你呢句願意做你女朋友嗎，係我由細到大聽過最甜蜜既說話，我覺得可以認識到你真係好幸福呀！多謝你呀，我地大家一齊珍惜呢份感情呀好嗎？”
呢個時C再一次拎左張紙巾出黎，但今次佢唔係拎俾我，而係親手幫我抺眼淚，佢講既說話每一句都令我從心底感動，最後呢番說話令我強忍左好有寸既眼淚終於流下，即使到而家十幾年後回想返當晚既情景，眼淚又一次不受控咁流下，但絕對係幸福同快樂既淚水！
C溫柔咁幫我抺眼淚時，我同佢講”不如埋單走囉，呢個傻瓜想你再一次陪我平淡地走一段路，往䈗我地仲有好長一段路再手挽手走下去，就由今晚開始好嗎？”
”傻瓜梗係好，不過第時老左我行唔到，你就唔止要拖住我，仲要咩住我行架啦！”
我轉身叫埋單時先知，原來一直我地兩個眼中都只有對方，完全冇留意身邊係點，隔離枱我諗係一對夫婦，佢地捉住對方既手望下我地，再望下另一半發出會心既微笑，我諗成晚我同C講既野佢地都聽到仲覺得好sweet添呀！
出左餐廳我就好自然咁拖C隻手，佢亦都好似自然咁稍為俾力握我隻手，仲挨實我行黎作出我牽佢手既回應，我地跟住就去左海邊漫步，我同C兩個都係第一次拍拖，我地既初戀就係咁開始！
（由第一次相約C散步到個晚食飯個一個月，什至個餐飯其實我同C傾左好多野，當中有好多都有關我同佢既背景同成長，係引版呢度只係想分享下我同C由十幾年前大家既初戀係埋一齊，到後來分開，到年幾前我地重遇直到呢刻佢已經係我老婆既相戀故事，其他冇關既我就從簡唔交代啦，請見諒~

Bird.... 呢度發生咩事？@@

billy哥哥...分享一切隨心...多謝你用心打咁多字...黃豬了解用文字去表達感受同打文唔係咁易..用好多時間心機...THX

你倆愛情故事由萌芽發展至雙方確認真係好浪漫令人好有憧憬...
原來billy哥哥吸引C既魅力...就係咩都唔好做...哈哈哈..
當然唔做係表面膚淺既舉動...心思花在由內心自然發出那份真摯關懷,著緊對方...
雙方係感受得到...這就是你與眾不同迷C所處..^^

TAMTAM...午安..

billy哥哥分享佢既故事..
2位哥哥故事都好浪漫,令人感動...^^

:smile_40: 係囉

無乜野，billy 有感而發，借普普個位講下自己故事。

haha...仲有係黃豬想八billy哥哥故事啫....

黃豬！

bearbear...^^

哈，無啦啦係postit兄個鋪噏自己野攪到嚇親 tamtam添，真係唔好意思，可惜個鋪冇位，唔係可以講埋當年自己唔珍惜，短短兩年就因為自由而放C...
經過十年發生好多事，係同L分開後重遇C，大家心態生活都好大改變，唯獨對對方依然有份愛封閉係心底，所謂患難見真情，係我最灰心最失意之時，C既關懷備至，加上原來十年黎都係單身因放唔低我去開始... 令我真正知道自己想牽手既伴侶原來兜兜轉轉就係自己既初戀！
能夠同C成為夫妻，到而家都可以有著當日個種見少陣都囉囉攣既感覺，雖然成日俾朋友話見到我地兩個連體嬰就眼冤，但係我地兩個真係好享受~